ఏపీ టీడీపీ నేత కిలారు రాజేష్‌‌‌‌‌పై రెక్కీ?.. బైక్‌పై వెంబడించిన దుండగుడు, కేసు నమోదు

ఏపీ టీడీపీ నేత, నారా లోకేష్ స్నేహతుడు కిలారు రాజేష్‌ను దుండగుడు అనుసరించిన ఘటన కలకలం రేపింది. పోలీసులు కథనం ప్రకారం.. రాజేష్‌ జూబ్లీహిల్స్‌లో నివాసం ఉంటున్నారు.. మంగళవారం మధ్యాహ్నం 3.15 గంటలకు తన ఇంటి నుంచి ప్రశాసన్‌నగర్‌ బస్‌స్టాప్‌ దగ్గర ఉన్న తన కుమారుడిని తీసుకువచ్చేందుకు కారులో బయలుదేరారు. అదే సమయంలో కొంతమంది తెలుపు రంగు ఫార్చ్యునర్‌ కారు (ఏపీ07 డీఈ 0001)లో ఆయనను అనుసరిస్తున్నట్లు గమనించారు.

వెంటనే భార్యకు ఫోన్‌ చేసి కుమారుడిని తీసుకురావాలని సూచించారు. ఆ తర్వాత కారును ఆపకుండా అలాగే ముందుకు వెళ్లగా.. వెనుక కారుతోపాటు మరో రెండు బైకులు కూడా వెంబడిస్తుండటాన్ని గమనించారు. అయినా ఆగకుండా రాజేష్ రాయదుర్గం, ముంబై హైవే, హైటెక్‌ సిటీ మెయిన్‌ రోడ్‌, నానక్‌రాంగూడ జంక్షన్‌, మణికొండ, ఫిల్మ్‌నగర్‌, జూబ్లీహిల్స్‌ చెక్‌పోస్ట్‌ మీదుగా వచ్చారు.. వారూ అనుసరించారు.

ఇంతలో జూబ్లీహిల్స్‌ రోడ్‌ నం.36 దగ్గర ఒక బైక్‌ ముందుకు వచ్చి కారును నిలిపివేయించాడు. తనను ఎందుకు అనుసరిస్తున్నారని రాజేష్‌ ప్రశ్నించారు.. ఆ వ్యక్తి ‘మా సర్‌ మిమ్మల్ని ఏమి చేయమని అడిగారో దానిని చేయడం మంచిది’ అని చెప్పారు. ‘సార్‌ ఎవరు.. మీరు ఎవరు.. ఎందుకు వెంబడిస్తున్నారు’ అని రాజేష్‌ ప్రశ్నించగా.. ‘నీకు అంతా తెలుసు’ అని బెదిరించినట్లు చెబుతున్నారు. ఆ తర్వాత ఆ దుండగుడు అక్కడి నుంచి వెళ్లిపోయాడు.

ఆ వెంటనే రాజేష్‌ జూబ్లీహిల్స్‌ పోలీస్‌స్టేషన్‌లో ఫిర్యాదు చేశారు. తన భార్య, పిల్లలకు ప్రాణహాని కలిగించేలా దుండగుడి తీరు ఉందని ఫిర్యాదులో పేర్కొన్నారు. అతడి ఫొటోలు, బైక్‌ వివరాలను పోలీసులకు అందజేశారు. 341, 506 సెక్షన్ల కింద జూబ్లీహిల్స్‌ పోలీసులు కేసు నమోదు చేసి దర్యాప్తు చేపట్టారు. దర్యాప్తు చేపట్టిన పోలీసులు సదరు ద్విచక్రవాహనం నంబరును పరిశీలించగా నకిలీదని తేలింది.

కిలారు రాజేష్‌ ఏపీ స్కిల్ డెవలెప్‌మెంట్ కేసులో ఆరోపణలు ఎదుర్కొంటున్నారు. ఇటీవలే సీఐడీ విచారణకు కూడా హాజరయ్యారు. ఆ తర్వాత రాజేష్ కీలక వ్యాఖ్యలు చేశారు. చంద్రబాబుని నేరుగా ఎదుర్కోలేక స్కిల్ ప్రాజెక్టులో అవినీతి అంటూ కథ అల్లారన్నారు. చంద్రబాబు ఆరోగ్యం పైనే అందరిలోనూ బాధ ఉందన్నారు.స్కిల్ డెవలప్మెంట్ ప్రాజెక్టు లో తన ప్రమేయం లేదని.. విచారణ న్యాయవాది సమక్షంలో జరిగిందన్నారు. పారిపోయానని తనపై ఓ వర్గం మీడియా అవాస్తవాలు రాసిందని.. తాను ఇక్కడే ఉన్నానని.. ఎక్కడికి పారిపోవాల్సిన అవసరం లేదన్నారు.తప్పుడు ప్రచారం చేస్తూ వార్తలు రాసే వారిపై న్యాయపరంగా గా ముందుకు వెళతానన్నారు రాజేష్.