భారతీయురాలినైతే బిహార్ సీఎం పదవికి పోటీ చేసేదాన్ని.. నితీశ్ కుమార్‌కు అమెరికా సింగర్ కౌంటర్

మహిళలను ఉద్దేశించి బిహార్ సీఎం నితీశ్ కుమార్ చేసిన వ్యాఖ్యలు దేశ వ్యాప్తంగా తీవ్ర దుమారం రేపాయి. ఈ క్రమంలోనే తీవ్ర విమర్శలు వెల్లువెత్తడంతో నితీశ్ కుమార్ క్షమాపణలు చెప్పారు. అయినప్పటికీ ఈ వివాదం ముగియడం లేదు. బుధవారం నితీశ్ కుమార్‌ను ఉద్దేశించి ప్రధాని నరేంద్ర మోదీ తీవ్ర స్థాయిలో విమర్శలు గుప్పించగా.. తాజాగా అమెరికా సింగర్ ఒకరు స్పందించారు. తాను భారతీయురాలిని అయితే బిహార్‌కు వెళ్లి నితీశ్ కుమార్‌కు వ్యతిరేకంగా సీఎం పదవికి పోటీ చేసేదాన్ని అంటూ ఆయన చేసిన వ్యాఖ్యలపై తీవ్రంగా మండిపడ్డారు.

మహిళలను కించపరుస్తూ నితీష్ కుమార్ చేసిన వివాదాస్పద వ్యాఖ్యలను అమెరికా సింగర్, నటి మేరీ మిల్‌బెన్ తీవ్రంగా ఖండించారు. ఆయన చేసిన వ్యాఖ్యలకు సీఎం పదవికి నితీష్ కుమార్ రాజీనామా చేయాలని మేరీ మిల్‌బెన్ డిమాండ్ చేశారు. బిహార్ సీఎంగా పోటీ చేయడానికి ఒక ధైర్యవంతురాలైన మహిళ అవసరమని ఆమె తెలిపారు. ఒకవేళ తాను భారతీయు పౌరురాలినైతే బిహార్‌కు వెళ్లి ముఖ్యమంత్రి పదవికి పోటీ చేసేదాన్ని అని చెప్పారు. ఇక బిహార్‌లో మహిళల విలువలు తీవ్ర ప్రమాదంలో పడ్డాయని మేరీ మిల్‌బెన్ పేర్కొన్నారు. నితీష్ కుమార్ వ్యాఖ్యలు విన్న తర్వాత మహిళలకు ఎదురవుతున్న ఇలాంటి సవాళ్లకు తనకు ఒకే ఒక సమాధానం కనిపిస్తోందని తెలిపారు. బిహార్‌లో ఒక ధైర్యవంతురాలైన మహిళ ముఖ్యమంత్రిగా పోటీ చేయాల్సిన అవసరం ఉందని వెల్లడించారు.

ఈ సందర్భంగా భారతీయ మహిళలకు మేరీ మిల్‌బెన్ ఒక ప్రత్యేక విజ్ఞప్తి చేశారు. మహిళల కోసం ఓటు వేయాలని.. మార్పును ఆహ్వానించాలని ఆమె కోరారు. ఈ సందర్భంగా ప్రధాని నరేంద్ర మోదీని ఉద్దేశించి మిల్‌బెన్ ప్రశంసలు గుప్పించారు. బిహార్‌లో మహిళల అధికారం దిశగా బీజేపీ అడుగులు వేయాలని ఆమె సూచించారు. అదే నిజమైన అభివృద్ధ అని మిల్‌బెన్ అభిప్రాయపడ్డారు. ప్రధాని నరేంద్ర మోదీ సారథ్యంలోనే మహిళా సాధికారత సాధ్యం అవుతుందని చెప్పారు.

జనాభా నియంత్రణపై బిహార్‌ అసెంబ్లీలో మాట్లాడిన నితీశ్ కుమార్.. చదువుకున్న మహిళలు.. జనాభా నియంత్రణ కోసం భర్తలను కంట్రోల్‌లో ఉంచుతారని పేర్కొన్నారు. విద్యావంతులైన మహిళలు శృంగారంలో తమ భర్తలను అడ్డుకుంటారని.. వారికి ఎప్పుడు ఏం చేయాలో తెలుసు అంటూ వివాదాస్పద వ్యాఖ్యలు చేశారు. బిహార్‌లో మహిళలు విద్యావంతులు అవుతున్నందువల్లే ఒకప్పుడు 4.3 గా ఉన్న జననాల రేటు.. ప్రస్తుతం 2.9 కు తగ్గిందని పేర్కొన్నారు. అది త్వరలోనే 2 కు చేరుతుందని చెప్పారు.