నిజమైన దేవుడు ఒక్కడే.. ఓ హిందువుగా నా మతం స్వేచ్ఛ నిచ్చింది

2024 అమెరికా అధ్యక్ష ఎన్నికల్లో రిపబ్లిక్ పార్టీ అభ్యర్థిత్వం కోసం పోటీపడుతోన్న భారత సంతతికి చెందిన వివేక్ రామస్వామి హిందూత్వంపై కీలక వ్యాఖ్యలు చేశారు. తన మతం ఓ హిందువుగా తనకు స్వేచ్ఛను అందిస్తుందని, నైతిక బాధ్యతగా ఈ అధ్యక్ష ఎన్నికల ప్రచారాన్ని చేపట్టడానికి తనను ప్రేరేపించిందని ఆయన ఉద్ఘాటించారు. శనివారం ది డైలీ సిగ్నల్ సంస్థ నిర్వహించిన ‘ది ఫ్యామిలీ లీడర్’ ఫోరమ్‌లో వివేక్ రామస్వామి పాల్గొన్నారు. ఈ సందర్భంగా ఆయన మాట్లాడుతూ.. హిందూ, క్రైస్తవ మత బోధనల మధ్య సంబంధాల ద్వారా తరువాతి తరానికి ప్రయోజనం కలిగే భాగస్వామ్య విలువలను ప్రోత్సహించాలనే ఉద్దేశాన్ని వ్యక్తం చేశారు.

‘నా విశ్వాసమే నాకు స్వేచ్ఛను ఇస్తుంది.. నా విశ్వాసమే నన్ను ఈ అధ్యక్ష ఎన్నికల ప్రచారానికి నడిపించింది... నేను హిందువును. నిజమైన దేవుడు ఒక్కడే అని నేను నమ్ముతున్నాను.. దేవుడు మనలో ప్రతి ఒక్కరినీ ఒక ప్రయోజనం కోసం ఇక్కడ ఉంచాడని నేను నమ్ముతున్నాను.. ఉద్దేశాన్ని సాకారం చేసుకోవడంలో ఆ విశ్వాసం మనకు ఒక కర్తవ్యం, నైతిక బాధ్యతను బోధిస్తుంది. అవి వివిధ మార్గాల్లో మన ద్వారా పని చేసే దేవుని సాధనాలు.. కానీ దేవుడు మనలో ప్రతి ఒక్కరిలో ఉన్నందున మనం ఇప్పటికీ సమానంగా ఉన్నాం... అదే నా విశ్వాసం ప్రధాన అంశం’ అని వివేక్ ఉద్ఘాటించారు.

తన పెంపకం గురించి మాట్లాడుతూ.. కుటుంబం, వివాహం, తల్లిదండ్రుల పట్ల గౌరవంతో సహా విలువలతో నిండిపోయానని చెప్పారు. ‘నేను సాంప్రదాయక కుటుంబంలో పుట్టి పెరిగాను. కుటుంబమే పునాది అని నా తల్లిదండ్రులు నాకు నేర్పించారు.. మీ తల్లిదండ్రులను గౌరవించండి. వివాహం పవిత్రమైంది.. వివాహానికి ముందు వ్యసనాలకు దూరంగా ఉండటమే ఉత్తమం.. వ్యభిచారం తప్పు.. స్త్రీ, పురుషుల మధ్య వివాహం జరుగుతుంది. విడాకులు మన ప్రాధాన్యత కాకూడదు.. ఎందుకంటే దేవుడు, కుటుంబపెద్దల ముందు ప్రమాణం చేస్తాం’ అని రామస్వామి చెప్పారు.

ఈ సందర్భంగా హిందూ, క్రైస్తవ విశ్వాసాల మధ్య సమాంతరాలను కూడా ఎత్తిచూపారు. ఇవి భగవంతుని 'భాగస్వామ్య విలువలని, వాటి కోసం తాను నిలబడతానని పేర్కొన్నారు. ‘నేను క్రిస్టియన్ హైస్కూల్‌కి వెళ్లాను.. అక్కడ మనం 10 నియమాలను నేర్చుకుంటాను.. స్క్రిప్చర్స్ క్లాస్‌లో నేను బైబిల్ చదివాను.. దేవుడు నిజమైనవాడు. నిజమైన దేవుడు ఒకడే. ఆ పేరును వృధా చేయవద్దు.. మీ తల్లిదండ్రులను గౌరవించండి. అబద్ధాలు చెప్పకండి.. దొంగతనం, వ్యభిచారం చేయకండి.. అప్పట్లో నేను నేర్చుకున్నది ఏమిటంటే.. ఈ విలువలు నాకు బాగా తెలుసు.. అవి హిందువుల కానీ, క్రైస్తవులకు కానీ సంబందించినవి కావు... అవి నిజానికి దేవునికి చెందినవి. ఇవి ఈ దేశాన్ని నడిపించే విలువలని నేను భావిస్తున్నాను’ అని రామస్వామి అన్నారు.

‘దేశవ్యాప్తంగా క్రైస్తవ మతాన్ని ప్రచారం చేసే అధ్యక్షుడిగా ఉండాలా? అమెరికా అధ్యక్షుడు కూడా అలా చేయాలని నేను అనుకోను.. కానీ విలువలను పాటించే వారి కోసం నేను నిలబడతాను.. తరువాతి తరాలకు మనం చూపే ఉదాహరణలను ప్రచారం చేస్తాను.. ఎందుకంటే అది నా కర్తవ్యం’ అని ఉద్ఘాటించారు. ‘దేవుడు ఎవరి ద్వారా పని చేయాలో మనం ఎన్నుకోం... అది మన ఎంపిక కాదు, అది దేవునికి చెందింది... కాబట్టి జుదాయి-క్రైస్తవం విలువలపై స్థాపించిన విలువలను నేను లోతుగా పంచుకుంటున్నాను.. విశ్వాసం, కుటుంబం, కృషి, దేశభక్తిని కలిగించడం అధ్యక్షుడిగా నా కర్తవ్యం’ అని పేర్కొన్నారు.