నీ భార్యను వదిలేసి వెళ్లిపో.. ఒంటికి నిప్పంటించుకున్న భర్త

నాకు న్యాయం చేయండి సార్.. నా భార్య నాతో వచ్చేలా చేయండి అంటూ పోలీస్ స్టేషన్‌కు వెళ్లిన ఓ వ్యక్తికి ఊహించని సమాధానం ఎదురైంది. ‘నీ భార్యను వదిలేసి వెళ్లిపో.. లేకుంటే, దొంగతనం కేసు పెట్టి నిన్ను లోపలేస్తా’ అని కానిస్టేబుల్ బెదిరించాడు. చేసేదేంలేక బాధితుడు పోలీస్‌ స్టేషన్‌ ఎదుటే ఒంటిపై పెట్రోల్‌ పోసుకుని నిప్పంటించుకున్నాడు. తిరుపతి జిల్లా చంద్రగిరిలో చోటుచేసుకున్న ఈ ఘటన స్థానికంగా కలకలం రేపింది. మంటల్లో కాలుతూ పోలీస్ట్ స్టేషన్ వద్దకు దూసుకొచ్చిన బాధితుడిని చూసి, అక్కడున్నవారు భయాందోళనకు గురయ్యారు. ఎస్సై హిమబిందు తెలిపిన వివరాల ప్రకారం..

విజయవాడకు చెందిన మణికంఠ అనే వ్యక్తి తమిళనాడులోని తిరుత్తణికి చెందిన దుర్గను ప్రేమ వివాహం చేసుకున్నాడు. వీరికి ఎనిమిదేళ్ల కుమార్తె, ఐదేళ్ల కుమారుడు ఉన్నారు. బతుకుదెరువు కోసం వీరు విజయవాడ నుంచి హైదరాబాద్‌‌కు వచ్చి స్థిరపడ్డారు. అయితే, దుర్గకు సోనూ అలియాస్ బాషా అనే వ్యక్తితో వివాహేతర సంబంధం ఏర్పడింది. 3 నెలలు కిందట భర్తతో విభేదించి తిరుపతికి చేరుకుంది. చంద్రగిరి పోలీస్‌ స్టేషన్‌లో పనిచేసే కానిస్టేబుల్‌ అండతో బాషా, దుర్గ.. భాకరాపేటలో మకాం పెట్టారు. సహజీవనం చేస్తున్నారు.

విషయం తెలుసుకున్న భర్త మణికంఠ తన భార్య వద్దకు వెళ్లి, పిల్లల కోసమైనా ఆలోచించి తనతో వచ్చేయమని వేడుకున్నాడు. అయితే, బాషాతో కలిసి దుర్గ అతడిని తిట్టి పంపించినట్లు తెలుస్తోంది. చంద్రగిరి కానిస్టేబుల్ వారికి అండగా ఉన్నట్లు తెలుసుకున్న మణికంఠ.. సోమవారం (నవంబర్ 20) ఉదయం పోలీస్ స్టేషన్‌కు చేరుకుని కానిస్టేబుల్ శ్రీనివాసులను నిలదీశాడు. భార్యను వదిలేసి వెళ్లిపోవాలని.. లేకుంటే దొంగతనం కేసు పెట్టి లోపలేస్తానని కానిస్టేబుల్ బెదిరించాడని బాధితుడు చెబుతున్నాడు. మనస్తాపం చెందిన మణికంఠ.. పోలీస్ స్టేషన్ పక్కనే ఉన్న పెట్రోల్ బంక్ నుంచి 2 లీటర్ల పెట్రోల్‌ తీసుకొచ్చి ఒంటిపై పోసుకొని నిప్పంటించుకున్నాడు. మంటల్లో కాలుతూ స్టేషన్‌లోకి వెళ్లేందుకు ప్రయత్నిస్తుండగా.. అక్కడే ఉన్న పోలీసులు, స్థానికులు ఆ మంటలను ఆర్పివేశారు. ఆటోలో అతడిని తిరుపతి రుయా ఆసుపత్రికి తరలించారు. తన భార్య ఎన్ని తప్పులు చేసినా క్షమించానని, తనకు న్యాయం చేయాలని.. కాలిన గాయాలతో బాధపడుతూ బాధితుడు వేడుకోవడం అక్కడున్న వారిని కదిలించింది. 70 శాతానికి పైగా కాలిన గాయాలతో చికిత్స పొందుతున్న మణికంఠ పరిస్థితి విషమంగా ఉన్నట్లు తెలుస్తోంది.