ఏపీలో దొంగ ఓట్లను కనిపెట్టేయొచ్చట.. ఇలా చేస్తే చాలంటున్న అధికారులు

ఏపీలో ఇటీవల కాలంలో దొంగ ఓట్లు నమోదవుతున్నాయంటూ ఆరోపణలు వినిపిస్తున్న సంగతి తెలిసిందే. ఒకే ఇంటి నంబర్‌పై నకిలీ ఓట్లను నమోదు చేస్తున్నట్లు టీడీపీ ఆరోపిస్తోంది.. ఇప్పటికే ఎన్నికల సంఘానికి కూడా ఫిర్యాదు చేసింది. అయితే ఎవరికైనా ఓటరు కార్డు పోయి.. నంబరు కూడా తెలియకుండా.. ఓటు ఎక్కడుందో కూడా తెలియకపోతే.. తెలియని వ్యక్తి ఓటు వేరేవారి డోర్ నంబర్‌లోకి వచ్చినా కనిపెట్టేయొచ్చంటున్నారు అధికారులు. ఓటరు కార్డు నంబరు తెలియక ఇబ్బంది పడటంతో పాటే.. ఒక ఇంటి డోర్‌ నంబరులో బయటి వారి ఓట్లు ఉన్నాయనే ఆరోపణలు ఉన్నాయి. ఇవన్నీ దొంగ ఓట్లని చెబుతున్నారు.. దొంగ ఓట్లు వేయాలనుకునే వారి పేర్లను ఇలా ఏదో ఒక డోర్‌ నంబరులో నమోదు చేయిస్తున్నారని టీడీపీ అంటోంది. ఇలాంటి దొంగ ఓట్లను కూడా కనిపెట్టెయొచ్చని చెబుతున్నారు. ఆంధ్రప్రదేశ్‌ ఎన్నికల సంఘం వెబ్‌సైట్‌ ద్వారా డోర్‌ నంబరు ఉంటే చాలు.. ఓటరు కార్డు నంబరు తెలియకపోయినా ఓటు వివరాలు తెలుసుకోవచ్చు. ఇంటి డోర్‌ నంబరులో దొంగ ఓట్లు ఉంటే వాటిని కూడా కనిపెట్టేయొచ్చని తెలిపారు అధికారులు.

ఇలాంటి ఓట్లను కనిపెట్టేందుకు.. ముందుగా నెట్‌లో https:/// ceoaperolls. ap.gov.in/name_search/ టైప్‌ చేసి ఎంటర్‌ నొక్కాల్సి ఉంటుంది. ఏపీ చీఫ్‌ ఎలక్ట్రోరల్‌ ఆఫీసర్‌ పేరుతో ఉన్న పేజీ కనిపిస్తుంది. ఇందులో జిల్లా, నియోజకవర్గాన్ని ఎంచుకోవాల్సి ఉంటుంది.. హౌస్‌ నంబరు ఆప్షన్‌లో ఇంటి డోర్‌ నంబర్‌ నమోదు చేయాలని సూచిస్తున్నారు. అక్కడ కనిపించే క్యాప్చా‌ను ఎంటర్‌ చేసి సెర్చ్‌ కొడితే ఆ ఇంటి నంబరులో మొత్తం ఎంత మంది ఓటర్లు ఉన్నారు.. వారి పేర్లు, వయసు, ఓటరు కార్డు నంబరు, వారి పోలింగ్‌ కేంద్రం నంబరు, వారి ఓటు వరుస నంబరు వంటి వివరాలన్నీ వచ్చేస్తాయి.

ఆ వివరాల్లో ఓటు కూడా కనిపిస్తుంది. కుటుంబ సభ్యుల పేర్లు కాకుండా.. తెలియని వ్యక్తుల పేర్లు ఉంటే అవి దొంగ ఓట్లు కింద లెక్క అంటున్నారు. వెంటనే ఎన్నికల అధికారులకు ఫిర్యాదు చేయాల్సి ఉంటుంది. ఒక వేళ ఆ డోర్‌ నంబరులో గతంలో ఓటు ఉండి, ఇప్పుడు కనిపించకపోతే ఓటు పోయినట్లే. కొత్త ఓటు నమోదు చేసుకోవాల్సి ఉంటుంది అంటున్నారు. కొద్దిరోజులుగా టీడీపీ, వైఎస్సార్‌సీపీల మధ్య దొంగ ఓట్ల విషయంలో మాటల యుద్ధం నడుస్తోంది. టీడీపీ సానుభూతిపరుల ఓట్లను అధికార పార్టీ నేతలు తొలగిస్తున్నారని ప్రతిపక్షం ఆరోపిస్తే.. టీడీపీనే ఆ పనిచేస్తోందని వైఎస్సార్‌సీపీ కౌంటర్ ఇస్తోంది. ఇరువురు పోటాపోటీగా ఎన్నికల సంఘానికి ఫిర్యాదులు కూడా చేశారు.