జాబిల్లిపై చంద్రయాన్-3 ల్యాండింగ్ తర్వాత కోటీశ్వరుడిగా మారిపోయిన ఇంజినీర్

ఆగస్టు 23న చంద్రుడి దక్షిణ ధ్రువంపై చంద్రయాన్-3 సాఫ్ట్ ల్యాండింగ్‌తో భారత్ చరిత్ర సృష్టించింది. ఇప్పటి వరకూ ఎవరికీ సాధ్యం కాని దక్షిణ ధ్రువంపై దిగిన తొలి దేశంగా.. చంద్రుడిపై కాలుపెట్టిన నాలుగో దేశంగానూ భారత్ నిలిచింది. ఈ మిషన్ విజయంతో భారత అంతరిక్ష పరిశోధన సంస్థ (ఇస్రో) ప్రతిష్ఠ మరింత పెరిగింది. అంతేకాదు, ఈ విజయం చంద్రయాన్-3 రోవర్, ల్యాండర్‌కు అవసరమైన ఎలక్ట్రానిక్ వ్యవస్థలను రూపొందించిన ఓ ఇంజినీర్ వ్యాపార స్వరూపాన్నే మార్చేసింది. ఇస్రోకు ఎలక్ట్రానిక్ పరికరాలను సరఫరా చేసే మైసూర్‌‌లోని కేన్స్ టెక్నాలజీ ఇండియా యజమాని 60 ఏళ్ల రమేష్ కున్హికన్నన్ సంపద రాత్రికి రాత్రే పెరిగిపోయింది. ఈ విషయాన్ని ప్రముఖ అంతర్జాతీయ మ్యాగజైన్ ఫోర్బ్స్ వెల్లడించింది.

చంద్రయాన్ -3 రోవర్, ల్యాండర్ రెండింటికీ శక్తినిచ్చే ఎలక్ట్రానిక్ సిస్టమ్‌లను సరఫరా చేయడం ద్వారా కున్హికన్నన్ ఈ మిషన్‌లో కీలక పాత్ర పోషించారని ఫోర్బ్స్ నివేదించింది. మిషన్ విజయవంతమైన తర్వాత కేటీఐ షేర్లలో భారీ పెరుగుదల నమోదయ్యింది. నవంబర్ 2022లో బాంబే స్టాక్ ఎక్స్ఛేంజ్‌లో ప్రవేశించినప్పటి నుంచి ఇప్పటి విలువలో మూడు రెట్లు పెరిగింది. చంద్రయాన్-3 మిషన్‌లో దాని పాత్ర గురించి బయటకు వచ్చిన తర్వాత కంపెనీ షేర్లు అదనంగా 40 శాతం లాభపడటం చెప్పుకోదగ్గ అంశం. కేటీఐలో రమేశ్ కున్హికన్నన్‌కు ఉన్న 64 శాతం వాటా కారణంగా ఆయన నికర విలువ ఇప్పుడు సుమారుగా 1.1 బిలియన్‌ డాలర్లకు చెరింది. కంపెనీ, దాని $137 మిలియన్ వార్షిక ఆదాయంలో సగానికి పైగా ప్రింటెడ్ సర్క్యూట్ బోర్డ్ పరికరాల ద్వారా సమకూరుతోంది. ఆటోమోటివ్, ఏరోస్పేస్, మెడికల్, డిఫెన్స్‌తో సహా వివిధ పరిశ్రమలకు ఎలక్ట్రానిక్ సిస్టమ్స్, డిజైన్ సేవలను అందించడంలో ఇది కీలక పాత్ర పోషిస్తోంది.

మోర్స్ నేషనల్ ఇన్‌స్టిట్యూట్ ఆఫ్ ఇంజనీరింగ్‌లో గ్రాడ్యుయేట్ చేసిన కున్హికన్నన్.. 1988లో ఎలక్ట్రానిక్స్ కాంట్రాక్ట్ తయారీదారుగా కేటీఐను స్థాపించారు. కంపెనీ చైర్‌పర్సన్‌గా పనిచేస్తున్న కున్హికన్నన్, ఆయన భార్య సవిత రమేష్ నాయకత్వంలో కొన్నేళ్లుగా ఆ సంస్థ అభివృద్ధి చెందింది. కేటీఐ ఉత్పత్తులు ఎలక్ట్రిక్ వాహనాలలో ఎలక్ట్రానిక్ కంట్రోల్స్ నుంచి వెంటిలేటర్లు, రైల్వే సిగ్నల్‌ వరకు విభిన్న రంగాలకు ఉత్పత్తులను సరఫరా చేస్తోంది. ఇక, ఫోర్బ్స్ నివేదిక కేటీఐ గణనీయమైన వృద్ధిని హైలైట్ చేసింది. దాని విజయానికి చాలావరకు స్థానిక తయారీని ప్రోత్సహించడానికి భారత ప్రభుత్వం రూపొందించిన ‘మేక్ ఇన్ ఇండియా’ కార్యక్రమం కారణమని పేర్కొంది. కంపెనీ వార్షిక ఆదాయం 2020 ఆర్థిక సంవత్సరంలో 49 మిలియన్ డాలర్ల నుంచి మూడు రెట్లు పెరిగింది. అదే సమయంలో మార్చితో ముగిసిన ఆర్థిక సంవత్సరంలో నికర లాభం పదిరెట్లు పెరిగి 11.4 మిలియన్ డాలర్లకు చేరుకుంది. సెప్టెంబర్ వరకు మొదటి ఆరు నెలల్లో కంపెనీ ఆదాయంలో 39 శాతం వృద్ధిని నమోదు చేసి, 7 మిలియన్ డాలర్ల నికర లాభంతో 78 మిలియన్ డాలర్లకు చేరింది. మార్చి 2024తో ముగిసే ఆర్థిక సంవత్సరంలో సుమారు 208 మిలియన్ డాలర్ల రాబడిని సాధించే అంచనాలతో నిరంతర వృద్ధికి సిద్ధంగా ఉంది.