పోలీస్ స్టేషన్‌ నుంచి వీడియో కాల్ చేసి.. రూ.3.7 కోట్లు కొట్టేశారు

మన దగ్గర సైబర్ మోసాలు పెరిగిపోతున్నాయి. వేలు, లక్షలే కాదు కోట్లు కొట్టేసే రేంజ్‌కి సైబర్ మోసగాళ్లు ఎదిగిపోయారు. ఎదుటోడి వీక్ పాయింట్ మీద దెబ్బకొడుతూ.. వారికి ఏమాత్రం అనుమానం రాకుండా కోట్లు గుంజేస్తున్నారు. తాజాగా బెంగళూరుకు చెందిన ఇన్ఫోసిస్ ఉన్నతోద్యోగి దగ్గర్నుంచి అక్షరాలా మూడు కోట్ల డెబ్భై లక్షలు గుంజేశారు. ట్రాయ్ అధికారులు, సీబీఐ అధికారులు, ముంబై పోలీసుల పేరిట బెదిరించి భారీ మొత్తం కొట్టేశారు. మేం టెలికాం రెగ్యులేటరీ అధికారులం.. మీ పేరుతో ఉన్న సిమ్ కార్డ్‌ను దుర్వినియోగం చేశారంటూ.. బాధితుడికి ఫోన్ కాల్ వెళ్లింది. చట్టవిరుద్ధమైన ప్రకటనలను ప్రచారం చేశారంటూ ఆయన్ను భయపెట్టారు. ఆ తర్వాత ముంబై పోలీస్ విభాగానికి చెందిన సీనియర్ ఆఫీసర్ మీతో మాట్లాడతారంటూ ఫోన్ కాల్‌ను మరొకరికి షిఫ్ట్ చేశారు. మీరు విచారణ కోసం ముంబై, ఢిల్లీ రావాల్సి ఉంటుంది, మిమ్మల్ని అరెస్ట్ చేసే అవకాశమూ ఉందని హడలగొట్టారు.

మేం చెబుతుంటే మీకు ఆషామాషీగా ఉందనుకుంటా కదా.. లైట్ తీసుకుంటే మీరే ఇబ్బంది పడతారు. మేం చెప్పేది మీరు నమ్మడం లేదనుకుంటా.. అయితే ఇదిగో చూడండి అంటూ.. ఓ పోలీస్ స్టేషన్ నుంచి ఆయనకు వీడియో కాల్ చేశారు. ఆ వీడియో కాల్‌లో ఇన్ఫోసిస్ ఉద్యోగికి ఖాకీ దుస్తుల్లో ఉన్న పోలీసులు కనిపించారు. వారంతా తమ ఐడీ కార్డులు, కంప్లెయింట్ కాపీని చూపించారు. మీరు అరెస్ట్ కావొద్దంటే మేం చెప్పినంత నగదును ఇవ్వాలని డిమాండ్ చేశారు. పెద్ద సంఖ్యలో బ్యాంక్ ఖాతాల వివరాలు పంపించారు. దీంతో బాధితుడు నవంబర్ 21 నుంచి 23 తేదీల మధ్య ఆ ఖాతాలకు డబ్బును

పంపించాడు. ఆ తర్వాత గానీ తాను మోసపోయానని.. ఆ పోలీస్ స్టేషన్ అంతా సెట్టింగ్ అని, ఐడీ కార్డులు, కంప్లెయింట్ కాపీ ఫేక్ అని.. ఇన్ఫోసిస్ ఉద్యోగికి తెలియలేదు. దీంతో నవంబర్ 25న పోలీసులకు ఫిర్యాదు చేశాడు. ఐటీ యాక్ట్, ఐపీసీ సెక్షన్లు 419, 420 కింద సైబర్ క్రైమ్ పోలీసులు కేసు నమోదు చేశారు. రూ.3 కోట్లకుపైగా మొత్తం కావడంతో కేసును సీఐడీకి ట్రాన్స్‌ఫర్ చేయాలని నిర్ణయించారు. బాధితుడు ఏయే ఖాతాలకైతే నగదు పంపించాడో.. ఆ ఖాతాలను ఫ్రీజ్ చేసేందుకు బ్యాంకు అధికారుల సాయం కోరుతున్నారు. మీకు కూడా ఇలాంటి కాల్స్ వస్తే స్పందించొద్దని అధికారులు ప్రజలకు కోరుతున్నారు. వెంటనే పోలీసులకు సమాచారం ఇవ్వాలని సూచిస్తున్నారు. ఇన్ఫోసిస్‌లో పెద్ద స్థాయిలో ఉన్న ఉద్యోగినే బురిడీ కొట్టించారంటే ఈ కేటుగాళ్లు మామూలోళ్లు కాదు.