ప్రధాని అభ్యర్థిగా ఖర్గేను ప్రతిపాదించిన మమత, కేజ్రీవాల్

ప్రతిపక్ష కూటమి ఇండియా నాలుగో సమావేశం దేశ రాజధాని ఢిల్లీలో కొనసాగుతోంది. వచ్చే ఎన్నికల్లో అనుసరించాల్సిన వ్యూహం, కూటమి పార్టీల మధ్య సీట్ల సర్దుబాటు తదితర అంశాలను చర్చిస్తున్నారు. ఇదే సమయంలో కూటమి ప్రధాని అభ్యర్థిగా ఎవరు ఉండాలనే దానిపై కూడా చర్చ జరిగినట్టు సమాచారం. కూటమి పీఎం అభ్యర్థిగా కాంగ్రెస్ జాతీయ అధ్యక్షుడు మల్లికార్జున ఖర్గే పేరును పశ్చిమ్ బెంగాల్ ముఖ్యమంత్రి మమతా బెనర్జీ, ఢిల్లీ సీఎం అరవింద్ కేజ్రీవాల్ ప్రతిపాదించినట్టు విశ్వసనీయ వర్గాలు తెలిపాయి. కానీ, దీనిని ఖర్గే సున్నితంగా తిరస్కరించినట్టు పేర్కొన్నాయి.

వాస్తవానికి ఇండియా కూటమి ప్రధాని అభ్యర్థిత్వంపై లోక్‌సభ ఎన్నికల తర్వాతే నిర్ణయిస్తామని బెంగాల్ సీఎం సోమవారం వ్యాఖ్యానించడం గమనార్హం. ఖర్గే దళిత సామాజిక వర్గానికి చెందిన కీలక నేత కావడంతో దీదీ ప్రతిపాదనకు విశేష స్పందన వచ్చినట్టు తెలుస్తోంది. కాంగ్రెస్ పట్ల విధానాలను వ్యతిరేకించే ఢిల్లీ సీఎం కేజ్రీవాల్ సహా 12 పార్టీలకు చెందిన నాయకులు దీంతో ఏకభవించారని సమాచారం. అయితే, ఖర్గే వారి ఆశలపై నీళ్లు చల్లినట్టు విశ్వసనీయ వర్గాలు తెలిపాయి. తాను అణగారిన వర్గాల కోసం మాత్రమే పని చేయాలనుకుంటున్నానని చెప్పినట్టు పేర్కొన్నాయి.

రాష్ట్రపతి ఎన్నికల సమయంలో షెడ్యూల్డ్ కులాలు, తెగలకు చెందిన రామ్‌నాథ్ కోవింద్, ద్రౌపది ముర్ములపై అభ్యర్థిని నిలబెట్టినందుకు అధికార బీజేపీ నుంచి ప్రతిపక్షం తీవ్ర విమర్శలను ఎదుర్కొంది. కాంగ్రెస్, ఇతర పార్టీలు దళితులు, గిరిజనులకు వ్యతిరేకమని బీజేపీ ఆరోపించింది. ఈ నేపథ్యంలో బీజేపీకి చెక్ పెట్టేందుకు దీదీ ఖర్గే పేరును వ్యూహాత్మకంగా ప్రతిపాదించినట్టు భోగట్టా. సంఖ్యా బలం లేకుండా ప్రధాని అభ్యర్థిని నిర్ణయించడం సరికాదని ఖర్గే అభిప్రాయపడ్డారు. ముందు గెలిచిన తర్వాత ప్రధాని ఎవరన్నది నిర్ణయిద్దామని చెప్పినట్టు తెలుస్తోంది. ఎన్నికల్లో గెలవాలని, ఎంపీల సంఖ్యను పెంచుకోవాలని కాంగ్రెస్ చీఫ్ అన్నారు.

కాగా,దేశ చరిత్రలో మొదటిసారి ఎంపీలను పెద్ద సంఖ్యలో పార్లమెంట్ నుంచి సస్పెండ్ చేశారని ఖర్గే వ్యాఖ్యానించారు. ఇది బీజేపీ అహంకారానికి పరాకాష్ట అని ఆయన ధ్వజమెత్తారు. ఈ నేపథ్యంలో పార్లమెంట్‌లో విపక్ష సభ్యుల బహిష్కరణకు నిరసనగా ఈ నెల 22న దేశవ్యాప్త ఆందోళన నిర్వహించాలని ఈ సమావేశంలో నిర్ణయించారు. సీట్ల సర్దుబాటు అంశంపై కూడా చర్చించినట్టు కాంగ్రెస్ నేత కేసీ వేణుగోపాల్ వెల్లడించారు. డిసెంబరు చివరి నాటికి కొలిక్కి వస్తుందని ఆయన చెప్పారు. డిసెంబరు 31కి సీట్ల పంపకాలపై నిర్ణయం తీసుకోనున్నామని తెలిపారు.