మకరజ్యోతికి వెళ్లే అయ్యప్ప భక్తులకు అలర్ట్.. దేవస్థానం బోర్డు కీలక నిర్ణయం

కేరళలోని శబరిమలలో మండల పూజలు పూర్తికావడంతో బుధవారం రాత్రి అయ్యప్ప ఆలయాన్ని తాత్కాలికంగా మూసివేశారు. తిరిగి మకరవిలక్కు కోసం శనివారం (డిసెంబరు 30న) ఆలయ ద్వారాలను తెరిచి భక్తులకు స్వామి దర్శనం కల్పించనున్నారు. అలాగే జనవరి 13న ప్రసాద శుద్ధక్రియ, 14న బింబ శుద్ధక్రియలను నిర్వహించి, 15న మకరవిలక్కు వేడుకను జరపనున్నట్లు ట్రావెన్‌కోర్‌ దేవస్థానం బోర్డు ఓ ప్రకటనలో వెల్లడించింది. అయితే, గతంలో ఎన్నడూ లేనివిధంగా మండల పూజల సీజన్‌కు భక్తులు పోటెత్తడంతో మకర జ్యోతి సందర్భంగా విర్చువల్ క్యూ టిక్కెట్ల జారీ విషయంలో టీబీడీ కీలక నిర్ణయం తీసుకుంది.

జనవరి 14, 15 తేదీల్లో వర్చువల్ క్యూ బుకింగ్‌లను 50,000కి తగ్గించనున్నట్లు ట్రావెన్‌కోర్ దేవస్థానం బోర్డ్ ప్రెసిడెంట్ పీసీ ప్రశాంత్ చెప్పారు. యాత్రికుల రద్దీని ఊహించి, ముందస్తు బుకింగ్‌లు లేకుండా ఈ రెండు రోజుల్లో స్పాట్ బుకింగ్‌లను 10,000కి పరిమితం చేయనున్నారు. ఇంకా ఈ రోజుల్లో ఆలయానికి వచ్చే భక్తులు నేరుగా పంపాకి వెళ్లే బదులు నిలక్కల్‌లో స్పాట్ బుకింగ్‌లను చేసుకునే అవకాశం కల్పిస్తారు.

‘ఈ రెండు రోజులలో ఆలయం అత్యంత రద్దీగా ఉంటుంది. ముఖ్యంగా జనవరి 15న మకర జ్యోతి రోజున రద్దీని అదుపులో ఉంచేందుకు ఈ చర్యలు తీసుకుంటున్నాం..’ అని టీడీబీ ఛైర్మన్ చెప్పారు. మకరవిలక్కు కోసం తరలివచ్చే శబరి యాత్రికులకు వివిధ పాయింట్ల వద్ద చేయాల్సిన ఏర్పాట్లపై ఎరుమేలీలో జరిగే బోర్డు సమావేశంలో నిర్ణయం తీసుకుంటామని వివరించారు. ‘ఈ సీజన్‌లో పెద్ద సంఖ్యలో యాత్రికులు వచ్చిన పులుమేడు.. విస్తృతమైన ఏర్పాట్లు చేయవలసిన ప్రదేశం.. గతేడాది ఈ ప్రాంతం నుంచి మకర జ్యోతిని 35 వేల మంది దర్శించుకున్నట్టు అంచనా’ అని ఆయన అన్నారు.