ప్రియురాలి కోసం ప్రియుడి సాహసం.. వేషం మార్చుకుని ప్రేయసిలా వెళ్లి.. ఆ తర్వాత దొరికిపోయి

తన ప్రియురాలికి ఉద్యోగం రావాలనే కోరికతో ఆమె ప్రియుడు చేసిన పనికి ఉద్యోగం సంగతి అటు ఉంచితే పాపం ప్రియుడు కటకటాల పాలయ్యాడు. తన ప్రేయసి రాయాల్సిన పరీక్షకు.. ఆమె ప్రియుడు వేషం మార్చి.. అచ్చం యువతి లాగా తయారై వెళ్లాడు. అయితే అతడి వేషాన్ని ఇన్విజిలేటర్, పరీక్షా కేంద్రం సిబ్బంది, ఇతర అభ్యర్థులు కూడా గుర్తు పట్టలేకపోయారు. అప్పటివరకు పరీక్ష రాసిన ఆ ప్రియుడు మరికొద్దిసేపు అయితే పరీక్ష పూర్తి అవుతుందనగా.. అసలు బండారం బయటపడింది. అతడు ఆమె కాదు.. అతడే అని ఇన్విజిలేటర్ గుర్తించడంతో అంతా అవాక్కయ్యారు. ఈ సంఘటన పంజాబ్ రాష్ట్రంలో చోటు చేసుకుంది.

ఫరీద్‌కోట్‌లోని ఓ పరీక్షా కేంద్రంలో జరిగిన ఈ ఘటన ప్రస్తుతం తెగ వైరల్ అవుతోంది. ఈ నెల 7 వ తేదీన బాబా ఫరీద్‌ యూనివర్సిటీ ఆఫ్‌ హెల్త్‌ సైన్సెస్‌ ఆధ్వర్యంలో మల్టీపర్పస్‌ హెల్త్ వర్కర్‌ పోస్టుకు అర్హత పరీక్ష జరిగింది. కోట్కపురాలోని డీఏవీ స్కూలులో కూడా ఎగ్జామ్ సెంటర్ ఏర్పాటు చేశారు. ఈ సందర్భంగా పరంజీత్ అనే యువతి పరీక్షను ఆమె బాయ్‌ఫ్రెండ్ అయిన ఫజిల్కాకు చెందిన అంగ్రేజ్‌ సింగ్‌ అనే యువకుడు రాసేందుకు వేషం మార్చుకుని వెళ్లాడు.

లేడీస్‌ సూట్ వేసుకున్న అంగ్రేజ్ సింగ్.. ఎరుపురంగు గాజులు ధరించి, నుదుట తిలకం పెట్టుకున్నాడు. అంతే కాకుండా పెదాలకు లిప్‌స్టిక్‌ కూడా రాసుకుని అచ్చం అమ్మాయిలా తయారై పరీక్ష హాలుకు రావడంతో ఎవరూ గుర్తించలేకపోయారు. లేడీ గెటప్‌లో దిగిన ఫొటోతో తన ప్రేయసి పరంజీత్‌ కౌర్ పేరిట తయారు చేయించుకున్న నకిలీ గుర్తింపు కార్డులను కూడా అధికారులు పసిగట్టలేకపోయారు. దీంతో తన ప్రియురాలి కోసం అంగ్రేజ్ సింగ్ సాఫీగా పరీక్ష రాయడం మొదలు పెట్టాడు. అయితే పరీక్ష సమయం పూర్తి కావస్తున్న వేళ అనూహ్య సంఘటన చోటు చేసుకుని అంగ్రేజ్ సింగ్ దొరికిపోయాడు.

అయితే పరీక్ష సందర్భంగా ఇన్విజిలేటర్‌ ఒక్కొక్కరి వద్ద బయోమెట్రిక్‌ తీసుకుంటూ అంగ్రేజ్‌ సింగ్‌ దగ్గరికి వచ్చాడు. అయితే వివరాలు మొత్తం పరంజీత్ కౌర్‌వి ఉండగా.. అంగ్రేజ్‌ సింగ్‌ వేలిముద్రలు తీసుకోవడంతో అవి సరిపోలలేదు. అంగ్రేజ్ సింగ్ వేషం పక్కాగా ఉండటంతో ఇన్విజిలేటర్‌కు ఎలాంటి అనుమానం రాలేదు. దీంతో టెక్నికల్ సమస్య వచ్చిందని భావించిన ఇన్విజిలేటర్ విషయాన్ని ఉన్నతాధికారుల దృష్టికి తీసుకుకెళ్లాడు.

ఉన్నతాధికారులు వచ్చి వేలిముద్రలు చూసినా సరిపోలలేదు. దీంతో అనుమానం వచ్చి అంగ్రేజ్ సింగ్‌ను పూర్తి తనిఖీ చేయడంతో అమ్మాయి వేషంలో వచ్చిన అబ్బాయి అని గుర్తించారు. దీంతో అధికారులు, ఇన్విజిలేటర్‌తోపాటు పరీక్ష రాస్తున్న అభ్యర్థులు కూడా షాక్ అయ్యారు. దీంతో అంగ్రేజ్‌సింగ్‌ను అధికారులు పోలీసులకు అప్పగించగా.. వారు అదుపులోకి తీసుకున్నారు. ఈ ఘటనతో పరంజీత్‌ కౌర్ అభ్యర్థిత్వాన్ని రద్దు చేశారు.