గ్యాస్ డెలివరీ బాయ్ గుమ్మం తట్టిన లక్ష్మీదేవి.. కోటిన్నర జాక్‌పాట్

ఇంటింటికి గ్యాస్‌ డెలివరీ చేస్తూ కుటుంబాన్ని ఆసరగా ఉన్న ఓ యువకుడు దశ తిరిగిపోయింది. అతడు రాత్రికి రాత్రే కోటీశ్వరుడిగా మారిపోయాడు. దీంతో అతడు కథ సోషల్ మీడియాలో తెగ వైరల్ అవుతోంది. డ్రీమ్-11 యాప్‌ క్రికెట్‌ గేమ్‌లో అతడు జాక్‌పాట్‌ కొట్టాడు. గేమ్‌ ఆడిన అతడు ఏకంగా రూ.కోటిన్నర గెలుచుకున్నాడు. అతడే బిహార్‌కు చెందిన సాదిఖ్. రోజు గ్యాస్ డెలివరీ చేసే సాదిఖ్.. ప్రస్తుతం రూ.కోటిన్నర గెలవడంతో అతడి సంతోషానికి అవధుల్లేకుండా పోయింది. తమ కష్టాలు తీరిపోయాయని కుటుంబసభ్యులు సంబరపడిపోతున్నారు.

వివరాల్లోకి వెళ్తే బిహార్‌ అరారియా జిల్లా పటేగనా గ్రామానికి చెందిన సాదిఖ్‌ స్థానికంగా ఉన్న ఓ గ్యాస్ ఏజెన్సీలో డెలివరీ బాయ్‌గా పనిచేస్తున్నాడు. అయితే, సాదిఖ్‌కు క్రికెట్‌ అంటే ఎంతో ఇష్టం. ఆ ఇష్టంతోనే డ్రీమ్-11 యాప్‌లో తన అదృష్టాన్ని పరీక్షించుకుని జాక్‌పాట్ కొట్టి కోటీశ్వరుడయ్యాడు. జనవరి 14న జరిగిన భారత్‌-అఫ్గానిస్థాన్‌ టీ20 మ్యాచ్‌ సందర్భంగా రూ.49 పెట్టి డ్రీమ్‌-11లో గేమ్‌ ఆడాడు. ఈ మ్యాచ్‌లో అతడు 974.5 పాయింట్లతో తొలి స్థానంలో నిలిచి రూ.కోటిన్నర గెలుచుకున్నాడు. అయితే, తాను కోటిన్నర గెలిచిన విషయం నమ్మలేకపోయాడు.

కాగా, ప్రస్తుతం సాదిఖ్‌ ఇంట్లో పండగ వాతావరణం నెలకొంది. మరోవైపు, ఈ విషయంపై గ్యాస్‌ ఏజెన్సీ డైరెక్టర్‌ జితేంద్ర స్పందిస్తూ.. సాదిఖ్‌ బ్యాంకు ఖాతాకు డబ్బులు వచ్చిన వెంటనే వాటిని ఫిక్స్‌డ్‌ డిపాజిట్‌ చేశామని తెలిపారు. దాని మీద వచ్చే వడ్డీతో వారి కుటుంబం సంతోషంగా ఉంటుందని ఇలా చేశామని జితేంద్ర చెప్పారు. కాగా డ్రీమ్‌-11 యాప్‌ ద్వారా గతంలో కూడా చాలా మంది కోటీశ్వరులయ్యారు. గతేడాది మే నెలలో బిహార్‌కు చెందిన ఓ బస్సు డ్రైవర్ కూడా డ్రీమ్-11 యాప్‌లో గేమ్ ఆడి రూ.2 కోట్లు గెలుచుకున్నాడు.