భార్య విషయంలో మోదీ రాముడిని అనుసరించలేదు.. రామరాజ్యం అందించలేదు: బీజేపీ మాజీ ఎంపీ

అయోధ్యలో బాల రాముడు కొలువుదీరాడు. ప్రధానమంత్రి నరేంద్ర మోదీ చేతుల మీదుగా ప్రాణ ప్రతిష్ఠ కార్యక్రమం పూర్తయింది. దీంతో ఎవరికీ దక్కని అద్భుత అవకాశం మోదీకి లభించింది. అయితే ప్రధాని నరేంద్ర మోదీ ప్రాణ ప్రతిష్ఠ చేయడంపై ఆ పార్టీ సీనియర్ నేత, రాజ్యసభ మాజీ సభ్యుడు సుబ్రమణియన్ స్వామి తీవ్ర విమర్శలు గుప్పించారు. అయోధ్య రామ మందిర ప్రారంభోత్సవంలో ప్రధాని హోదా శూన్యమైనా.. బాల రాముడి ప్రాణ ప్రతిష్ఠ కోసం నరేంద్ర మోదీ కుస్తీ పడుతున్నారని తీవ్ర స్థాయిలో ధ్వజమెత్తారు.

పూజలో ప్రధాని హోదా సున్నా అయినప్పుడు.. పూజ చేయడానికి మోదీ తీవ్రంగా ఆరాట పడుతున్నారని విమర్శించారు. తన వ్యక్తిగత జీవితంలో కూడా ప్రధాని నరేంద్ర మోదీ.. శ్రీరాముడిని ఆచరించలేదని తీవ్ర ఆరోపణలు చేశారు. ముఖ్యంగా తన భార్య విషయంలో ప్రధాని నరేంద్ర మోదీ ప్రవర్తన.. శ్రీరాముడి సిద్ధాంతాలకు పూర్తిగా భిన్నమని తెలిపారు. అటు.. ప్రధాని మోదీ పరిపాలనపై కూడా సుబ్రమణియన్ స్వామి తీవ్ర విమర్శలు గుప్పించారు. గత పదేళ్లుగా ప్రధాని నరేంద్ర మోదీ భారతదేశంలో రామరాజ్యం ప్రకారం పాలన సాగించలేదని ఆరోపించారు.

అయితే తరచూ బీజేపీ విధానాలపై ప్రధాని నరేంద్ర మోదీపై తనదైన శైలిలో విమర్శలు గుప్పించే సుబ్రమణియన్ స్వామి.. గత నెలలో కూడా అయోధ్య ప్రారంభోత్సవంలో ప్రధాని మోదీ పాల్గొనడంపై అభ్యంతరాన్ని వ్యక్తం చేశారు. ప్రధాని నరేంద్ర మోదీ తన భార్యను విడిచిపెట్టినందుకు ప్రసిద్ధి చెందారని సుబ్రమణియన్ స్వామి ఆరోపించారు. రాముడు అతని భార్య కోసం దాదాపు ఒకటిన్నర దశాబ్దాలు ఒంటరి జీవితం గడిపి యుద్ధం చేశాడని తెలిపారు. అయోధ్యలో రామ్ లల్లా ప్రాణ ప్రతిష్ట పూజలో పాల్గొనడానికి రామ భక్తులు ప్రధాని నరేంద్ర మోదీని ఎలా అనుమతించగలరని ప్రశ్నించారు. భార్యను విడిచిపెట్టినందుకు ఫేమస్ అయిన ప్రధాని నరేంద్ర మోదీ.. ఇంకా ఆయన పూజ చేస్తారా అని సుబ్రమణియన్ స్వామి నిలదీశారు. దీంతో ఆయన చేసిన వ్యాఖ్యలు తీవ్ర దుమారం రేపుతున్నాయి. సొంత పార్టీలోనే ఉంటూ ఏకంగా ప్రధాని నరేంద్ర మోదీపై తరచూ తీవ్ర స్థాయిలో విమర్శలు చేస్తుండటం అందర్నీ ఆశ్చర్యానికి గురి చేస్తోంది.