చంద్రబాబుకు పక్క పార్టీల్లో స్టార్ క్యాంపెయినర్లు.. షర్మిలపై సీఎం జగన్ పరోక్ష విమర్శలు

చంద్రబాబుకు గజదొంగల ముఠా అండ ఉందన్నారు ఆంధ్రప్రదేశ్ ముఖ్యమంత్రి వైఎస్ జగన్. పక్క పార్టీల్లో కూడా బాబుకు స్టార్ క్యాంపెయినర్లు ఉన్నారంటూ సెటైర్లు పేల్చారు. సీఎం జగన్ అనంతపురం జిల్లా ఉరవకొండలో పర్యటించారు.. నాలుగో విడత వైఎస్సార్‌ ఆసరా నిధుల్ని బటన్ నొక్కి జమ చేశారు. మొత్తం రూ.6,394.83 కోట్లను విడుదల చేశారు. నాలుగు విడతల్లో రూ.25571 కోట్ల రుణాలను ప్రభుత్వం చెల్లించింది. ఈ సందర్భంగా ఏర్పాటు చేసిన సభలో ప్రతిపక్షాలపై ఘాటు విమర్శలు చేశారు. వైఎస్ షర్మిలపైనా పరోక్షంగా టార్గెట్ చేశారు.

చంద్రబాబుకు పాలనతో మోసం చేసిన ఘనతే ఉందని.. ఆయనకు తోడుగా ఓ తోడేళ్ల గుంపు ఉందన్నారు. ఇలాంటి వాళ్లకు రోజూ సమాధానం ఇచ్చుకోవాల్సి రావడమే కలికాలమని.. ప్రతీ ఇంటా మంచి జరుగుతున్నా.. వాళ్లు ఎక్కువ సంఖ్యలో ఉండడం.. మీడియా వాళ్ల వైపే ఉండడంతో ఏం చెప్పినా చెల్లుబాటు అవుతుందని అనుకుంటున్నారన్నారు. చంద్రబాబును మోసే ముఠా ఒకటి ఉందని.. ఆయన ఏ మంచి చేయకపోయినా.. ఏ సంక్షేమం చేయకపోయినా.. ఢంకా బజాయించేందుకు చాలామంది స్టార్‌ క్యాంపెయినర్‌లు ఉన్నారన్నారు. వాళ్లంతా పక్క రాష్ట్రంలో ఉంటారన్నారు.

చంద్రబాబుకు దత్తపుత్రుడు ఒక స్టార్‌ క్యాంపెయినర్‌ అయితే.. ఆయన వదిన (దగ్గుబాటి పురందేశ్వరి) పక్క పార్టీలోకి వెళ్లి మరోస్టార్‌ క్యాంపెయినర్‌గా మారారన్నారు. పక్క రాష్ట్రంలోనే శాశ్వతంగా ఉంటున్న మీడియా అధిపతులు అక్కడే శాశ్వతంగా ఉంటారన్నారు. వీరంతా చంద్రబాబుకు క్యాంపెయినింగ్‌ చేస్తుంటారన్నారు. రాష్ట్రాన్ని విడగొట్టిన పార్టీలోకి వెళ్లిన చంద్రబాబు అభిమానం సంఘం కూడా స్టార్‌ క్యాంపెయినరే అంటూ పరోక్షంగా షర్మిలను టార్గెట్ చేశారు. పక్క పార్టీలో ఉంటూ చంద్రబాబు అభిమాన సంఘం అంతా జాకీ పెట్టి లేపేందుకు ప్రయత్నిస్తూ తోడుగా ఉందన్నారు.

పసుపు కమలాల మనుషులు బాబుకు స్టార్‌ క్యాంపెయినర్‌లు ఉన్నారని.. ఇంకా స్టార్‌ క్యాంపెయినర్‌లు చాలామందే ఉన్నారన్నారు. అమరావతిలో బాబు బినామీలు ఉన్నట్లే.. ఇతర పార్టీల్లో చంద్రబాబు బినామీలు స్టార్‌ క్యాంపెయినర్‌లు ఉన్నారని ధ్వజమెత్తారు. కొందరు పలు వేదికలపై విశ్లేషకులు, మేధావుల పేరిట టీవీల్లో కూడా కనిపిస్తారన్నారు. ఏం చేయని ఆయనకు ఇంత మంది స్టార్‌ క్యాంపెయినర్‌లు ఉన్నారు. బాబును భుజాన మోసే ముఠా చాలామందే ఉన్నారన్నారు జెండాలు జత కట్టిన వాళ్లంతా అనుకుంటున్నారన్నారు.

తనకు మాత్రం ఎవరూ లేరని.. కుట్రలు కుతంత్రాలు జెండాలు జత కట్టడమే వాళ్ల ఎజెండా అయితే.. జనం గుండెల్లో గుడి కట్టడమే జగన్‌ ఎజెండా అన్నారు. ఈ ప్రభుత్వంలో మంచి జరిగినా.. ప్రతీ ఇళ్లు, ఆ ఇళ్లలోని అక్కాచెల్లెమ్మలే తన స్టార్‌ క్యాంపెయినర్‌లు అన్నారు సీఎం జగన్. గతంలో జన్మభూమి కమిటీ స్థాయి నుంచి సీఎం స్థాయి దాకా లంచాలిస్తేనే పనులు జరిగేవని.. ఇప్పుడు పాదర్శకంగా సంక్షేమం అర్హులకు అందుతోందన్నారు. అప్పుడు కూడా ఒకే రాష్ట్రం.. ఇదే రాష్ట్రం. ఇదే బడ్జెట్‌. మారిందల్లా కేవలం ముఖ్యమంత్రే అన్నారు అప్పుల గ్రోత్‌ రేటు కూడా తక్కువే ఉందని.. మరి గత ప్రభుత్వంలో ఈ మంచి ఎందుకు జరగలేదో ఆలోచించాలన్నారు. గతంలో దోచుకో పంచుకో తినుకో ఉండేదని.. ఇప్పుడు జగన్ బటన్‌ నొక్కుతున్నాడు.. నేరుగా లబ్ధిదారుల ఖాతాల్లోనే డబ్బు జమ అవుతోందన్నారు.

చంద్రబాబు గతంలో పొదుపు సంఘాల రుణమాఫీ చేస్తానని మేనిఫెస్టోలో హామీ ఇచ్చి మోసం చేశారన్నారు. రాజకీయంగా, సామాజికంగా ఎదుగుదలకు తోడ్పడిన ప్రభుత్వం తమది అన్నారు. ఎస్సార్‌ ఆసరా.. దేశంలో ఏ రాష్ట్రంలో కనిపించనంత తేడా ఏపీలో కనిపిస్తోందన్నారు. దేశంలో ఎక్కడా లేని విధంగా ఏపీలో సంక్షేమ పథకాలు అమలవుతున్నాయన్నారు. పొదుపు సంఘాలకు సున్నా వడ్డీ కింద రూ.4,968 కోట్లు చెల్లించామన్నారు. ఏపీలో అమలు చేస్తున్న సంక్షేమ పథకాలు ఒక రికార్డు..గతంలో అక్కచెల్లెమ్మలకు ఎందుకు మంచి జరగలేదో ఆలోచన చేయాలన్నారు.