ఓలా ఎస్1 ఎలక్ట్రిక్ స్కూటర్లపై రూ.25 వేల తగ్గింపు.. ఆఫర్ ఇంకా రెండ్రోజులే

ఎలక్ట్రిక్ స్కూటర్లకు డిమాండ్ పెరుగుతోంది. పెట్రోల్ ధరలు గరిష్ఠ స్థాయిలో ఉండడం, ప్రభుత్వాలు ప్రోత్సహకాలు అందిస్తున్న క్రమంలో విద్యుత్తు వాహనాల వైపు ప్రజలు క్రమంగా మొగ్గు చూపుతున్నారు. అలాగే ప్రత్యేక రోజుల్లో కంపెనీలు సైతం డిస్కౌంట్ ఆఫర్లు ప్రకటిస్తున్నాయి. ప్రముఖ ఎలక్ట్రిక్ స్కూటర్ల తయారీ సంస్థ ఓలా ఎలక్ట్రిక్ గణతంత్ర దినోత్సవ సందర్భంగా ఓలా ఎస్ 1 విద్యుత్తు స్కూటర్లపై భారీ డిస్కౌంట్ అందిస్తోంది. ఈ ఆఫర్ పూర్తి వివరాలు తెలుసుకుందాం.

భారత 75 వ గణతంత్ర దినోత్సవాన్ని పురస్కరించుకుని ఓలా ఎలక్ట్రిక్ ఈ ఆఫర్ ప్రకటించింది. ఓలా ఎస్1 ఈవీ స్కూటర్లపై డిస్కౌంట్లు ఇస్తోంది. ఈ తప్పులుగు జనవరి 31 వరకు మాత్రమే అందుబాటులో ఉంటాయని కస్టమర్లు గుర్తుంచుకోవాలి. మొత్తంగా రూ. 25 వేల వరకు డిస్కౌంట్లు పొందవచ్చు. ఈ ఆఫర్లు ఎలక్ట్రిక్ స్కూటర్ లైనప్ అంతటా వర్తిస్తాయి. అలాగే ఓలా ఎలక్ట్రిక్ రిపబ్లిక్ డే ఆఫర్లలో పొడిగించిన వారంటీ పై 50 శాతం తగ్గింపు లభిస్తోంది. అలాగే ఎస్ 1 ఎయిర్, ఎస్ 1 ప్రో మోడల్స్ పై రూ. 2 వేల వరకు ఎక్స్చేంజ్ బోనస్ లభిస్తుంది. ఓలా ఎలక్ట్రిక్ ఎంపిక చేసిన క్రెడిట్ కార్డు ఈఎంఐలపై కొనుగోలుదారులకు రూ. 5 వేల వరకు తగ్గింపు పొందవచ్చు. అలాగే జీరో డౌన్ పేమెంట్, జీరో ప్రాసెసింగ్ ఫీ, 7. 99 శాతం నుంచి వడ్డీ రేటు వంటి ప్రత్యేక ఫైనాన్స్ ఆఫర్లు అందిస్తోంది.

ఓలా ఎస్1 ఎక్స్ ప్లస్ స్కూటర్లపై గతేడాది డిసెంబర్ లో ప్రకటించిన రూ. 20 వేల తగ్గింపును కొనసాగిస్తోంది. అంటే ఈ స్కూటర్ ఇప్పుడు రూ. 89,999 (ఎక్స్‌షోరూమ్ ) ధర వద్ద కొనుగోలు చేయవచ్చు. ఓలా ఎలక్ట్రిక్ కంపెనీ ఐదు రకాల మోడళ్లను మార్కెట్లోకి తీసుకొచ్చింది అందులో ఓలా ఎస్ 1 ఎక్స్ (2 కే డబ్ల్యూహెచ్), ఓలా ఎస్ 1 ఎక్స్ (3 Kwh), ఎస్ 1 ఎక్స్ ప్లస్, ఎస్ 1 ఎయిర్, ఎస్ 1 ప్రో వంటివి ఉన్నాయి. ప్రస్తుతం ఎంట్రీ లెవల్ ఓలా ఎస్ 1 ఎక్స్ విక్రాయలు ఇంకా ప్రారంభం కాలేదు. ఈ స్కూటర్లను ముందస్తుగా రూ. 3999 చెల్లింపి ప్రీ బుకింగ్ చేసుకోవచ్చు. మరోవైపు.. గణతంత్ర దినోత్సవం సందర్భంగా ఓలా యూనిటీ హెరిటేజ్ రైడ్ నిర్వహించింది.