ముగిసిన చంద్రబాబు, పవన్ కళ్యాణ్ భేటీ,,,,పొత్తుల లెక్కలపై కుదిరిన క్లారిటీ

ఉండవల్లిలోని చంద్రబాబు నివాసంలో టీడీపీ అధినేత చంద్రబాబు, జనసేన అధ్యక్షుడు పవన్ కళ్యాణ్ మధ్య భేటీ ముగిసింది. ఆదివారం మధ్యాహ్నం చంద్రబాబు ఇంటికి వచ్చిన పవన్ కళ్యాణ్.. సుమారు మూడుగంటల పాటు చంద్రబాబుతో వివిధ అంశాలపై చర్చించారు. సీట్లు సర్దుబాటు, ఏయే స్థానాల్లో ఎవరు పోటీ చేయాలి, అసంతృప్తులకు నచ్చజెప్పడం ఎలా వంటి అంశాలపై ఇరువురు నేతలు మూడు గంటలపాటు చర్చించారు. మొత్తానికి రెండు పార్టీల మధ్య సీట్ల సర్దుబాటుపై ఆదివారం నాటి భేటీలో ఓ క్లారిటీ వచ్చిందని తెలుస్తోంది.

ఇప్పటికే టీడీపీ అధినేత చంద్రబాబు రెండు స్థానాలకు అభ్యర్థులను ప్రకటించగా.. పవన్ కళ్యాణ్ సైతం రాజోలు, రాజానగరం స్థానాల్లో జనసేన పోటీ చేస్తుందని ప్రకటించారు. రిపబ్లిక్ డే సందర్భంగా ఈ విషయాన్ని ప్రకటించారు జనసేనాని. అయితే పొత్తు ధర్మం ప్రకారం సంప్రదింపులు జరపకుండా ఏ పార్టీ కూడా అభ్యర్థులను ప్రకటించకూడదని పవన్ వ్యాఖ్యానించారు. టీడీపీ రెండు స్థానాలకు అభ్యర్థులను ప్రకటించడంతో తాము కూడా రాజోలు, రాజానగరం స్థానాల్లో పోటీచేస్తామని ప్రకటించారు. దీంతో రెండుపార్టీల మధ్య చెడిందని, టీడీపీ, జనసేన పొత్తు సాధ్యమయ్యే పనికాదంటూ సోషల్ మీడియాలో ప్రచారం జరిగింది. వైసీపీ నేతలు కూడా ఈ విషయమై విమర్శలు చేశారు. ఇకనైనా చంద్రబాబు సంగతిని పవన్ అర్థం చేసుకోవాలంటూ అంబటి రాంబాబు లాంటి నేతలు వ్యాఖ్యానించారు.

ఈ పరిస్థితుల్లోనే ఆదివారం చంద్రబాబు, పవన్ కళ్యాణ్ మధ్య భేటీ జరిగింది. ఈ సమావేశంలో పొత్తులో భాగంగా జనసేనకు ఎన్నిసీట్లు ఇవ్వాలి.. ఏయే స్థానాల్లో గెలిచే అవకాశాలున్నాయనే దానిపై సర్వే నివేదికల గురించి కూడా చర్చించారని తెలిసింది. జనసేనకు 25 నుంచి 30 స్థానాలు కేటాయించాలని టీడీపీ భావిస్తుండగా... ఇంకొన్ని స్థానాలు కావాలంటూ ఆదివారం నాటి సమావేశంలో పవన్ కళ్యాణ్.. చంద్రబాబుకు చెప్పినట్లు సమాచారం. అలాగే ఉభయగోదావరి జిల్లాలో సగం సీట్లు అడిగినట్లు తెలిసింది. పార్టీలో టికెట్ ఆశావహుల సంఖ్య పెరుగుతున్న విషయాన్ని కూడా చంద్రబాబు దృష్టికి తీసుకెళ్లినట్లు సమాచారం.

మరోవైపు పొత్తులో భాగంగా సీట్లు రాని నేతలకు ఏరకంగా సర్దిచెప్పాలనే దానిపైనా పవన్ కళ్యాణ్, చంద్రబాబు సమాలోచనలు జరిపినట్లు తెలిసింది. జనసేన పోటీ చేసేచోట్ల టీడీపీ నేతలకు, టీడీపీ బరిలో ఉండే స్థానాల్లో జనసేన లీడర్లకు సర్దిచెప్పాలని నిర్ణయించారు. అలాగే పొత్తుల లెక్కలపై ఓ క్లారిటీ వచ్చిందనీ, ఒకట్రెండు రోజుల్లో దీనిపై అధికారిక ప్రకటన వచ్చే అవకాశం ఉందని తెలిసింది. ఉమ్మడి మ్యానిఫెస్టో, ఉమ్మడి సభలపై కూడా చంద్రబాబు, పవన్ ఏకాభిప్రాయానికి వచ్చారని, త్వరలోనే తేదీలను ప్రకటిస్తారని సమాచారం.