గంజాయిలోనూ ఎన్నో రకాలు,,,,ఏపీలో దొరికే 'శీలావతి'కి దేశవ్యాప్తంగా భారీ డిమాండ్.. కేజీ రూ.లక్షా 20 వేల వరకు

పంటల్లో ఎన్నో రకాలు ఉన్నట్లు.. గంజాయిలో కూడా చాలా వెరైటీలు ఉంటాయని మీకు తెలుసా.. అందులోనూ ఏపీలో దొరికే ఒక రకం గంజాయికి ఇప్పుడు దేశంలోనే ఎక్కువ డిమాండ్. ఏజెన్సీలో పండే ఈ రకం గంజాయికి నేషనల్ మార్కెట్‌లో మంచి డిమాండ్ ఉందని చెబుతున్నారు. ఆంధ్రప్రదేశ్, ఒడిశా సరిహద్దులో గుట్టుగా సాగు చేసే ఈ గంజాయి పేరు శీలావతి.. ఇప్పుడు దేశవ్యాప్తంగా మంచి డిమాండ్ కూడా ఉందట. మార్కెట్‌లో ఈ శీలావతి రకం గంజాయి వాటా దాదాపు మూడింట రెండు వంతులు ఉంటుందని అంచనా.

ఈ ఏవోబీ (ఆంధ్ర, ఒడిశా) సరిహద్దులో దొరికే శీలావతి రకం గంజాయి.. హిమాచల్ ప్రదేశ్‌లోని కొండల్లో పెరిగి, ఎక్కువ డిమాండ్ ఉండే మలానా క్రీమ్‌ను దాటేసిందట. ఎన్‌ఫోర్స్‌‌మెంట్ లెక్కల ప్రకారం.. గత నాలుగేళ్లలో నార్కోటిక్స్ కంట్రోల్ బ్యూరో (NCB) దేశవ్యాప్తంగా 23.6 లక్షల కేజీల గంజాయిని సీజ్ చేస్తే.. అందులో 70శాతం శీలావతి రకం గంజాయి ఉందట. ఇంత భారీ స్థాయిలో శీలావతి వెరైటీ గంజాయి దొరకడాన్ని బట్టి చూస్తే.. మార్కెట్‌లో ఎంత డిమాండ్ ఉందో అర్థం చేసుకోవచ్చంటున్నారు. హిమాచల్ ప్రదేశ్‌‌లో దొరికే మలానా క్రీమ్, కేరళలో దొరికే ఇడుక్కి రకాల గంజాయితో పోలిస్తే శీలావతి గంజాయికి డిమాండ్‌తో పాటుగా తక్కువ ధరకు దొరుకుతుందని చెబుతున్నారు.

గంజాయి మొక్కలో ఉండే రసాయన సమ్మేళనాలు.. టెట్రాహైడ్రోకాన్నబినాల్ మంచి కిక్ ఇస్తుందని చెబుతుంటారు. ఇతర రకాల గంజాయితో పోల్చినప్పుడు శీలావతి వెరైటీగా ఉంటుందని.. సుగంధ సమ్మేళనాలతో ఉంటుందని ఫీలు అవుతుంటారట. 2019 వరకు హిమాచల్ ప్రదేశ్‌లోని కులూ రీజియన్‌లో దొరికే మలానా క్రీమ్ గంజాయికి దేశవ్యాప్తంగా మంచి డిమాండ్ ఉండేది. కానీ ఆ గంజాయి సరఫరా చాలా పరిమితంగా ఉండేది.. ధర కూడా చాలా ఎక్కువ. నాణ్యతను బట్టి కేజీ ఏకంగా రూ.5 లక్షల నుంచి 8 లక్షల వరకు ఉండేది. అయితే ఏపీలో దొరికే గంజాయి కేజీ రూ.80వేల నుంచి రూ.1.2 లక్షలకే విక్రయిస్తున్నారు. అందుకే శీలావతి రకం గంజాయికి డిమాండ్ ఉందంటున్నారు.