33 టన్నుల చికెన్ దొంగతనం.. దాన్ని అమ్మేసి ఏం కొన్నారో తెలిస్తే నవ్వు ఆపుకోలేరు

మనం ఇప్పటివరకు ఎన్నో దొంగతనాలు విని ఉంటాం. అన్నింటిలోకెల్లా ఇది ఒక విచిత్రమైన దొంగతనం. ఎందుకంటే ఎవరైనా ఆకలి కోసం దొంగతనం చేస్తారు.. మరికొందరు జల్సాల కోసం చోరీలు చేస్తూ ఉంటారు. ఇక కొందరు అయితే తమ వృత్తినే దొంగతనంగా ఎంచుకుంటారు. అయితే ఇక్కడ మాత్రం చాలా వెరైటీ. ఎందుకంటే ఈ ఘటనలో దొంగలు చికెన్‌ను దొంగతనం చేశారు. అది కూడా అంతా ఇంతా కాకుండా ఏకంగా 133 టన్నుల కోడి మాంసాన్ని ఎత్తుకుపోయారు. అయితే ఈ చికెన్‌ను వారు తినడానికి దొంగిలించలేదు. దాన్ని అమ్మేసి.. వచ్చిన డబ్బులతో నిందితులు టీవీలు, ల్యాప్‌టాప్‌లు కొనుగోలు చేశారు. అబ్బో ఇదేం ఐడియారా బాబూ అని బుర్ర గిర్రున తిరిగిపోతుంది కదూ. అయితే ఈ సంఘటన మాత్రం జరిగింది మనం దేశంలో కాదు.. క్యూబా దేశంలో. ఇంతకీ ఏం జరిగిందంటే?

కబీరియన్ దేశమైన క్యూబాలో పేదరికం, ఆర్థిక సంక్షోభం, ఆహార కొరత తీవ్రంగా ఉంటుంది. అక్కడి దేశీయులు తినడానికి తిండి కూడా లేకుండా బతుకుతున్నారు. కనీస అవసరాలను తీర్చుకోలేని స్థితిలో క్యూబా వాసులు కాలం వెళ్లదీస్తున్నారు. అయితే అలాంటి క్యూబా రాజధాని హవానాలో ఓ భారీ దొంగతనం జరిగింది. 133 టన్నుల చికెన్‌ను చోరీ చేశారు. అయితే ఆ 133 టన్నుల కోడి మాంసాన్ని విక్రయించి.. వచ్చిన డబ్బులతో ఆ దొంగలు టీవీలు, ల్యాప్‌టాప్‌లు, రిఫ్రిజిరేటర్లతో పాటు ఇతర ఎలక్ట్రానిక్ వస్తులను కొనుగోలు చేశారు. ఈ విషయం పోలీసులకు తెలియడంతో కేసు నమోదు చేసుకుని దర్యాప్తు ప్రారంభించారు.

టన్నుల కొద్దీ చికెన్ మాంసం దొంగతనం అయిన ఘటనలో విచారణ మొదలుపెట్టిన పోలీసులకు విస్తుపోయే వాస్తవాలు వెల్లడి అయ్యాయి. హవానా నగరంలోని స్టేట్ ఫెసిలిటీలో ఉన్న 1660 బాక్సుల నుంచి ఈ 133 టన్నుల కోడి మాంసాన్ని నిందితులు తీసుకెళ్లినట్లు పోలీసులు గుర్తించారు. అయితే క్యూబా దేశంలో ఆహార కొరత తీవ్రంగా ఉండటంతో ప్రభుత్వం రేషన్ దుకాణాల ద్వారా స్థానిక ప్రజలకు అధికారులు చికెన్‌ను పంపిణీ చేస్తున్నారు. ఈ క్రమంలోనే 133 టన్నుల చికెన్‌ను కూడా క్యూబా వాసులకు పంచేందుకు అధికారులు సిద్ధంగా ఉంచారు. కానీ ఈ లోపే స్టేట్ ఫెసిలిటీ సెంటర్‌లో దొంగలు పడి.. మొత్తం మాంసాన్ని ఎత్తుకెళ్లిపోవడంతో స్థానిక ప్రజలకు పంచకుండా పోయింది. ఈ విషయాన్ని అక్కడి అధికారులు వెల్లడించారు.

ఈ కేసులో దర్యాప్తు జరిపిన పోలీసులు 30 మందిపై అభియోగాలు మోపారు. దొంగతనానికి గురైన 133 టన్నుల చికెన్‌ ఒక ప్రావిన్స్‌లోని ప్రజలకు నెల రోజులకు సరిపడా వస్తుందని అధికారులు తెలిపారు. అయితే ఈ దొంగతనం తెల్లవారుజామున 2 గంటలకు జరిగినట్లు అధికారులు అనుమానం వ్యక్తం చేస్తున్నారు. ఈ దోపిడీ జరగడానికి ముందు.. ఫెసిలిటీ సెంటర్‌లో ఉష్ణోగ్రత ఎక్కువ, తక్కువ కావడం గమనించినట్లు అధికారులు తెలిపారు. అభియోగాలు మోపబడిన 30 మంది.. ఆ ప్లాంట్‌లోనే పని చేసే సిబ్బంది, ఐటీ ఉద్యోగులు, సెక్యూరిటీ గార్డులు ఉన్నట్లు తేలింది. అయితే ఆ కంపెనీతో సంబంధం లేని వ్యక్తులు కూడా ఈ దొంగతంలో పాల్గొన్నట్లు పోలీసులు తెలిపారు. ఈ కేసులో ఆ నిందితులు దోషులుగా తేలితే మాత్రం.. వారికి 20 ఏళ్ల జైలు శిక్ష పడే అవకాశం ఉందని అక్కడి అధికార వర్గాలు వెల్లడించాయి.