'జీతాలు చెల్లించలేకపోతున్నాం.. అంతా వారి వల్లే'.. ఉద్యోగులకు బైజూస్ రవీంద్రన్ లేఖ

ఆర్థిక సమస్యలో కూరుకుపోయిన ప్రముఖ ఎడ్‌టెక్ సంస్థ బైజూస్‌ ను కష్టాలు వెంటాడుతున్నాయి. ఉద్యోగులకు సమయానికి జీతాలు చెల్లించలేని పరిస్థితులు నెలకొంటున్నాయి. గతంలో ఓసారి జీతాల కోసం బైజూస్ సీఈఓ రవీంద్రన్ తన సొంత ప్రాపర్టీలను తాకట్టు పెట్టినట్లు వార్తలు వచ్చిన సంగతి తెలిసిందే. ఇప్పుడు మరోసారి బైజూస్ ఉద్యోగుల జీతాల చెల్లింపులు తెరపైకి వచ్చాయి. ఉద్యోగులకు జీతాలు చెల్లించలేకపోతున్నానంటూ లేఖ రాశారు బైజూస్ రవీంద్రన్. ఇటీవల రైట్స్ ఇష్యూ ద్వారా నిధులు సమీకరించినప్పటికీ సకాలంలో జీతాలు చెల్లించలేకపోతున్నట్లు తెలిపారు. ఇన్వెస్టరలతో నెలకొన్న వివాదం వల్ల వేరే ఖాతాలో నిధులు నిలిచిపోవడంతో ఈ పరిస్థితి నెలొగందని పేర్కొన్నారు.

గత నెలలో తీవ్రమైన నిధుల కొరత ఎదుర్కొన్నట్లు లేఖలో పేర్కొన్నారు బైజూస్ సీఈఓ రవీంద్రన్. ఇప్పుడు నిధులు ఉన్నప్పటికీ సకాలంలో శాలరీలు ఇవ్వలేని పరిస్థితులు నెలకొన్నాయని తెలిపారు. మార్చి 10 నాటికల్లా జీతాలు చెల్లించేందుకు ప్రయత్నిస్తామని పేర్కొన్నారు. 'దురదృష్టవశాత్తూ కొందరు ఇన్వెస్టర్ల వల్లే ఈ పరిస్థి నెలకొంది. రైట్స్ ఇ,్యూ ద్వారా నిధులు సమీకరించుకొన్నప్పటికీ.. వారి మూలంగా మీరు పడిన కష్టానికి శాలరీలు సైతం చెల్లించలేని పరిస్తితి నెలకొంది. కొందరు ఇన్వెస్టర్లు బైజూస్ లో పెట్టుబడి పెట్టడం ద్వారా భారీగా లాభాలు పొందారు. అందులో ఒకరికి ఏకంగా 8 రెట్లు లాభాలు అందాయి. అలాంటి వారు ఇతరుల జీతాలు, జీవనోపాధితో ఆటలాడుతున్నారు.' అని ఆరోపించారు రవీంద్రన్.

ఉద్యోగుల హక్కుల సాధన కోసం తమ లీగల్ టీమ్ కృషి చేస్తోందని లేఖలో పేర్కొన్నారు రవీంద్రన్. ఎన్ని ప్రయత్నాలు చేస్తున్నప్పటికీ మీకు ఆర్థిక సహకారం ఇవ్వలేకపోతున్నా అనేది వాస్తవమన్నారు. మరోవైపు.. ఇటీవలే బైజూస్ సంస్థ 200 మిలియన్ డాలర్ల నిధులను రైట్స్ ఇష్యూ ద్వారా సమీకరించిన సంగతి తెలిసిందే. అయితే, కొందరు ఇన్వెస్టర్లు బైజూస్ పై నేషనల్ కంపెనీ లా ట్రైబ్యునల్ ను ఆశ్రయించారు. దీంతో ఆ మొత్తాన్ని ఎస్క్రో అకౌంట్ లో ఉంచాలని బైజూస్ కు ఆదేశాలు జారీ చేసింది నేషనల్ కంపెనీ లా ట్రైబ్యునల్. తదుపరి విచారణను ఏప్రిల్ 4వ తేదీకి వాయిదా వేసింది.