మాజీ మంత్రి నారాయణ అల్లుడిపై కేసు.. పునీత్‌కు చిక్కులు తప్పవా!

టీడీపీ సీనియర్‌ నేత, మాజీ మంత్రి, నెల్లూరు సిటీ అభ్యర్థి పొంగూరు నారాయణ అల్లుడు పునీత్‌ చిక్కుల్లో పడ్డారు. ఆయనపై బాలాజీ నగర్‌ పోలీసు స్టేషన్‌లో కేసు నమోదైంది. పన్నులు ఎగ్గొట్టారంటూ డిప్యూటీ ట్రాన్స్‌పోర్ట్‌ కమిషనర్‌(డీటీసీ) బి. చందర్‌ ఇచ్చిన ఫిర్యాదుతో పోలీసులు కేసు నమోదు చేశారు. టీడీపీ నాయకులు, సానుభూతిపరులు, ఆడిటర్ల ఇళ్లపై దాడులు నిర్వహించారు. ఈ సోదాల్లో లెక్కలు చూపని రూ.1.81 కోట్లను స్వాధీనం చేసుకున్నట్లు పోలీసులు తెలిపారు. డీటీసీ నుంచి వచ్చిన రిపోర్టు ఆధారంగా పునీత్‌పై కేసు నమోదు చేసి విచారణ చేపట్టామన్నారు.

నారాయణ విద్యాసంస్థలకు అనుబంధంగా ఎన్‌స్పెరా మేనేజ్‌మెంట్‌ సర్వీసెస్‌ అనే సంస్థ కార్యకలాపాలు నిర్వహిస్తోందన్నారు. దీనికి పునీత్‌ డైరెక్టర్‌గా ఉన్నారని.. గత జూన్‌లో ఎన్‌స్పెరా సంస్థ నారాయణ సంస్థతో 92 బస్సులు అద్దె రూపంలో సమకూర్చేలా ఒప్పందం కుదుర్చుకుందన్నారు. ఇదే కంపెనీ జీఎస్టీని క్లెయిమ్‌ చేసుకుందని చెప్పారు.. కానీ ఇన్‌వాయిస్ మాత్రం నారాయణ విద్యాసంస్థల పేరుతో తీసుకుని, డాక్యుమెంట్లను ఫోర్జరీ చేసి నారాయణ విద్యాసంస్థల పేరుతో రిజిస్ట్రేషన్‌ చేయించారని వివరించారు.

ఇన్‌స్పెరా సంస్థకు ఎలాంటి స్కూళ్లు లేవని, కానీ ఆ సంస్థ బస్సులను కొనుగోలు చేసిందని తెలిపారు టీడీసీ చందర్. కాగా, విద్యాసంస్థలకు నడుస్తున్న బస్సులన్నీ ఆ విద్యా సొసైటీ పేరుతో రిజిస్ట్రేషన్‌ చేసుకోవాల్సి ఉంటుందని నారాయణ విద్యాసంస్థల జీఎం వేమిరెడ్డి విజయభాస్కర్‌రెడ్డి తెలిపారు. ఫలానా చట్టం ప్రకారం ట్యాక్స్‌ తక్కువ కడుతున్నారని నోటీసు ఇస్తే, దానిని పరిశీలించి కడుతామన్నారు. నారాయణను ఏదోరకంగా కేసులో ఇరికించే ప్రయత్నాలు జరుగుతున్నాయని టీడీపీ నేతలు ఆరోపిస్తున్నారు.

సొసైటీ పేరుతో ఫోర్జరీ డాక్యుమెంట్లతో బస్సులు రిజిస్టర్‌ చేశారని, దీనివల్ల రవాణా శాఖకు చెల్లించాల్సిన పన్నును ఎగ్గొట్టారని చేస్తున్న అభియోగాల్లో ఏమాత్రం సరికాదంటున్నారు. వేధింపుల కోసం ఈ కారణాలను వెతుకున్నారని నేతలు ఆరోపిస్తున్నారు. బస్సుల రికార్డులకు, సోదాలు జరిగిన ఇళ్ల యజమానులకు ఎలాంటి సంబంధం లేదని అంటున్నారు. ఇదే సమయంలో సోదాలు చేసిన వారిలో నారాయణ సంస్థలో పనిచేసే ఒకఉద్యోగి, ఒక డాక్టర్‌ ఉన్నారు. ముగ్గురు వ్యాపారులు, మరో ఇద్దరు టీడీపీ సానుభూతిపరులు, నారాయణ అనుచరుల ఇళ్లు ఉన్నాయి.