పెద్దిరెడ్డికి కీలక బాధ్యతలు.. ఆ ముగ్గురికీ బ్రేకులు వేసేందుకా.. జగన్ సూపర్ స్కెచ్!

ఎన్నికల వేళ ఏపీ సీఎం జగన్ మోహన్ రెడ్డి కీలక నిర్ణయాలు తీసుకుంటున్నారు. దూకుడైన నిర్ణయాలతో ప్రత్యర్థి పార్టీల ప్లాన్‌లకు చెక్ పట్టే పనిలో పడ్డారు సీఎం జగన్ మోహన్ రెడ్డి. ఇప్పటికే ఇంఛార్జుల ప్రకటన, అవసరమైతే మార్చుతూ ముందుకెళ్తున్న జగన్ మోహన్ రెడ్డి మరో కీలక నిర్ణయం తీసుకున్నారు. మంత్రి పెద్దిరెడ్డి రామచంద్రారెడ్డికి కీలక బాధ్యతలు అప్పగించారు.మంత్రి పెద్దిరెడ్డికి జగన్ తిరుపతి పార్లమెంట్ రీజనల్ కోఆర్డినేటర్ బాధ్యతలు అప్పగించారు. పెద్దిరెడ్డి ఇప్పటికే అనంతపురం, హిందూపురం, చిత్తూరు పార్లమెంటు నియోజకవర్గాలకు సమన్వయకర్తగా వ్యవహరిస్తున్నారు. వీటికి అదనంగా తిరుపతి పార్లమెంట్ నియోజకవర్గానికి సైతం జగన్ పెద్దిరెడ్డినే సమన్వయకర్తగా నియమించారు. వైయస్ జగన్ ఆదేశాలతో వైసీపీ కేంద్ర కార్యాలయం ఇప్పటికే ఆదేశాలు జారీ చేసింది.

అయితే ఇప్పటివరకూ తిరుపతి పార్లమెంట్ కోఆర్డినేటర్‌గా ఉన్న చెవిరెడ్డిని ఒంగోలు పంపించారు సీఎం జగన్. ఒంగోలు పార్లమెంట్ వైసీపీ ఇంఛార్జిగా చెవిరెడ్డిని నియమించిన జగన్.. ఎంపీ అభ్యర్థిగా ఆయనను బరిలో దింపనున్నారు. దీంతో తిరుపతి పార్లమెంట్ కోఆర్డినేటర్ పోస్ట్‌ను పెద్దిరెడ్డికి అప్పగించినట్లు తెలిసింది. జగన్ నిర్ణయం వెనుక మరో కారణం కూడా ఉన్నట్లు తెలుస్తోంది. తిరుపతి ఎంపీ టికెట్‌తో పాటు, తిరుపతి ఎమ్మె్ల్యే సీటుపై కూడా జనసేన ఆశలు పెట్టుకుంది. పొత్తులో భాగంగా జనసేనతో పాటు ఇంకా కూటమిలోకి రాని బీజేపీ సైతం తిరుపతి ఎంపీ సీటు కోరుతోంది. అలాగే తిరుపతిలో జనసేన తరుఫున పవన్ కళ్యాణ్ పోటీ చేస్తారనే ప్రచారం జరుగుతోంది. టీడీపీ నేత సుగుణమ్మ కూడా పవన్ పోటీ చేస్తానంటే తప్పుకుంటానంటూ ప్రకటించడం విశేషం.

ఇలాంటి వార్తల మధ్యలోనే తిరుపతి పార్లమెంట్ నియోజకవర్గ సమన్వయ కర్తగా పెద్దిరెడ్డి రామచంద్రారెడ్డిని సీఎం జగన్ నియమించడం ప్రాధాన్యం సంతరించుకుంది. పవన్ కళ్యాణ్ పోటీ చేస్తారనే వార్తల మధ్య సీనియర్ నాయకులు, రాజకీయ ఉద్ధండులైన పెద్దిరెడ్డిని నియమించడం జగన్ మార్క్ స్కెచ్ అని విశ్లేషకులు అభిప్రాయపడుతున్నారు.

ఇప్పటికే హిందూపురం పార్లమెంట్ సమన్వయకర్తగా పెద్దిరెడ్డి కొనసాగుతున్నారు. ఆ పార్లమెంట్ పరిధిలోనే నందమూరి బాలకృష్ణ బరిలోకి దిగుతున్నారు. అలాగే చంద్రబాబు జోరును అడ్డుకునేందుకు చిత్తూరు పార్లమెంట్ సమన్వయకర్తగానూ పెద్దిరెడ్డినే వైసీపీ అధిష్టానం నియమించింది. ఇప్పుడు పవన్ కళ్యాణ్ తిరుపతి నుంచి పోటీచేస్తే జనసేనానికి బ్రేకులు వేసేందుకు తిరుపతి పార్లమెంట్ నియోజకవర్గ వైసీపీ సమన్వయకర్తగా పెద్దిరెడ్డిని నియమించారనే ప్రచారం నడుస్తోంది.