రైలు ప్రయాణికులకు అలర్ట్ .. 'సికింద్రాబాద్- విశాఖ వందేభారత్ రైలు రద్దు'.. కానీ మరో ఆప్షన్

సికింద్రాబాద్ నుంచి విశాఖపట్నానికి వెళ్లే రైలు ప్రయాణికులకు ముఖ్య గమనిక. సికింద్రాబాద్ నుంచి వైజాగ్ వెళ్లే వందేభారత్ రైలు రద్దు అయ్యింది. సాంకేతిక కారణాల వలన సికింద్రాబాద్ నుంచి విశాఖ వెళ్లే వందేభారత్ రైలును రద్దు చేసినట్లు సౌత్ సెంట్రల్ రైల్వే అధికారులు వెల్లడించారు. అయితే మార్చి8 వ తేదీ మాత్రమే రైలు రద్దు అయినట్లు వెల్లడించారు. 20834 నంబర్ గల వందేభారత్ రైలు శుక్రవారం క్యాన్సిల్ అయిందని దక్షిణ మధ్య రైల్వే ట్వీట్ చేసింది. అయితే ప్రయాణికులు కంగారు పడాల్సిన పనిలేదని.. టికెట్లు బుక్ చేసిన వారికి డబ్బులు వాపస్ చేస్తామని తెలిపింది. ఇదే సమయంలో ఈ ట్రైన్ స్థానంలో 08134A నెంబర్‌తో సికింద్రాబాద్ నుంచి వైజాగ్‍‌కి శుక్రవారం మధ్యాహ్నం 3 గంటలకు ప్రత్యేక రైలు ఏర్పాటు చేసినట్లు తెలిపింది.

 20834 నంబర్ గల రైలు సికింద్రాబాద్ నుంచి మధ్యాహ్నం మూడు గంటలకు విశాఖ బయల్దేరుతుంది. రాత్రి 11 గంటల 30 నిమిషాలకు వైజాగ్ చేరుకుంటుంది. అయితే ట్రైన్ క్యాన్సిల్ కావటం మీద ప్రయాణికులు మండిపడుతున్నారు. పైగా ఈ విషయాన్ని ఆరు గంటల ముందు మాత్రమే చెప్తారా అంటూ ఆగ్రహం వ్యక్తం చేస్తున్నారు. ప్రత్యేక రైలు ఏర్పాటు చేసినప్పటికీ.. వందేభారత్ రైలుతో కనెక్టింగ్ రైలులో వెళ్లేవారి పరిస్థితి ఏంటని ప్రయాణికులు ఫైర్ అవుతున్నారు.

మరోవైపు సికింద్రాబాద్- విశాఖపట్నం మార్గంలో తిరిగే వందేభారత్ రైళ్లలో సాంకేతిక సమస్య తలెత్తడం ఇదే మొదటిసారి కాదు. గతేడాది ఆగస్టులోనూ విశాఖపట్నం నుంచి సికింద్రాబాద్ వెళ్లే వందేభారత్ రైలు రద్దైంది. అప్పుడు కూడా టెక్నికల్ కారణాల ద్వారా రైలును రద్దు చేసిన సౌత్ సెంట్రల్ రైల్వే అధికారులు.. దానికి బదులుగా ప్రత్యామ్నాయ రైలును ఏర్పాటు చేశారు. సికింద్రాబాద్ నుంచి విశాఖ వెళ్లే రైలు మధ్యాహ్నం 3 గంటలకు బయల్దేరుతుంది. అలాగే విశాఖపట్నం నుంచి సికింద్రాబాద్ వచ్చే వందేభారత్ రైలు ఉదయం 5 గంటల 45 నిమిషాలకు బయల్దేరుతుంది.