మార్చి 12న లోక్‌సభ ఎన్నికల షెడ్యూల్.. ఏప్రిల్ 19 న పోలింగ్.. మే 22 న కౌంటింగ్?

దేశంలో సార్వత్రిక ఎన్నికల ఉత్కంఠ కొనసాగుతోంది. కేంద్ర ఎన్నికల సంఘం ఎప్పుడెప్పుడు ఎన్నికల నోటిఫికేషన్ విడుదల చేస్తుందా అని పార్టీలు, రాజకీయ నేతలు, ప్రజలు ఆసక్తిగా ఎదురుచూస్తున్నారు. ఈ క్రమంలోనే సోషల్ మీడియాలో రకరకాల ఊహాగానాలు, వార్తలు వెలువడుతున్నాయి. లోక్‌సభ ఎన్నికల షెడ్యూల్ ఇదే అంటూ విస్తృత ప్రచారాలు సాగుతున్నాయి. తాజాగా మార్చి 12 న షెడ్యూల్ విడుదల.. ఏప్రిల్ 19 న పోలింగ్.. మే 22 న కౌంటింగ్ జరగనుందని వాట్సాప్‌ గ్రూపుల్లో ఒక వార్త విస్తృతంగా చక్కర్లు కొడుతోంది. అయితే ఇది కాస్తా కేంద్ర ఎన్నికల సంఘం దృష్టికి వెళ్లడంతో అధికారులు స్పందించారు. లోక్‌సభ ఎన్నికల షెడ్యూల్‌కు సంబంధించి సోషల్ మీడియాలో వస్తున్న ప్రచారం అంతా అబద్ధమని.. తాము ఎలాంటి ప్రకటన చేయలేదని ఎన్నికల సంఘం అధికారులు స్పష్టం చేశారు. వాట్సాప్ గ్రూప్‌లలో సర్య్కులేట్ అవుతున్న వార్త ఫేక్ అని కొట్టిపారేశారు.

లోక్‌సభ ఎన్నికల షెడ్యూల్ విడుదల చేసేటపుడు మీడియా సమావేశం ఏర్పాటు చేస్తామని.. అప్పుడే ఎన్నికల తేదీలను ప్రకటిస్తామని తేల్చి చెప్పింది. ఇలా సోషల్ మీడియాలో వచ్చే ప్రచారాన్ని నమ్మకూడదని స్పష్టం చేసింది. ఇలాంటి ఫేక్‌ మెసేజ్‌లను ఇతరులకు పంపే ముందు ఒకసారి చెక్ చేసుకోవాలని తెలిపింది. దీనికి సంబంధించి #VerifyBeforeYouAmplify హ్యాష్‌ట్యాగ్‌తో ట్విటర్ వేదికగా కేంద్ర ఎన్నికల సంఘం ఒక పోస్ట్‌ చేసింది.

ఆ వాట్సాప్ గ్రూప్‌లలో వస్తున్న సమాచారం ప్రకారం ఈ నెల 12 వ తేదీ నుంచి ఎన్నికల కోడ్‌ అమలులోకి వస్తుందని ఉంది. దీన్ని ఎన్నికల సంఘం విడుదల చేసినట్లు ఉన్న ఒక ఫేక్ లెటర్‌ను కొంత మంది వాట్సాప్‌ గ్రూపుల్లో విస్తృతంగా షేర్‌ చేస్తున్నారు. ఈ నెల 28 వ తేదీ నుంచి నామినేషన్ల స్వీకరణ.. ఏప్రిల్‌ 19 వ తేదీన పోలింగ్‌, మే 22 వ తేదీన ఓట్ల లెక్కింపు.. మే 30 వ తేదీ నాటికి కొత్త ప్రభుత్వం కొలువుదీరనుందని.. అందులో ఉంది. సాధారణంగా ఎన్నికల షెడ్యూల్‌ ప్రకటించే సమయంలో కేంద్ర ఎన్నికల సంఘం అధికారులు మీడియా సమావేశం ఏర్పాటు చేస్తారు. ఎన్నికల తేదీలు, ఓట్ల లెక్కింపు, ఏయే రాష్ట్రాల్లో ఎప్పుడు ఎన్నికలు, ఎన్ని విడతల్లో పోలింగ్‌, నామినేషన్ల ప్రక్రియ ఎప్పుడు, మొత్తం ఓటర్లు ఎంతమంది, పోలింగ్‌ ఏర్పాట్లు, సిబ్బంది.. వివరిస్తుంటారు.

ఇక త్వరలో జరగనున్న సార్వత్రిక ఎన్నికలకు సంబంధించి కేంద్ర ఎన్నికల సంఘం అన్ని ఏర్పాట్లు చేస్తోంది. ఇప్పటికే అన్ని రాష్ట్రాల్లో పర్యటించిన ఎన్నికల సంఘం అధికారులు.. ఆయా రాష్ట్రాల్లో ఎన్నికల నిర్వహణకు సంబంధించిన ఏర్పాట్లను పరిశీలించారు. ఈ నేపథ్యంలోనే త్వరలోనే ఎన్నికల షెడ్యూల్‌ విడుదల చేయనుంది. ఇప్పటికే దేశంలోని అన్ని పార్టీలు ఎన్నికల ప్రచారానికి తెరలేపాయి. ఈ నేపథ్యంలోనే ఎన్నికల్లో పోటీ చేసే అభ్యర్థులకు సంబంధించిన జాబితాలను విడుదల చేస్తున్నాయి. 195 మందితో బీజేపీ ఫస్ట్ లిస్ట్‌ను ఇప్పటికే విడుదల చేయగా.. కాంగ్రెస్ పార్టీ 39 అభ్యర్థులతో మొదటి జాబితాను రిలీజ్ చేసింది.