పెట్రోల్ ధరల తగ్గింపు అప్పుడే.. కేంద్ర మంత్రి క్లారిటీ ఇచ్చేశారుగా

సామాన్యులకు ఊరట కల్పిస్తూ కేంద్ర ప్రభుత్వం ఎల్‌పీజీ గ్యాస్ సిలిండర్ పై రూ.100 మేర ధర తగ్గించింది. ఈ క్రమంలో మరోసారి పెట్రోల్, డీజిల్ ధరల తగ్గింపు అంశంపై తెరపైకి వచ్చింది. సార్వత్రిక ఎన్నికల షెడ్యూల్ రాకముందే పెట్రోల్ రేట్లు తగ్గించే అవకాశం ఉందని వార్తలు వచ్చాయి. ఈ క్రమంలో కేంద్ర పెట్రోలియ్ శాఖ మంత్రి హర్దీప్ సింగ్ పూరి క్లారిటీ ఇచ్చారు. అంతర్జాతీయ మార్కెట్లో క్రూడ్ ఆయిల్ ధరలు స్థిరంగా కొనసాగే వరకు దేశీయ మార్కెట్లో ధరలు తగ్గించే ఆలోచన లేదన్నారు. అంతర్జాతీయ ముడి చమురు ధరలు, భౌగోళిక పరిస్థితులపై పెట్రోల్ ధరల మార్పు ఆధారపడి ఉంటుందని మరోసారి నొక్కి చెప్పారు. ప్రస్తుతం గ్లోబల్ ఆయిల్ మార్కెట్లో చమురు ధరలు ఒడుదొడుకులకు లోనవుతున్నాయని, దాంతో పాటు దేశీయ ఆయిల్ మార్కెటింగ్ కంపెనీలు రికవరీ స్టేజ్ లో ఉన్నట్లు చెప్పారు.

' అంతర్జాతీయ మార్కెట్లో పరిస్థితులు చక్కబడడంతో పాటు ఆయిల్ ధరల్లో స్థిరత్వం ఏర్పడనప్పుడే దేశీయంగా పెట్రోల్, డీజిల్ ధరల తగ్గింపు అంశాన్ని కేంద్ర ప్రభుత్వం పరిగణనలోకి తీసుకుంటుందని మాత్రమే చెప్పగలను. కానీ, ప్రపంచంలో ఎక్కడో దాడి జరుగుతోందని, ఇన్సూరెన్స్, సరకు రవాణా ధరలు పెరుగుతాయని చెబితే ధరలు తగ్గించడం అనేది ఉండదు. ప్రస్తుతం చమురు కంపెనీలు అండర్ రికవరీలో ఉన్నాయి.' అని స్పష్టం చేశారు కేంద్ర మంత్రి హర్దీప్ సింగ్ పూరీ. అలాగే రష్యా- ఉక్రెయిన్ యుద్ధం, ఎర్ర సముద్రంలో నౌకలపై డ్రోన్ దాడులు జరిగి చమురు ధరలు భారీగా పెరిన సమయంలోనూ దేశీయం ధరలను స్థిరంగా ఉంచినట్లు గుర్తు చేశారు.

మరోవైపు.. మార్చి 8, 2024 రోజున ప్రధాన మంత్రి నరేంద్ర మోదీ కీలక ప్రకటన చేశారు. ఎల్‌పీజీ గ్యాస్ సిలిండర్ ధరలను దేశవ్యాప్తంగా మరో రూ.100 మేర తగ్గిస్తున్నామని తెలిపారు. ఈ ప్రకటనతో దేశంలో 14.2 కిలోల గృహ వినియోగ సిలిండర్ ధర ఢిల్లీలో రూ.803కు దిగివచ్చింది. అలాగే ముంబైలో రూ.802.50గా ఉండగా.. కోల్‌కతాలో రూ.829, చెన్నైలో రూ.818.50గా ఉంది. ఇదే సమయంలో దేశీయ దిగ్గజ సంస్థ గెయిల్ సీఎన్‌జీ ధరలను సైతం తగ్గించింది. కిలోపై రూ.2.50 మేర తగ్గిస్తున్నట్లు ప్రకటించింది. ఈ క్రమంలోనే ఆయిల్ మార్కెటింగ్ కంపెనీలు సైతం పెట్రోల్, డీజిల్ ధరలను తగ్గిస్తాయనే ఊహాగానాలు మొదలయ్యాయి. అయితే, తాజాగా కేంద్ర పెట్రోలియం శాఖా మంత్రి హర్దీప్ సింగ్ పూరీ స్పష్టత ఇచ్చారు.

నవంబర్ 2021, మే 2022 లో ఎక్సైజ్ సుంకం తగ్గింపుతో కేంద్ర ప్రభుత్వం పెట్రోల్, డీజిల్ ధరలను రెండు సార్లు తగ్గించినట్లు కేంద్ర మంత్రి గుర్తు చేశారు. పెట్రోల్‌పై ఎక్సైజ్ సుంకం లీటరుకు రూ.13 తగ్గించారు. రెండు పర్యాయాలు పన్ను తగ్గింపు వల్ల కేంద్రం దాదాపు రూ.2.2 లక్షల కోట్ల మేర ఆదాయం కోల్పోవాల్సి వచ్చిందని తెలిపారు. ఉత్పత్తిని తగ్గించినప్పటికీ ప్రపంచ మార్కెట్‌లో ముడి చమురు ధరలు పెరగలేదన్నారు.