కళ్లముందే భర్త హత్య.. తట్టుకోలేక ఆగిన భార్య గుండె..

అనంతపురం జిల్లాలో పెను విషాదం చోటుచేసుకుంది. కట్టుకున్న వాణ్ని కళ్లెదుటే హత్య చేస్తే.. ఆ బాధను భరించలేక భార్య గుండె ఆగిపోయింది. దగ్గరి బంధువే ఈ దారుణానికి ఒడిగట్టడంతో ఆమె గుండె తట్టుకోలేకపోయింది. భర్త దూరమయ్యాడనే మనస్తాపంతో తుదిశ్వాస విడిచింది. గంటల వ్యవధిలో దంపతులు ఇద్దరూ కన్నుమూయటంతో ఆ ఇంట్లో విషాధ ఛాయలు అలుముకున్నాయి.

అనంతపురం వన్‌టౌన్ పోలీసులు తెలిపిన వివరాల ప్రకారం..అనంతపురం జిల్లా పామిడికి చెందిన మూర్తిరావు గోఖలే.. పదేళ్ల క్రితమే అనంతపురం వచ్చి స్థిరపడ్డారు. అనంతపురంలోని జేఎన్టీయూ ఎదురుగా సొంతిల్లు కట్టుకున్నారు. గత ఆరేళ్లుగా పక్కనే ఉన్న ఓ ప్రైవేట్ కాలేజీలో ప్రిన్సిపల్‌గా పనిచేస్తున్నారు మూర్తిరావు. అయితే ఇటీవలే ఉద్యోగానికి రాజీనామా చేసిన ఆయన కూతురికి పెళ్లిచూపులు చూసే పనిలో ఉన్నారు. అయితే మూర్తిరావుకు సొంతింటితో పాటుగా షాపింగ్ కాంప్లెక్స్ కూడా ఉంది. వీటిని అద్దెకు ఇచ్చేసిన ఆయన టౌన్లో ఓ అపార్ట్‌మెంట్లో ఉంటున్నారు. ఈ నేపథ్యంలో.. ఇంట్లో అద్దెకు ఉన్న వ్యక్తి ఖాళీ చేయడంతో.. తాళాలు తీసుకునేందుకు ఆదివారం రాత్రి భార్యతో కలిసి మూర్తిరావు సొంతింటి వద్దకు వెళ్లారు.

అయితే అప్పటికే అక్కడ ఉన్న మూర్తిరావు మేనల్లుడు ఆదిత్య.. అకస్మాత్తుగా మూర్తిరావుపై కత్తితో దాడి చేశాడు. కత్తితో పొడిచి, గొంతు కోయటంతో మూర్తిరావు అక్కడిక్కడే ప్రాణాలు కోల్పోయారు. ఊహించని విధంగా జరిగిన ఈ పరిణామంతో మూర్తిరావు భార్య శోభ దిగ్ర్భాంతికి గురైంది. షాక్‌లోకి వెళ్లిపోయింది. భర్త చనిపోయాడనే మనస్తాపంతో అర్ధరాత్రి గుండెపోటుతో కన్నుమూసింది. ఊహించని విధంగా.. దంపతులు ఇద్దరూ గంటల వ్యవధిలో ప్రాణాలు కోల్పోవటం అక్కడివారిని, కుటుంబసభ్యులను కలిచివేసింది.

మరోవైపు మూర్తిరావును హత్యచేసిన ఆదిత్య ఆయన మేనల్లుడే. ముందస్తు ప్లాన్ ప్రకారమే ఆదిత్య మూర్తిరావును హత్యచేసినట్లు తెలుస్తోంది. ఉద్యోగం ఇప్పిస్తానని ఆదిత్య వద్ద.. మూర్తిరావు డబ్బులు తీసుకున్నట్లు తెలిసింది. ఈ విషయంలో తలెత్తిన గొడవలే మూర్తిరావు హత్యకు దారితీసినట్లు సమాచారం. మరోవైపు వివాదరహితుడిగా, సౌమ్యుడిగా మూర్తిరావుకు పేరుంది. ఇలాంటి వ్యక్తి ఇకలేడనే వాస్తవాన్ని ఆయన సహచరులు, ఆయన వద్ద చదువు నేర్చుకున్న విద్యార్థులు జీర్ణించుకోలేకపోతున్నారు.