తూచ్.. బెంగళూరులో నీటి కొరత లేనే లేదు.. డీకే శివకుమార్

ఎండా కాలం రాకముందే కర్ణాటక రాజధాని బెంగళూరులో తీవ్ర నీటి కొరత ఏర్పడింది. బోర్లు ఎండిపోవడంతో బెంగళూరు వాసులకు నీటి కష్టాలు తప్పడం లేదు. ట్యాంకర్ల ద్వారా నీటిని సరఫరా చేసినా.. అవి ఏ మూలకు కూడా సరిపోవడం లేదు. దీంతో బెంగళూరు ప్రజలు తమ కష్టాలను సోషల్ మీడియా వేదికగా చెప్పుకుని బోరున విలపిస్తున్నారు. స్నానాలు చేయడం లేదని.. నీటిని చాలా పొదుపుగా వాడుకుంటున్నామని చెబుతున్నారు. ఈ క్రమంలోనే బెంగళూరులో గత 40 ఏళ్లలో ఎన్నడూ ఇలాంటి పరిస్థితులు చూడలేదని స్వయంగా కర్ణాటక డిప్యూటీ సీఎం డీకే శివ కుమార్ తెలిపారు. తన ఇంట్లో ఉన్న బోరు కూడా ఎండిపోయి నీరు రావడం లేదని ఇటీవలె పేర్కొన్నారు. అయితే తాజాగా డీకే శివ కుమార్ మాట మార్చారు. అసలు బెంగళూరులో నీటి కొరత లేనే లేదని కొత్త వాదనను తెరపైకి తీసుకువచ్చారు.

బెంగళూరులో నీటి సంక్షోభం లేదని.. సమస్యను పరిష్కరించేందుకు ప్రత్యామ్నాయ ఏర్పాట్లు చేశామని డీకే శివ కుమార్ తెలిపారు. బెంగళూరులో సుమారు 7 వేల బోర్లు ఎండిపోయాయని వెల్లడించారు. అయితే ఆ సమస్యను ఎదుర్కొనేందుకు తమ ప్రభుత్వం అన్ని ఏర్పాట్లు చేస్తోందని వివరించారు. నీటి వనరులను గుర్తించామని.. వాటర్ ట్యాంకర్ల ద్వారా నీటిని బెంగళూరు నగరవాసులకు అందేలా చూస్తామని స్పష్టం చేశారు.

అయితే ఇప్పుడు ఇలా మాట్లాడుతున్న డీకే శివ కుమార్ గతంలో ఇందుకు భిన్నంగా మాట్లాడారు. వేసవి కాలం కంటే ముందు బెంగళూరులో నీటి కష్టాలు ప్రారంభం అయ్యాయని ఇటీవల చెప్పారు. ఇక తన ఇంట్లో ఉన్న బోరు కూడా ఎండిపోయి నీరు రావడం లేదని వెల్లడించారు. కర్ణాటకలో ఇలాంటి పరిస్థితిని గత 4 దశాబ్దాల్లో ఎప్పుడూ చూడలేదని తెలిపారు. ఇక ప్రస్తుతం బెంగళూరులో నీటి సమస్య రావడానికి ప్రధాన కారణం కేంద్రంలో అధికారంలో ఉన్న బీజేపీ సర్కారేనని మండిపడ్డారు.

బెంగళూరు వాసులకు మంచినీటిని అందించాలనే ఉద్దేశంతో తమ ప్రభుత్వం మేకెదాటు ప్రాజెక్టును ప్రారంభించామని.. అయితే దానికి ఆమోదం తెలపాలని ఎన్నిసార్లు విజ్ఞప్తి చేసినా.. చివరికి పాదయాత్ర చేసినా కేంద్ర ప్రభుత్వం పట్టించుకోలేదని మండిపడ్డారు. ప్రస్తుతం బెంగళూరులో నెలకొన్న నీటి సంక్షోభాన్ని దృష్టిలో ఉంచుకుని అయినా మేకెదాటు ప్రాజెక్టుకు అనుమతులు ఇవ్వాలని కేంద్ర ప్రభుత్వాన్ని కోరారు. గతంలో బెంగళూరులో నీటి సమస్య ఉందని అంగీకరించిన డీకే శివ కుమార్ ప్రస్తుతం అందుకు భిన్నంగా స్పందించడం గమనార్హం. ఇంతకీ బెంగళూరులో నీటి కొరత ఉందా లేదా అని నెటిజన్లు ప్రశ్నిస్తున్నారు.