ప్రేమ పేరుతో పెళ్లి.. ఆ రోజే తాళి తెంచి నడిరోడ్డుపై వదిలేసి, యువతి బలి

చిత్తూరు జిల్లాలో ప్రేమ, పెళ్లి పేరుతో ఓ యువతిని మోసం చేశాడో వ్యక్తి. ప్రేమిస్తున్నాని వెంటపడి.. పెళ్లి చేసుకుంటానని మాయ మాటలు చెప్పి.. ఒప్పుకోకపోతే చంపేస్తానని బెదిరించి.. ఆ తర్వాత తానూ ఆత్మహత్య చేసుకుంటానని ఓ యువకుడు చివరికి యువతిని పెళ్లి చేసుకున్నాడు. ఇంతలో అర్ధరాత్రి తాళి తెంచి నడిరోడ్డుపై వదిలేసిన వ్యవహారం బంగారుపాళ్యం మండలం పాలేరు పంచాయతీ పరిధిలోని మోతకుంటలో జరిగింది. దీంతో బాధితురాలు పోలీసులకు ఫిర్యాదు చేశారు.

పాలేరు పంచాయతీ శేషాపురం గ్రామానికి చెందిన యమున, మోతకుంటకు చెందిన అభిరామ్‌ స్థానికంగా ఉన్న ఓ ప్రైవేటు డిగ్రీ కళాశాలలో చదువుకునేవారు. ఆ సమయంలో యమునను ప్రేమిస్తున్నానని, పెళ్లి చేసుకుంటానని, నిరాకరిస్తే చంపి, తాను ఆత్మహత్య చేసుకుంటానని అభిరామ్‌ వెంటపడి బెదిరించేవాడు. భయపడిన ఆ యువతి.. అతడి ప్రేమ అంగీకరించి సన్నిహితంగా మెలిగింది. ఈ నెల ఆరో 6న తమిళనాడులోని అరుణాచలం దేవస్థానానికి కారులో తీసుకెళ్లి పెళ్లి చేసుకుని వేకువజామున అతడి ఇంటికి వచ్చారు.

తాము పెళ్లి చేసుకున్నామని, తండ్రి శేఖర్‌, తల్లి నాగభూషణమ్మ, అన్నలు క్రిష్ణ, అనిల్‌కు చెప్పగా వారు అంగీకరించలేదు. తమకు ఇష్టం లేదంటూ యమున మెడలోని తాళి తెంచి, చంపుతామని బెదిరించి, ఆమె చేతిలోని మొబైల్, రెండున్నర గ్రాముల బంగారు ఉంగరాన్ని లాక్కుని దాడి చేశారు. అనంతరం వారు ఆమెను బైక్‌పై ఎక్కించుకుని శేషాపురం సర్వీసు రోడ్డులో వదిలేశారు. ఆపై ఆమె ఈ నెల 7న మదనపల్లెలోని స్నేహితురాలు రెడ్డిరాణి దగ్గరకు చేరుకుని భర్త అభిరామ్‌కు ఫోన్‌ చేసి న్యాయం చేయాలని కోరగా.. కొద్దికాలం అక్కడే ఉండాలని, త్వరలోనే ఇంటికి తీసుకెళ్తానని నమ్మబలికాడు. అప్పటి నుంచి అతడు రాకపోగా, సోమవారం ఫోన్‌ చేస్తే కట్‌ చేశాడు. దీంతో మోసపోయానని గ్రహించి బంగారుపాళ్యం పోలీసులకు ఫిర్యాదు చేయగా.. కేసు నమోదు దర్యాప్తు చేస్తున్నారు.