తండ్రిని చంపించిన కూతురు.. అలా వద్దన్నందుకు, కారణం తెలిసి

అన్నమయ్య జిల్లాలో దారుణం జరిగింది. ప్రియుడితో కలిసి కూతురు తండ్రిని హత్య చేయించడం కలకలంరేపింది. ములకలచెరువు మండలం సెంట్రల్‌ స్కూల్‌ పంచాయతీ పెద్దమొరవపల్లికి చెందిన దయ్యాల రాజారెడ్డి ఈ నెల 12వతేదీ తెల్లవారుజామున దారుణహత్యకు గురయ్యాడు. రాజారెడ్డి అల్లుడు బాలాజీ ఫిర్యాదు మేరకు కేసు నమోదు చేసిన పోలీసులు దర్యాప్తు చేశారు.. ఈ క్రమంలో కూతురే ప్రియుడితో కలిసి హతమార్పించినట్లు తేలింది.

రాజారెడ్డి పెద్ద కుమార్తె బ్రాహ్మణికి.. తంబళ్లపల్లె మండలం, గుండ్లపల్లి పంచాయతీ, అనగలవారిపల్లికి చెందిన మల్లికార్జున కుమారుడు అరుణ్‌కుమార్‌‌తో వివాహేతర సంబంధం ఉంది. దీంతో ఇంట్లో ఉన్న నగలు, మదనపల్లెలో ఉన్న స్థలం తాకట్టు పెట్టి ఆ డబ్బుల్ని ప్రియుడైన అరుణ్‌కుమార్‌కు ఇచ్చింది. విషయం తెలుసుకున్న రాజారెడ్డి బ్రాహ్మణిని మందలించడంతో పాటు మొబైల్ లాక్కున్నాడు. విషయం తెలుసుకున్న ప్రియుడు అరుణ్‌కుమార్‌ బ్రాహ్మణికి మరో మొబైల్ ఎవరికీ తెలియకుండా ఇచ్చాడు. బ్రాహ్మణి, అరుణ్‌కుమార్‌ రాజారెడ్డిపై కక్ష పెంచుకొని హత్యకు ప్లాన్ చేశారు.

రాజారెడ్డి తుమ్మణంగుట్ట రైల్వేస్టేషన్‌ సమీపంలో ఉన్న కోళ్లఫారం నుంచి కోళ్లను లోడ్‌ చేసిన పంపించేశారు. తరువాత రాజారెడ్డి అలసిపోయి కోళ్లఫారంలో పడుకోవడంతో బ్రాహ్మణి ఛాతిలో నొప్పి వస్తోందని టానిక్ తాగాలని భర్త బాలాజీని పిలుచుకుని ఇంటకి వెళ్లింది. మరోవైపు ఇదే విషయాన్ని ప్రియుడు అరుణ్‌కుమార్‌కు చెప్పింది. ఇదే మంచి అవకాశమని.. వెళ్లి తన తండ్రిని చంపాలని చెప్పింది. సమీపంలోనే ఉన్న అరుణ్‌కుమార్‌ పక్కనే ఉన్న గుణపంతో రాజారెడ్డి తలపై కొట్టి చంపాడు. రాజారెడ్డిని చంపిన తరువాత అరుణ్‌కుమార్‌ ప్రియురాలు బ్రాహ్మణికి ఫోన్‌ చేసి చంపేశానని సమాచారం ఇచ్చి అక్కడి నుంచి పారిపోయాడు.

నిందితుడి కోసం గాలించిన పోలీసులు సోమవారం బత్తలాపురం రైల్వే వంతెన సమీపంలో అరుణ్‌కుమార్ ఉన్నట్లు సమాచారం రావడంతో అరెస్టు చేసి, అనంతరం పెద్దమొరవపల్లిలో ఉన్న బ్రాహ్మణిని అరెస్టు చేశామని పోలీసులు తెలిపారు. అల్లుడి ఫిర్యాదుతో ఈ హత్య వ్యవహారం బయటపడింది. ప్రియుడి మోజులో పడి బ్రాహ్మణి కన్న తండ్రిని కూడా దారుణంగా హత్య చేయించడం కలకలంరేపింది.