ఏపీలో ఎన్నికల వేళ పార్టీలకు కొత్త టెన్షన్.. ఇలాగైతే కష్టం, అమ్మో తట్టుకోలేమంటున్న అభ్యర్థులు

ఏపీ ఎన్నికలకు ముహూర్తం ఫిక్స్ అయ్యింది. మే 13న పోలింగ్.. జూన్ 4 కౌంటింగ్ జరగనుంది. అంటే దాదాపుగా రెండు నెలల వరకు సమయం ఉంది.. దీంతో ప్రధాన పార్టీలకు కొత్త టెన్షన్ మొదలైంది. ఇన్ని రోజులు ప్రచారం సహా ఇతర ఖర్చుల సంగతేంటనే చర్చ జరుగుతోంది. అప్పటి వరకు ఎలా నెట్టుకురావాలనే ఆందోళన అందరిలో మొదలైంది. అభ్యర్థులు ఫైనల్ కావడంతో ఇప్పటికే ప్రచారాలు మొదలుపెట్టారు.. నియోజకవర్గాల్లో ప్రజల్లోకి వెళ్లే ప్రయత్నాలు చేస్తున్నారు.

ఒకప్పటితో పోలిస్తే ప్రస్తుతం ఎన్నికల వ్యయం భరించలేనంతగా అభ్యర్థులకు పెద్ద భారంగా మారిందనే చెప్పాలి. పార్టీల అధిష్ఠానం కొంత మేర సమకూరుస్తున్నా.. స్థానిక నేతలకు సర్దుబాటు, శ్రేణులు, ఇతర అంశాలకు పోటీదారులు అదనంగా ఖర్చు పెట్టాల్సిన పరిస్థితి ఉంది. గతంతో పోలిస్తే.. ఇప్పుడు జరుగుతున్న ఎన్నికల్లో అభ్యర్థుల జేబులు ఖాళీ అవుతున్నాయి. గత ఎన్నికల్లా.. పోలింగ్ త్వరగా ముగుస్తుందని.. తొలి విడతలోనే ప్రక్రియ పూర్తవుతుందని అభావించారు.. కానీ పరిస్థితి రివర్స్ అయ్యింది.

కానీ అందరి అంచనాలను తలకిందులు చేస్తూ ఎన్నికల సంఘం మే 13 పోలింగ్‌‌కు ముహూర్తం ఫిక్స్ చేయడంతో.. రాజకీయ పార్టీలు, అభ్యర్థులు కాస్త ఢీలాపడ్డారనే చెప్పాలి. దాదాపుగా రెండు నెలల పాటు సమయం ఉండటంతో ఆలోచనలో పడ్డారు. ఇంకా పోలింగ్‌కు 50 రోజులకుపైగా వేచి ఉండాల్సిన పరిస్థితుల్లో కొత్త టెన్షన్ మొదలైంది. అధికార పార్టీల నేతలు కొందరు గత నెలలోనే తాయిలాలు మొదలు పెట్టారు.. ఇప్పుడు మరో రెండు నెలలు వేచి ఉండాల్సిన పరిస్థితి. దీంతో మే 13 వరకు బండిని ఎలా నడపాలని టెన్షన్ పడుతున్నారట.

ఇటు టీడీపీ, జనసేన, బీజేపీ అభ్యర్థుల పరిస్థితి కూడా అలాగే ఉంది. వారిది కూడా అధికార పార్టీ అభ్యర్థుల పరిస్థితే. అయితే ఒక విషయంలో మాత్రం ఈ కూటమి సంతోషంగా ఉందంటున్నారు. మూడు పార్టీలు కలిసి పోటీ చేస్తున్న సమయంలో అందరి మధ్య సమన్వయం అంత సులభం కాదు.. పోలింగ్‌కు రెండు నెలల సమయం ఉండటంతో ఈలోపు నేతలందూ ఒకే తాటిపైకి వస్తే గెలుపు సులభం అవుతుందనే వాదనలు వినిపిస్తున్నాయి. ఎన్నికల గడువు ఎక్కువగా ఉండటంతో టీడీపీ, జనసేన, బీజేపీ కూటమి మధ్య సమన్వయానికి తగినంత సమయం దొరికిందని ఆయా పార్టీల నేతలు అభిప్రాయపడుతున్నారు.

కొంతకాలంగా టీడీపీ, జనసేన నేతలు కలసి పని చేస్తున్నప్పటికీ.. తాజాగా వారికి బీజేపీ కూడా కూటమిలో చేరడంతో మూడు పార్టీలు ప్రజల్లోకి వెళ్లేందుకు అవసరమైన కసరత్తు ఎలా చేయాలనే దానిపై సమీక్షించుకునేందుకు వీలు కుదిరింది అంటున్నారు. ఇంటింటికీ మరోసారి వెళ్లేందుకు, మేనిఫెస్టో వివరించడంతో పాటు అధికార పార్టీ వైఫల్యాలను వివరించేందుకు ఈ సమయాన్ని వినియోగించుకోవాలని కూటమి నేతలు భావిస్తున్నారట.

మరోవైపు పోలీసులకు కూడా ఈ షెడ్యూల్ కత్తి మీద సాములా మారింది. శాంతి భద్రతలతో పాటుగా డబ్బులు, మద్యానికి అడ్డుకట్ట వేయాలంటే నిరంతర నిఘా అవసరం.. రెండు నెలల పాటూ అన్ని అంశాలపై ఫోకస్ పెట్టడం అంత సులభం కాదంటున్నారు. అంతేకాదు ఇంటర్ పరీక్షలు పూర్తి కాగా.. పేపర్ వాల్యూషన్ చేయాల్సి ఉంటుంది.. ఇటు ఎన్నికల విధులు కూడా ఉంటాయి. ఇది కూడా కొంత తలనొప్పి వ్యవహారమే అంటున్నారు. మొత్తానికి పోలింగ్‌కు మే నెల ముహూర్తం ఫిక్స్ చేయడంతో అందరికీ కాస్త ఇబ్బంది తప్పదంటున్నారు.