రెడీమెడ్ బట్టల షాపుల్లో గుట్టుగా.. పోలీసుల తనిఖీలు, అక్కడ ఏం దొరికాయో తెలిస్తే

విశాఖలో నిషేధిత ఈ-సిగరెట్లను పోలీసులు భారీగా పట్టుకున్నారు. రెండు షాపుల్లో విశాఖ త్రీ టౌన్‌, టాస్క్‌ఫోర్స్‌ పోలీసులు దాడి చేశారు. మొత్తం 700కుపైగా ఈ-సిగరెట్లను స్వాధీనం చేసుకుని, షాపుల యజమానులపై కేసులు నమోదు చేసి అరెస్టు చేశారు. విశాఖలో గంజాయి వినియోగానికి అడ్డుకట్ట వేయడంలో భాగంగా టాస్క్‌ఫోర్స్‌ పోలీసులు ఇటీవల కొన్ని ఇంజినీరింగ్‌ కాలేజీలు, హాస్టళ్లలో తనిఖీలు నిర్వహించారు. ఈ క్రమంలో ఇద్దరు విద్యార్థుల వద్ద ఈ-సిగరెట్‌లు లభ్యమయ్యాయి. వారిని ప్రశ్నించగా.. సిరిపురం కూడలి సమీపంలోని దసపల్లాహిల్స్‌ వద్ద దేజావు రెడీమేడ్‌ షాపులో, సర్క్యూట్‌హౌస్‌ ఎదురుగా ఉన్న మీరా కలెక్షన్స్‌లో కొనుగోలు చేసినట్టు చెప్పాడు.

వెంటనే త్రీ టౌన్‌ పోలీసుల సహకారంతో టాస్క్‌ఫోర్స్‌ పోలీసులు ఈ నెల 18న ఆయా షాపుల్లో నిర్వహించారు. మీరా కలెక్షన్స్‌లో పలు బ్రాండ్‌లకు చెందిన 656 ఈ-సిగరెట్‌లు, దేజావు రెడీమేడ్‌ క్లాత్‌ షాప్‌లో మూడు వేర్వేరు బ్రాండ్‌లకు చెందిన 87 ఈ-సిగరెట్‌లు లభ్యమయ్యాయి. ఒక్కోటి రూ.3 వేల నుంచి రూ.5 వేల వరకు ఉంటాయని, సీజ్‌ చేసిన ఈ-సిగరెట్‌ల విలువ రూ.25 లక్షలు ఉంటుందని జాయింట్‌ సీపీ కె ఫకీరప్ప తెలిపారు. ఈ-సిగరెట్‌లో పొగాకు, నికోటిన్‌తోపాటు ఆరోగ్యానికి హాని కలిగించే రసాయనాలు ఉంటాయన్నారు. వీటిని రీఛార్జ్‌ చేసుకుని బ్యాటరీ సాయంతో వినియోగిస్తారన్నారు. వీటిని వినియోగించే వారితోపాటు ఈ-సిగరెట్‌ నుంచి వదిలే పొగను పీల్చేవారికి కూడా ఊపిరితిత్తులు వేగంగా దెబ్బతిని కాన్సర్‌కు దారితీస్తాయని తెలిపారు. ముంబై నుంచి వీటిని తెచ్చినట్లు గుర్తించగా.. ప్రధాన నిందితుడు ఆసుపత్రిలో అత్యవసర చికిత్స పొందుతున్నందున నోటీసులు ఇచ్చి వచ్చారు పోలీసులు.