63 ఏళ్ల పూజారితో 12 ఏళ్ల బాలికకు వివాహం.. 6 ఏళ్లకే భార్యగా ఎంపిక

బాల్య వివాహాలు చట్టరీత్యా నేరం. ఇందుకోసం ప్రభుత్వాలు చట్టాలు కూడా తీసుకువచ్చాయి. మహిళలకు కనీస వివాహ వయస్సు కూడా నిర్ధారించారు. అయితే ఇలాంటి చట్టాలు మన దేశంలోనే కాకుండా చాలా దేశాల్లో అమల్లోకి వచ్చాయి. బాల్య వివాహాలను నిషేధించేందుకు ఆయా ప్రభుత్వాలు అనేక రకాల చర్యలు తీసుకుంటున్నాయి. ప్రజలకు కూడా బాల్య వివాహాలు చేయవద్దని అనేక అవగాహన కార్యక్రమాలను అధికారులు నిర్వహిస్తూ ఉంటారు. అయితే ఎన్ని చేసినా.. కొందరు మాత్రం ఇప్పటికీ బాల్య వివాహాలు జరిపిస్తూనే ఉన్నారు. ఈ క్రమంలోనే అభం శుభం తెలియని ఓ 12 ఏళ్ల బాలికను 63 ఏళ్ల పూజారి పెళ్లి చేసుకోవడం ప్రస్తుతం సంచలనంగా మారింది. అయితే బాలిక 6 ఏళ్ల వయసు ఉన్నప్పుడే.. ఆ వృద్ధ పూజారికి భార్యగా ఆమెను ఎంపిక చేయడం గమనార్హం.

ఈ సంఘటన పశ్చిమ ఆఫ్రికాలోని ఘనా దేశంలో చోటు చేసుకుంది. 63 ఏళ్ల పూజారి అయిన నూమో బొర్కెటే లావే ట్సురూ XXXIII.. 12 ఏళ్ల బాలిక పెళ్లి చేసుకున్న సంఘటనకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి. ఘనాలో మహిళల కనీస వివాహ వయసు 18 ఏళ్లు కాగా.. చట్టాన్ని ఉల్లంఘించి బహిరంగంగా ఈ వివాహం జరగడం గమనార్హం. ఈ పెళ్లి చట్టానికి విరుద్ధమైనప్పటికీ.. స్థానిక సమాజం మాత్రమే కాకుండా నాయకులు కూడా మద్దతు తెలపడం సంచలనంగా మారింది. ఆ బాలిక వయసు ఆరు సంవత్సరాలు ఉన్నప్పుడే.. నూమో బొర్కెటే లావే ట్సురూ XXXIII కు భార్య అని ఎంపిక చేసినట్లు స్థానికులు వెల్లడించారు.

ఘనా దేశంలోని క్రోవోర్‌ నగరంలోని నంగువాలో నిర్వహించిన ఈ పెళ్లి వేడుక వీడియో తెగ వైరల్ అవుతోంది. అయితే స్థానిక ఆచారం ప్రకారం బాలికను వృద్ధ పూజారి పెళ్లి చేసుకున్నాడు. అయితే ఈ పెళ్లిపై సోషల్ మీడియాలో, స్థానికంగా తీవ్ర విమర్శలు వెల్లువెత్తాయి. ఈ వివాహం చట్టవిరుద్ధమని విమర్శిస్తున్నారు. అయితే ఇది తమ సంప్రదాయం అని.. అందులోభాగంగానే పెళ్లి చేశారని.. స్థానిక ఆచార వ్యవహారాలను సమర్థిస్తూ కొందరు నేతలు పెళ్లిపై వస్తున్న విమర్శలను తిప్పికొట్టారు.

 సోషల్ మీడియాలో వైరల్ అవుతున్న ఈ బాల్య వివాహానికి సంబంధించిన వీడియో క్లిప్‌లో ఆ 12 ఏళ్ల బాలికను ఆమె పక్కన ఉన్న మహిళలు స్థానికంగా మాట్లాడే గా భాషలో ఆట పట్టించడం కనిపించింది. ఈ వీడియోపై సోషల్ మీడియాలో నెటిజన్లతోపాటు ఘనా దేశవాసుల నుంచి కూడా పెద్ద ఎత్తున విమర్శలు వెల్లువెత్తాయి. అధికారులు స్పందించి ఆ బాల్య వివాహాన్ని రద్దు చేసి వృద్ధ పూజారిపై కేసు పెట్టాలని డిమాండ్లు చేస్తున్నారు. దీంతో రంగంలోకి దిగిన ఘనా పోలీసులు.. ఆ బాలికను గుర్తించి.. ఆమె తల్లిని కూడా తమ రక్షణలో ఉంచుకున్నారు. ఘనాలో చాలా మంది బాలికలు.. 18 ఏళ్లు నిండకుండానే బాల్య వివాహాలు చేసుకుంటున్నట్లు గర్ల్స్ నాట్ బ్రైడ్స్ అనే ఒక ఎన్జీవో వెల్లడించింది.