భూమి కింద మహా సముద్రం.. ప్రపంచంలోని 7 సముద్రాల కంటే 3 రెట్లు ఎక్కువ నీరు

శాస్త్రవేత్తలు నిరంతరం రకరకాల అధ్యయనాలు చేస్తూ ఉంటారు. ఈ క్రమంలోనే ఎన్నో కొత్త కొత్త విషయాలను కనుగొంటూ ఉంటారు. అయితే ఒక అంశాన్ని పరిశోధించేందుకు పరిశోధనలు చేస్తే.. వేరే కొత్త విషయాలు వెలుగులోకి వస్తూ ఉంటాయి. తాజాగా అలాంటిదే ఒక సంఘటన జరిగింది. భూమి కింద భారీ మహా సముద్రాన్ని కనుగొన్నారు. అది ప్రస్తుతం ప్రపంచంలో ఉన్న ఏడు మహా సముద్రాల కంటే చాలా పెద్దని శాస్త్రవేత్తలు పేర్కొన్నారు. ఈ 7 సముద్రాలలో ఉన్న నీటి కంటే 3 రెట్లు అధిక నీరు ఈ మహాసముద్రంలో ఉందని గుర్తించారు. ఆ మహాసముద్రానికి గిగాంటిక్ మహాసముద్రం అని పేరు పెట్టారు. దీనికి సంబంధించి సోషల్ మీడియాలో వార్తలు తెగ వైరల్ అవుతున్నాయి.

భూమి ఉపరితలానికి సుమారు 700 కిలోమీటర్ల అడుగున ఈ భారీ గిగాంటిక్ మహాసముద్రం ఉందని తాజాగా నిర్వహించిన రీసెర్చ్‌లో సైంటిస్ట్‌లు గుర్తించారు. రింగ్వుడైట్ అనే రాయి లోపల భారీగా నీరు ఉందని పరిశోధకులు కనుగొన్నారు. ఈ నీరు ఎంత ఉందంటే.. మొత్తం భూమిపై ఉన్న 7 మహాసముద్రాల్లో ఉన్ననీటి కంటే 3 రెట్లు ఎక్కువగా అందులో ఉందని తెలిపారు. ఈ మహాసముద్రానికి సంబంధించిన వివరాలను "డీహైడ్రేషన్ మెల్టింగ్ ఎట్ ద టాప్ ఆఫ్ ద లోవర్ మ్యాంటిల్" అనే పేరుతో విడుదల చేసిన ఓ పరిశోధన నివేదికలో సైంటిస్ట్‌లు వెల్లడించారు. ఈ నివేదికలో రింగ్వుడైట్ రాయికి ఉన్న ప్రత్యేక లక్షణాలను వారు వివరించారు.

 రింగ్వుడైట్ రాయి అనేది ఒక స్పాంజిలాగా ఉండి.. నీటిని పీల్చుకుంటుందని తమ అధ్యయనంలో తేలినట్లు చెప్పారు. ఇక ఈ రింగ్వుడైట్ రాయి నిర్మాణం ప్రత్యేకంగా ఉన్నట్లు గుర్తించారు. ఈ రాయి హైడ్రోజన్‌ను ఆకర్షించడం ద్వారా నీటిని నిల్వ ఉంచుకుంటోందని ఈ రీసెర్చ్‌ టీంలో కీలకపాత్ర వహించిన జియోఫిసిసిస్ట్ స్టీవ్ జాకబ్ సన్ వెల్లడించారు. భూమి ఉపరితలంపై నీరు ఏర్పడటానికి గల ఆధారమే ఈ గిగాంటిక్ సముద్రమేనని ఆయన తెలిపారు. భూమిపైకి భారీ స్థాయిలో నీరు ఎలా వచ్చిందే ఈ గిగాంటిక్ మహాసముద్రం తెలియజేస్తుందని పేర్కొన్నారు. భూమి పొరల్లో దాగి ఉన్న ఈ నీటి జాడ కోసం శాస్ర్తవేత్తలంతా దశాబ్దాలుగా ఎదురుచూస్తున్నారని ఆయన వివరించారు.

భూకంపాలపై పరిశోధనలు జరిపిన సైంటిస్ట్‌లు భూకంపాలను కొలిచే సీస్మోమీటర్లు భూమి అడుగున షాక్ వేవ్స్‌ను గుర్తించడంతో భూమి అడుగున నీటి జాడను కనుగొన్నారు. భూమి మ్యాంటిల్ మార్పిడి జోన్‌లోని ఖనిజాల్లో భారీ స్థాయిలో నీటి నిల్వ సామర్థ్యం ఉందంటే దాని అర్థం భారీ నీటి జలాశయం ఉందని గుర్తించారు. మ్యాంటిల్ భాగంలో నిట్టనిలువునా పారే నీరు ఎండిపోవడానికి ఇది దారితీయవచ్చని సైంటిస్ట్‌లు చెబుతున్నారు. భూమి లోపల క్రస్ట్, మ్యాంటిల్, కోర్ అనే 3 పొరలుగా ఉంటుంది.