ఆవు పాలలో బర్డ్ ఫ్లూ గుర్తింపు.. మరో మహమ్మారిగా మారుతుందా

అమెరికాలోని పలు రాష్ట్రాల్లో ఆవు పాలలో బర్డ్ ఫ్లూ వైరస్‌ అధిక సాంద్రతలో గుర్తించడంతో ఇది మానవులకు సోకుతుందా? అనే ప్రశ్నలు ఉత్పన్నమవుతున్నాయి. కానీ, నిపుణుల మాత్రం ఈ ప్రభావం చాలా స్వల్పంగా ఉంటుందని అంటున్నారు. ఆవు పాలలో గుర్తించిన హెచ్‌5ఎన్1 వైరస్‌తో మానవుల బర్డ్ ఫ్లూ ముప్పు లేదని పేర్కొన్నారు. అమెరికాలోని ఆవు పాలలో హెచ్5ఎన్1 వైరస్ అధిక సాంద్రతల్లో ఉండడం పట్ల ప్రపంచ ఆరోగ్య సంస్థ (డబ్ల్యూహెచ్ఓ) ఆందోళన వ్యక్తం చేసింది. అయితే, పచ్చి పాలలో మాత్రమే ఈ వైరస్‌ ఉందనీ, పాలను వేడి చేసినప్పుడు నాశనమవుతోందని నిపుణులు తెలిపారు. అయినప్పటికీ అప్రమత్తంగా ఉండాలని డబ్ల్యూహెచ్ఓ హెచ్చరించింది.

అత్యంత వ్యాధికారక ఏవియన్ ఇన్‌ఫ్ల్యూయోంజా అమెరికావ్యాప్తంగా పాడి పశువులకు వ్యాపించిందని, ఈ వైరస్ బారినపడ్డ ఓ వ్యక్తిలో తేలికపాటి లక్షణాలు ఉన్నాయని అధికారులు తెలిపారు. హెచ్5ఎన్1 రకం వైరస్ కారణంగా ప్రస్తుతం మిలియన్ల సంఖ్యలో కోళ్లు మృత్యువాతపడ్డాయి. ఆవులకు ఈ వైరస్ సోకినా వాటిపై ప్రభావం అంత తీవ్రంగా లేదు. US ఫుడ్ అండ్ డ్రగ్ అడ్మినిస్ట్రేషన్ జాతీయ సర్వే సమయంలో ఆవు పాలల్లో వైరస్‌ను కనుగొన్నట్లు తెలిపింది. వ్యాధికారక జన్యువు అవశేషాలను గుర్తించే క్వాంటిటేటివ్ పాలిమరేస్ చైన్ రియాక్షన్ పరీక్ష ద్వారా నమూనాలను పరీక్షించారు. పాశ్చరైజేషన్ ప్రక్రియ ద్వారా వైరస్ నిష్క్రియాత్మకంగా మారినట్టు గుర్తించారు.

టెక్సాస్, కెన్సాస్, మిచిగాన్, న్యూ మెక్సికో, ఇడాహో, ఓహియో, నార్త్ కరోలినా , సౌత్ డకోటాలో ఆవులు బర్డ్ ఫ్లూ వైరస్‌ బారినట్టు వెల్లడయ్యింది. టెక్సాస్‌లో ఈ వైరస్‌ సోకిన తొలి ఆవును గుర్తించినట్టు డబ్ల్యూహెచ్ఓ గ్లోబల్ ఇన్‌ఫ్లూయోంజా ప్రోగ్రామ్ హెడ్ డాక్టర్ వెన్కింగ్ జాంగ్ తెలిపారు. ఇది పక్షుల ద్వారా ఆవుకు.. ఆ ఆవు నుంచి ఇతర జంతువులకు సోకిందన్నారు.

బర్డ్ ఫ్లూ కారక హెచ్5ఎన్1 వైరస్‌ను 1996 ఆరంభంలో మొదటిసారి గుర్తించారు ఆ తరువాత ఇది వేగంగా వ్యాప్తి చెందుతూ 2020 నాటికి తీవ్రమైంది. బర్డ్ ఫ్లూ కారణంగా ప్రపంచవ్యాప్తంగా మిలియన్ల కొద్దీ అడవి పక్షులు, పౌల్ట్రీలు మరణించాయి. అంతేకాదు ఈ వైరస్ మానవులు, పిల్లులు, ఎలుగుబంట్లు, నక్కలు, మింక్ ,పెంగ్విన్‌లతో సహా వివిధ క్షీరదాలకు సోకింది. గత నెలలో, ఆవులు , మేకలుకూడా ఈ జాబితాలో చేరిపోయాయి. ఇప్పటివరకూ వీటికి ఈ వైరస్‌ సోకదని భావించిన నిపుణులను ఇది ఆశ్చర్యానికి గురిచేసింది.

అమెరికాలో కొత్తరకం హెచ్5ఎన్1 వైరస్ స్థానిక వైరస్‌లతో కలిసిపోయిందని, ఆవు పొదుగులో చాలా వేగంగా వ్యాపించే సామర్థ్యాన్ని కలిగి ఉందని పారిస్‌లోని లూయీ పాశ్చర్ ఇన్‌స్టిట్యూట్‌కు చెందిన ఎన్విరాన్‌మెంట్ అండ్ ఇన్‌ఫెక్షన్ రిస్క్ విభాగం డైరెక్టర్ జీన్ క్లైడే మనుగుర్రే అన్నారు. ప్రస్తుత వేవ్‌లో లక్షలాది కోళ్ల మరణానికి కారణమైనా.. ఆవుల్లో అంత తీవ్రత లేదని చెప్పారు.

బర్డ్ ఫ్లూ మానవులకు సోకినప్పటికీ విస్తృతంగా వ్యాప్తిచెందే అవకాశాలు చాలా తక్కువగా ఉన్నాయని ఇప్పటి వరకు జరిపిన అధ్యయనాల ఆధారంగా చాలా మంది నిపుణులు అభిప్రాయపడుతున్నారు. ఆవు పాలలో వైరస్ జాడలు కనిపించడం ఆందోళన కలిగిస్తుందా? లేదా అనేది పక్కనబెడితే.. ఈ వైరస్ మరొక జంతువుకు ప్రమాదం కలిగించే అవకాశం ఉందనేది ఆందోళన కలిగించే అంశం’ అని ఆగ్నేయ ఫ్రాన్స్‌లోని లియోన్ ఆసుపత్రిలో వైరాలజిస్ట్ బ్రూనో లినా అన్నారు. ‘జంతువులు లేదా మానవులలో యాదృచ్ఛిక కేసుల ప్రమాదం ఉంది. కానీ గత మూడు లేదా నాలుగు నెలలుగా మహమ్మారికి దారితీసే వైరస్ మ్యుటేషన్‌ను మేము చూడటం లేదు’ అని ఆయన పేర్కొన్నారు. ఇక, బర్డ్‌ఫ్లూ బారినపడిన టెక్సాస్‌ డెయిరీలో పనిచేసిన వ్యక్తి సాధారణ వైద్యంతో కోలుకున్నాడని, అతడిలో స్వల్ప లక్షణాలే ఉన్నాయని అధికారులు వెల్లడించారు.