అవసరమైతే అణు బాంబులు తప్పవు. ఇజ్రాయేల్‌కు ఇరాన్ వార్నింగ్

ఇజ్రాయేల్‌తో ఉద్రిక్తతలు కొనసాగుతోన్న వేళ.. అణ్వాయుధాలపై ఇరాన్ కీలక వ్యాఖ్యలు చేసింది. అణు బాంబులను తయారుచేయాలనే ఉద్దేశం తమకు లేదని, కానీ మా దేశం ఉనికికి ముప్పు ఏర్పడితే నిర్ణయాన్ని మార్చుకోవడం తప్ప వేరే మార్గం లేదని ఇరాన్ సుప్రీమ్ అయతుల్లా అలీ ఖమేనీ సలహాదారుడు కమల్ ఖర్రాజీ అన్నారు. ఇరాన్ అణు ఆశయాలపై ప్రత్యేకించి ఇజ్రాయేల్‌తో ఉద్రిక్తతలు పెరుగుతున్న నేపథ్యంలో కమల్ ఖర్రాజీ వ్యాఖ్యలకు ప్రాధాన్యత ఏర్పడింది. ‘అణుబాంబును తయారుచేయాలనే ఉద్దేశం మాకు లేదు.. అయితే ఇరాన్ ఉనికికి ముప్పు ఏర్పడితే మా సైనిక విధానం మార్చడం తప్ప వేరే మార్గం ఉండదు’ అని ఖర్రాజీ స్పష్టం చేశారు.

ఏప్రిల్‌లో సిరియాలోని తమ రాయబార కార్యాలయంపై జరిగిన బాంబు దాడికి ఇజ్రాయేల్‌ కారణమని ఆరోపిస్తూ.. టెల్ అవీవ్‌పై ఇరాన్ వందలాది ఇరాన్ క్షిపణులు, డ్రోన్లను ప్రయోగించింది. దీంతో ఇరు దేశాల మధ్య ఉద్రిక్తతలు తీవ్రస్థాయికి చేరుకున్నాయి. అణ్వాయుధాల అభివృద్ధికి వ్యతిరేకంగా సుప్రీం అయతుల్లా ఖమేనీ గతంలో ఫత్వా జారీచేసినప్పటికీ ప్రత్యేకించి పాశ్చాత్య దేశాల నుంచి బాహ్య ఒత్తిళ్ల నేపథ్యంలో అణ్వాయుధాల తయారీని పునరుద్దరించే అవకాశం ఉందని 2021లో అప్పటి ఇంటెలిజెన్స్ విభాగం మంత్రి నర్మగర్భ ప్రకటన చేశారు. ఇరాన్ అణు కార్యక్రమం శాంతియుత ప్రయోజనాల కోసం ప్రత్యేకించి ఉపగ్రహాలు కోసమే రూపొందించింది.

‘తమ అణు స్థావరాలపై ఇజ్రాయేల్ దాడులకు దిగితే.. మా నిర్ణయంలో మార్పులు తప్పవు’ అని ఖర్రాజీ అన్నారు. ఇదిలా ఉండగా.. ఇంటర్నేషనల్ అటామిక్ ఎనర్జీ ఏజెన్సీ, ఇరాన్ సమన్వయ ప్రయత్నాలు అంతగా ఫలించలేదు. ఇరాన్, ఐఏఈఏ ప్రతినిధుల మధ్య చర్చలు సానుకూలంగా జరిగినప్పటికీ పురోగతి అస్పష్టంగానే ఉంది. ఈ విషయంలో ఇరాన్‌పై అంతర్జాతీయ అణుశక్తి సంఘం చీఫ్ రాఫెల్ గ్రోస్సీ అసహనం వ్యక్తం చేశారు. ఇరాన్ అణు కార్యకలాపాలకు సంబంధించి ఆందోళనలను పరిష్కరించేందుకు ఖచ్చితమైన చర్యల చేపట్టాల్సిన అవసరం ఉందని అన్నారు.