‘మావాడైనా పరాయివాడే’.. నాగబాబు పంచులు అల్లు అర్జున్‌ను ఉద్దేశించేనా?

"మాతో ఉంటూ ప్రత్యర్థులకు పనిచేసేవాడు మావాడైనా పరాయివాడే.. మాతో నిలబడేవాడు పరాయివాడైనా మావాడే" అంటూ కొణిదెల నాగబాబు చేసిన ట్వీట్ ఇప్పుడు నెట్టింట పెద్దచర్చకు దారితీసింది. నాగబాబు ఎవరిని ఉద్దేశించి ఈ ట్వీ్ట్ చేశారనేదానిపై ఎవరికి తగినట్లుగా వారు అర్థాలు చెప్పుకుంటున్నారు. చాలా మంది ఐకాన్ స్టార్ అల్లు అర్జున్‌ను ఉద్దేశించి ఈ ట్వీట్ చేశారని అభిప్రాయపడుతున్నారు. మరికొందరేమో పిఠాపురం అసెంబ్లీ నియోజకవర్గం టీడీపీ ఇంఛార్జి ఎస్వీఎస్ఎన్ వర్మను పరోక్షంగా ఉద్దేశిస్తూ ఈ ట్వీట్ చేశారంటున్నారు.

అసలు సంగతికి వస్తే ఏపీ ఎన్నికల ప్రచారం చివరిరోజు.. అల్లు అర్జున్ నంద్యాల పర్యటనకు వెళ్లారు. భార్యతో కలిసి నంద్యాల వెళ్లిన అల్లు అర్జున్.. నంద్యాల సిట్టింగ్ ఎమ్మెల్యే, ప్రస్తుత వైసీపీ అభ్యర్థి శిల్పా రవిచంద్ర కిషోర్ రెడ్డికి మద్దతు ప్రకటించారు. అయితే అంతకు ఒక్కరోజు ముందే ట్విటర్ వేదికగా పవన్ కళ్యాణ్‌కు అల్లు అర్జున్ మద్దతు ప్రకటించారు. మరుసటి రోజే శిల్పారవి ఇంటికి వెళ్లి ఆయనకు సంఘీభావం ప్రకటించారు. అయితే ఈ క్రమంలోనే విలేకర్లతో మాట్లాడుతూ శిల్పారవికి మద్దతుగా ట్వీట్ చేస్తే సరిపోదని.. అందుకే ఇంటికి వచ్చి మద్దతు ప్రకటిస్తున్నానని అన్నారు. దీంతో సోషల్ మీడియా వేదికగా అల్లు అర్జున్, పవన్ ఫ్యాన్స్ మధ్య రచ్చ మొదలైంది.

సొంత మేనమామ పోటీచేస్తుంటే ట్వీట్ చేసి.. పరాయివాడికి ఇంటికి వెళ్లి మరీ మద్దతు ప్రకటిస్తావా అంటూ జనసైనికులు, పవన్ కళ్యాణ్ ఫ్యాన్స్ మండిపోయారు. ఆ రోజంతా దీనిపై సోషల్ మీడియా వార్ నడిచింది. పోలింగ్ రోజు హైదరాబాద్‌లో ఓటు వేసిన తర్వాత దీనిపై అల్లు అర్జున్ క్లారిటీ కూడా ఇచ్చారు. పవన్ కళ్యాణ్‌కే తన మద్దతు అని.. తన స్నేహితులు ఏ పార్టీలో ఉన్నప్పటికీ వారికి సపోర్ట్ చేస్తానంటూ చెప్పుకొచ్చారు. అయితే పవన్ కళ్యాణ్ ఫ్యాన్స్ ఆగ్రహం మాత్రం చల్లారలేదు.

 ఇది ఇలా ఉంటే.. పిఠాపురం సీటు కోసం స్థానిక టీడీపీ నేత, మాజీ ఎమ్మెల్యే ఎస్వీఎస్ఎన్ వర్మ గట్టిగా పట్టుబట్టారు. అయితే పొత్తులో భాగంగా ఈ సీటు జనసేనకు వెళ్లడం.. అక్కడి నుంచి స్వయంగా పవన్ కళ్యాణ్ బరిలో నిలవటంతో ఆయనేమీ చేయలేకపోయారు. తొలుత అసంతృప్తిని వ్యక్తం చేసినా కూడా.. అధిష్టానం నచ్చజెప్పటంతో పవన్ కళ్యాణ్‌కు అండగా నిలిచారు వర్మ. ఈ నేపథ్యంలోనే నాగబాబు చేసిన ట్వీట్ వైరల్ అవుతోంది. నాగబాబు చేసిన ట్వీట్ అల్లు అర్జున్ గురించేనని కొంతమంది చెప్తుండగా.. కాదు, కాదు పిఠాపురం వర్మ గురించి అంటూ మరికొందరు కామెంట్లు పెడుతున్నారు. మొత్తంగా ఎవరి గురించి అనే దానిపై క్లారిటీ ఇవ్వకుండా నాగబాబు వదిలిన ట్వీట్ బాణం.. ఇద్దరికి గుచ్చుకునేలా ఉంది. మరి మున్ముందు రోజుల్లో నాగబాబు దీనిపై క్లారిటీ ఇస్తారేమో చూడాలి మరి.