ఏపీలో రికార్డు స్థాయిలో పోలింగ్.. ఎన్నికల సంఘం ప్రకటన

ఏపీలో ఓటరు చైతన్యం వెల్లివిరిసింది. పల్లెలు, పట్టణాలనే పట్టింపులు లేకుండా ఓటు వేసేందుకు ప్రజలు క్యూలైన్లలో బారులు తీరారు. దీంతో ఏపీలో రికార్డు స్థాయిలో ఓటింగ్ నమోదైంది. పోలింగ్ సరళిని గమనిస్తే గత మూడు అసెంబ్లీ ఎన్నికలతో పోలిస్తే 2024 ఆంధ్రప్రదేశ్ శాసనసభ ఎన్నికల్లో అత్యధిక ఓటింగ్ శాతం నమోదైనట్లు తెలుస్తోంది. కొన్నిచోట్ల సోమవారం అర్ధరాత్రి 2 గంటలవరకూ పోలింగ్ కొనసాగింది. సోమవారం రాత్రి 12 గంటల సమయానికి ఏపీవ్యాప్తంగా 78.25 శాతం పోలింగ్ నమోదైనట్లు ఏపీ ఎన్నికల ప్రధానాధికారి ముకేష్ కుమార్ మీనా తెలిపారు.1.2శాతం పోస్టల్‌ బ్యాలెట్‌ ఓట్లతో కలిపి మొత్తం 79.4 శాతం ఓటింగ్‌ నమోదైనట్లు చెప్పారు. రెండు గంటల వరకూ పోలింగ్ కొనసాగిన నేపథ్యంలో సుమారు 81 శాతం పోలింగ్‌ నమోదవ్వొచ్చని అంచనా వేస్తున్నామని తెలిపారు.

2009 ఆంధ్రప్రదేశ్ శాసనసభ ఎన్నికల్లో 75.9 శాతం, 2014 ఏపీ ఎన్నికల్లో 78.4 శాతం, 2019 శాసనసభ ఎన్నికల్లో 79.2 శాతం మేర పోలింగ్ నమోదైంది. 2024లో మాత్రం పోలింగ్ 80 శాతం దాటేలా కనిపిస్తోంది. ఏపీలోని మొత్తం 175 అసెంబ్లీ, 25 లోక్ సభ స్థానాలకు ఉదయం ఏడు గంటలకు ప్రారంభమైన పోలింగ్.. సాయంత్రం ఆరింటితో ముగిసింది. అయితే గడువు ముగిసినప్పటికీ క్యూలైన్లలో ఉన్నవారికి ఓటేసే అవకాశం కల్పించారు. ఇక వర్షం పడుతున్నా, హింసాత్మక ఘటనలు జరుగుతున్నా లెక్కచేయక ఓటర్లు.. ఓటు వేసేందుకు పోలింగ్ కేంద్రాలకు తరలివచ్చారు.

జిల్లాలవారీగా చూస్తే సాయంత్రం ఐదుగంటల వరకూ.. చిత్తూరు జిల్లాలో అత్యధికంగా 74.06 శాతం పోలింగ్ నమోదైంది. అత్యల్పంగా అల్లూరి సీతారామరాజు జిల్లాలో 55.17 శాతం పోలింగ్ నమోదైంది. అంబేద్కర్ కోనసీమ జిల్లా 73.55 శాతం, కృష్ణా జిల్లా 73.53 శాతం, బాపట్ల జిల్లాలో 72.14 శాతం, వైఎస్ఆర్ కడప జిల్లాలో 72.85 శాతం, నంద్యాలలో 71.43 శాతం, ప్రకాశం 71 శాతం, నెల్లూరు జిల్లాలో 69.95 శాతం ఓటింగ్ నమోదైనట్లు ఎన్నికల అధికారులు తెలిపారు.

ఇక అనంతపురం జిల్లాలో 68.04 శాతం, పల్నాడు జిల్లాలో 69.10 శాతం, అన్నమయ్య జిల్లాలో 67.63 శాతం, ఎన్టీఆర్ జిల్లాలో 67.44 శాతం, విజయనగరం జిల్లాలో 68.16 శాతం, అనకాపల్లి జిల్లాలో 65.97 శాతం, తిరుపతిల 65.88 శాతం, గుంటూరు జిల్లాలో 65.58 శాతం, కాకినాడ జిల్లాలో 65.01 శాతం, కర్నూలు జిల్లాలో 64.55 శాతం, మన్యం జిల్లాలో 61.18 శాతం, విశాఖ జిల్లాలో 57.42 శాతం పోలింగ్ నమోదైనట్లు అధికారులు తెలిపారు. మొత్తంగా సాయంత్రం ఐదు గంటల వరకూ 68 శాతం పోలింగ్ నమోదైనట్లు ఏపీ ఎన్నికల ప్రధానాధికారి ముకేష్ కుమార్ మీనా వెల్లడించారు. అక్కడక్కడా హింసాత్మక ఘటనలు జరిగినప్పటికీ.. ఎక్కడా రీపోలింగ్ అవసరం లేదని ముకేష్ కుమార్ మీనా తెలిపారు.