ఆప్‌పై మోదీ "ఆపరేషన్ ఝాడు".. బీజేపీపై కేజ్రీవాల్ సంచలన ఆరోపణలు

లోక్‌సభ ఎన్నికల వేళ.. ఢిల్లీ, పంజాబ్‌లలో అధికారంలో ఉన్న ఆమ్ ఆద్మీ పార్టీకి వరుస ఎదురు దెబ్బలు తగులుతున్నాయి. ఇప్పటికే ఢిల్లీ లిక్కర్ కేసు ఆ పార్టీని తీవ్రంగా ఇబ్బంది పడుతుండగా.. తాజాగా ఆ పార్టీ ఎంపీ స్వాతి మలివాల్.. ఆ పార్టీ నేత, అరవింద్ కేజ్రీవాల్ పర్సనల్ సెక్రటరీ బిభవ్ కుమార్‌పై చేసిన ఆరోపణలు.. ఆ పార్టీని మరిన్ని కష్టాల్లోకి నెట్టింది. స్వాతి మలివాల్ కేసులో బిభవ్ కుమార్‌ను అరెస్ట్ చేయడంతో ఆమ్ ఆద్మీ పార్టీ తీవ్ర ఆగ్రహం వ్యక్తం చేసింది. ఈ క్రమంలోనే ఢిల్లీలో ఉన్న బీజేపీ కేంద్ర కార్యాలయాన్ని ముట్టిడించింది. దీనిపై శనివారమే అరవింద్ కేజ్రీవాల్ సవాల్ చేశారు. బీజేపీ కేంద్ర కార్యాలయానికి.. ఆమ్ ఆద్మీ పార్టీ నేతలు వస్తారని.. ఎంత మందిని అరెస్ట్ చేసి జైలులో పెడతారో పెట్టుకోండి అని పేర్కొన్నారు.

ఈ క్రమంలోనే బిభవ్‌ కుమార్‌ అరెస్టుకు నిరసనగా ఢిల్లీలో ఉన్న బీజేపీ ప్రధాన కార్యాలయాన్ని ముట్టడించేందుకు తన పార్టీ కార్యకర్తలతో అరవింద్ కేజ్రీవాల్‌ బయలుదేరిన సమయంలో ఆపరేషన్ ఝాడు అంటూ తీవ్ర వ్యాఖ్యలు చేశారు. ఆమ్‌ ఆద్మీ పార్టీని మట్టికరిపించాలని ప్రధానమంత్రి నరేంద్ర మోదీ నిర్ణయించుకున్నారని.. అందుకే తమ పార్టీ గురించి పదే పదే విమర్శలు చేస్తూ ఉన్నారని కేజ్రీవాల్ ఆరోపించారు. బీజేపీకి ఆప్‌ను ముప్పుగా భావించి.. తనకు ఢిల్లీ లిక్కర్ కేసులో బెయిల్‌ వచ్చినప్పటి నుంచి ఆపరేషన్‌ ఝాడు పేరుతో ఓ ప్రత్యేక కార్యక్రమాన్ని మొదలుపెట్టిందని మండిపడ్డారు. ఆప్‌ నేతల అరెస్టులు, పార్టీ బ్యాంకు అకౌంట్లను ఫ్రీజ్‌ చేయడం, ఆప్‌ కార్యాలయాలను మూసివేయించడం వంటివి ఆపరేషన్ ఝూడులో భాగమని అరవింద్ కేజ్రీవాల్‌ ఆరోపించారు.

ఆప్‌ ఎంపీ రాఘవ్‌ చద్దా, ఢిల్లీ మంత్రులు ఆతిషి మార్లేనా, సౌరభ్‌ భరద్వాజ్‌లు జైలుకు వెళ్లడం ఖాయమని బీజేపీ నేతలు ఆరోపిస్తున్న నేపథ్యంలో కేజ్రీవాల్‌ స్పందించారు. మనీశ్‌ సిసోడియా, సత్యేంద్ర జైన్, సంజయ్‌ సింగ్‌లను జైలుకు పంపినట్లుగానే మిగిలిన ఆప్‌ నేతలను కూడా జైలుకు పంపడమనే ఆటను ప్రధానమంత్రి నరేంద్ర మోదీ ఆడుతున్నారని ఆరోపించారు.

ఇక ఆప్ చేపట్టిన నిరసనలపై ఆ పార్టీ ఎంపీ స్వాతి మాలీవాల్‌ సొంత పార్టీపైనే తీవ్ర విమర్శలు చేశారు. ఒకప్పుడు న్యాయం కోసం జరిగిన ఆందోళనలు.. ఇప్పుడు ఒక నిందితుడిని రక్షించడం కోసం జరుగుతున్నాయా అని ఆమె ప్రశ్నించారు. ఒకప్పుడు అవినీతి, అక్రమాలపై పోరాటం జరగ్గా.. ఇప్పుడు నిందితుల రక్షణ కోసం జరుగుతోందని ట్వీట్ చేశారు. ఒకప్పుడు నిర్భయకు న్యాయం చేయాలని మనమంతా వీధుల్లోకి వచ్చామని.. 12 ఏళ్ల తర్వాత సీసీటీవీ ఫుటేజీని మాయం చేసి, ఫోన్‌ను ఫార్మాట్‌ చేసిన నిందితుడిని కాపాడేందుకు వీధుల్లోకి వస్తున్నామా అంటూ స్వాతి మలివాల్‌ ప్రశ్నించారు. కేజ్రీవాల్ పీఏ బిభవ్ కుమార్.. తనపై దాడి చేశారని ఆరోపిస్తున్న ఆమె.. అతడి అరెస్ట్‌ను ఖండిస్తూ ఆందోళనలు చేస్తున్నారని పరోక్షంగా ఆరోపించారు.

ఇక బిభవ్ కుమార్‌ను అరెస్ట్ చేసినపుడు చూపించిన ఈ ఉత్సాహం.. ఢిల్లీ మాజీ మంత్రి మనీష్ సిసోడియా అరెస్ట్ అయినపుడు చూపించి ఉంటే పరిస్థితులు మరోలా ఉండేవని స్వాతి మలివాల్‌ పేర్కొన్నారు. మనీష్ సిసోడియా ప్రస్తుతం జైల్లో కాకుండా బయట ఉంటే తనకు ఇవాళ ఈ దుస్థితి వచ్చి ఉండేది కాదని అన్నారు. అయితే స్వాతి మలివాల్, బిభవ్ కుమార్ వ్యవహారంలో బీజేపీదే కుట్ర అని ఆప్ నేతలు ఆరోపిస్తున్నారు. బీజేపీ ఆడుతున్న ఆటలో స్వాతి మలివాల్ పావుగా మారారని తీవ్ర వ్యాఖ్యలు చేస్తున్నారు.