ఓటేసేందుకు వెళ్లిన సీఎం మమతా బెనర్జీ తమ్ముడికి షాక్.. ఓటర్ లిస్ట్‌లో పేరు గల్లంతు

ప్రస్తుతం దేశంలో లోక్‌సభ ఎన్నికలు జరుగుతున్నాయి. చాలా మంది ఓటు వేసేందుకే ముందుకు రాకపోతుండగా.. వచ్చిన వారికి కొత్త తలనొప్పులు ఎదురవుతున్నాయి. ఈ క్రమంలోనే ఓటు వేసేందుకు వెళ్లిన చాలా మందికి అనూహ్య పరిస్థితి ఎదురవుతోంది. తమకు ఓటు హక్కు ఉన్నా, గుర్తింపు కార్డులు ఉన్నా.. తీరా చూస్తే ఓటరు జాబితాలో పేరు ఉండటం లేదు. దీంతో వారిని ఓటు వేసేందుకు ఎన్నికల అధికారులు అనుమతించడం లేదు. ఈ క్రమంలోనే ఎంతో ఉత్సాహంతో ఓటు వేసేందుకు వచ్చిన వారు వెనక్కి వెళ్లిపోతున్నారు. ఇటీవల మాజీ ఎయిర్‌ఫోర్స్ చీఫ్ ఎయిర్ మార్షల్ చీఫ్ ప్రదీప్ వసంత్ నాయక్‌ తన కుటుంబ సభ్యులతో కలిసి ఓటు వేసేందుకు వెళ్లగా.. ఆయన సతీమణి ఓటు గల్లంతైంది. ఇక తాజాగా బెంగాల్ సీఎం, టీఎంసీ అధినేత్రి మమతా బెనర్జీ సోదరుడు బాబున్ బెనర్జీ ఓటు కూడా గల్లంతైంది.

బాబున్ బెనర్జీకి హౌరా నియోజకవర్గంలో ఓటు ఉంది. ఈ క్రమంలోనే ఐదో విడత ఎన్నికల సందర్భంగా ఓటు వేసేందుకు స్థానికంగా ఉన్న ఓ పోలింగ్ స్టేషన్‌కు బాబున్ బెనర్జీ వెళ్లారు. అయితే ఆయన వివరాలు పరిశీలించిన ఎన్నికల సంఘం అధికారులు.. బాబున్ బెనర్జీ పేరు ఆ ఓటర్ లిస్ట్‌లో లేదని తేల్చి చెప్పారు. ఆ విషయం విన్న బాబున్ బెనర్జీ.. ఒక్కసారిగా షాక్ అయ్యారు. ఇక అక్కడ చేసేదేమీ లేక నిరాశతో ఆయన వెనుదిరిగి వెళ్లిపోయారు. దీనిపై బాబున్ బెనర్జీని మీడియా ప్రశ్నించగా స్పందించడానికి నిరాకరించారు. ఇక ఈ వ్యవహారం తీవ్ర దుమారం రేపడంతో బెంగాల్‌లో అధికారంలో ఉన్న తృణమూల్ కాంగ్రెస్ పార్టీ స్పందించింది. ఈ వ్యవహారాన్ని ఎన్నికల సంఘం పరిశీలిస్తోందని.. ఏం జరిగిందనే దానిపై ఈసీ వివరణ ఇస్తుందని తెలిపింది.

ఇక హౌరా నియోజకవర్గం నుంచి టీఎంసీ తరఫున పోటీ చేయాలని బాబున్ బెనర్జీ భావించారు. అయితే ఆ స్థానంలో సిట్టింగ్ ఎంపీగా ఉన్న ప్రసూన్‌ బెనర్జీకి తృణముల్ కాంగ్రెస్ పార్టీ మరోసారి టికెట్ కేటాయించింది. దీనిపై బాబున్‌ బెనర్జీ.. తీవ్ర అసంతృప్తి వ్యక్తం చేయగా.. ఆ తర్వాత మమత బెనర్జీకి, ఆయనకు మధ్య సంబంధాలు దెబ్బతిన్నాయి. అయితే బాబున్ బెనర్జీ వ్యవహారంపై ఎన్నికలకు ముందు మమతా బెనర్జీ తీవ్ర వ్యాఖ్యలు చేశారు. ఈ క్రమంలోనే హౌరా నియోజకవర్గం నుంచి బాబున్‌ బెనర్జీ ఇండిపెండెంట్ అభ్యర్థిగా పోటీ చేస్తారనే వార్తలు కూడా వెలువడ్డాయి. మరోవైపు.. ఆయన బీజేపీలో కూడా చేరతారని ఊహాగానాలు వినిపించాయి. అయితే అవేమీ లేకుండా సైలెంట్‌గా ఉన్న బాబున్ బెనర్జీ.. తాజాగా ఎన్నికల్లో ఓటు హక్కు వినియోగించేందుకు వెళ్లగా షాక్ తగిలింది. ప్రస్తుతం బాబున్ బెనర్జీ.. బెంగాల్ ఒలింపిక్ అసోసియేషన్, బెంగాల్ హాకీ అసోసియేషన్ అధ్యక్షుడిగా ఉన్నారు. అంతేకాకుండా వీటితోపాటు బెంగాల్‌ బాక్సింగ్ అసోసియేషన్ కార్యదర్శిగా కూడా కొనసాగుతున్నారు. తృణమూల్ కాంగ్రెస్ పార్టీ క్రీడా విభాగం బాధ్యతలు చూస్తున్నారు.