ఆ చెట్లు డేంజర్, ప్రాణాలకే ప్రమాదం.. వెంటనే తొలగించండి.. డిప్యూటీ సీఎం పవన్

ఆంధ్రప్రదేశ్ డిప్యూటీ సీఎం పవన్ కళ్యాణ్ ప్రస్తావించిన ఓ చెట్టు ఇప్పుడు ట్రెండ్ అవుతోంది. ఆ చెట్టు చాలా డేంజర్ వెంటనే తొలగించాలని పవన్ కళ్యాణ్ ఆదేశించారు. దీంతో అందరూ ఈ చెట్టు గురించి చర్చించుకుంటున్నారు. డిప్యూటీ సీఎం పవన్ కళ్యాణ్ కాకినాడ కలెక్టరేట్‌లో సమీక్ష చేశారు. ఈ సందర్భంగా స్థానికులు కోనో కార్పస్ (ఏడాకుల) చెట్ల గురించి పవన్ దగ్గర ప్రస్తావించారు.. అటవీ శాఖ సమీక్షలో ఈ అంశంపై వివరించారు. ప్రజల ఆరోగ్యం దృష్ట్యా వాటిని వెంటనే తొలగించాలని పవన్ కళ్యాణ్ ఆదేశించారు.ఈ కోనో కార్పస్ చెట్లను గతంలో తన ఫాంహౌస్‌లో పెంచానని.. అయితే వాటితో ప్రమాదం అని తెలిసి తొలగించానన్నారు పవన్ కళ్యాణ్. కాకినాడలో మొత్తం 4,602 కానో కాన్ఫరస్ చెట్లు ఉన్నట్లు గుర్తించారు అధికారులు. ఈ చెట్లను దశల వారీగా తొలగించాలని డిప్యూటీ సీఎం అధికారులకు సూచించారు. ఈ చెట్లను తొలగించి.. ప్రజల ఆరోగ్యానికి ఎలాంటి ఇబ్బందులు లేకుండా చూడాలన్నారు. పవన్ కళ్యాణ్ ఆదేశాలతో అధికారులను చెట్లను తొలగించేందుకు సిద్ధమయ్యారు.

ఈ కోనో కార్పస్ చెట్లు సాధారణంగా పచ్చగా, ఏపుగా పెరుగుతాయి.. వీటిని చాలామంది ఇళ్లలో పెంచుకోవడానికి ఇష్ట పడుతుంటారు. అలాగే నర్సరీల్లో, రోడ్డు డివైడర్ల మధ్యలో కూడా పెంచుతుంటారు.. ఈ చెట్లు చూడటానికి అందంగా కనిపిస్తున్నా.. అవి చాలా డేంజర్ అని చెబుతున్నారు. ఈ కోనో కార్పస్‌ మొక్కను నాటిన కొన్ని వారాల్లోనే ఏపుగా పెరుగుతుంది అంటున్నారు. అందుకే ఈ మొక్కల్ని నాటొద్దని అధికారులు కూడా సూచిస్తున్నారు. ఈ మొక్కల కారణంగా ప్రజలు శ్వాసకోస సమస్యలు, ఆస్తమా వంటి సమస్యలు ఎదురవుతాయంటున్నారు.

అంతేకాదు ఈ చెట్టు భూ గర్భంలోని జలాన్ని కూడా తోడేస్తుందని.. ఈ చెట్టు ఏపుగా పెరిగిన తర్వాత.. వేరు ఏకంగా 80 మీటర్ల వరూక భూమిలోకి వెళ్లి నీళ్లను తాగేస్తుందంటున్నారు.ఈ కోనో కార్ఫస్ చెట్లను తెలుగులో ఏడాకుల చెట్లు అని కూడా అంటారు.. అలాగే డెవిల్ ట్రీ అని కూడా పిలుస్తారు. అంతేకాదు ఈ చెట్లకు అక్టోబర్ నుంచి జనవరి వరకు పువ్వులు కూడా పూస్తాయి. ఈ చెట్ల పువ్వుల పుప్పొడి కారణంగా ఆస్తమా, శ్వాసకోస ఇబ్బందులు వస్తాయి అంటున్నారు. గతంలో విశాఖపట్నంలో ఈ చెట్ల గురించి చర్చ జరిగింది.. వీటితో ఆరోగ్యపరమైన సమస్యలు వస్తాయని స్థానికులు ఫిర్యాదు చేశారు. ఈ చెట్లతో పర్యావరణ వ్యవస్థలో ఎలాంటి ఉపయోగం ఉండదని.. అనేక దుష్ప్రభావాలు ఉంటాయంటున్నారు. అందుకే స్పందించి కోనో కార్పస్ మొక్కలు తొలగించాలని డిమాండ్ చేస్తున్నారు. అందుకే కాకినాడలో కూడా ఈ చెట్లను తొలగించాలని డిప్యూటీ సీఎం పవన్ కళ్యాణ్ ఆదేశించారు.