లంచంగా 5 కిలోల ఆలుగడ్డలు.. పోలీస్ వింత డిమాండ్, సస్పెండ్

ఉత్తర్‌ప్రదేశ్ కన్నౌజ్‌కు చెందిన ఓ ఎస్ఐ.. ఓ వ్యక్తి నుంచి లంచం డిమాండ్ చేస్తున్న ఘటన ప్రస్తుతం సోషల్ మీడియాలో తెగ వైరల్‌గా మారింది. సారిఖ్ పోలీస్ స్టేషన్ పరిధిలోని భావల్‌పూర్ చపున్నా చౌకీలో ఎస్‌గా విధులు నిర్వర్తిస్తున్న రామ్ కృపాల్ సింగ్ అనే పోలీస్.. ఓ వ్యక్తిని లంచం అడిగాడు. ఒక కేసును పరిష్కరించేందుకు బాధితుడి నుంచి లంచం డిమాండ్ చేశాడు. తనకు 5 కిలోల బంగాళాదుంపలు కావాలని అడిగాడు. అయితే తనకు కావాల్సింది బంగాళ దుంపలు కాదని.. అటు ఆ పోలీస్‌కు.. ఇటు బాధితుడికి అర్థం అయింది. అక్కడ లేని మూడో వ్యక్తికి వారు లంచం గురించి మాట్లాడుతున్నట్లు అర్థం కాకుండా ఉండేందుకే కోడ్ పదంగా బంగాళాదుంపల్ని ఉపయోగించాడు.

అయితే రామ్ కృపాల్ సింగ్.. ఒక కేసు విషయంలో ఓ రైతు నుంచి 5 కిలోల బంగాళాదుంపలు లంచంగా డిమాండ్ చేశాడు. అయితే తాను అంత ఇచ్చుకోలేనని 2 కిలోలు మాత్రమే ఇవ్వగలనని.. ఆ రైతు చెప్పాడు. దీంతో తీవ్ర ఆగ్రహం వ్యక్తం చేసిన ఎస్‌ఐ.. తన డిమాండ్‌ను తీర్చాల్సిందేనని హెచ్చరించాడు. చివరికి 3 కిలోలకు వారి మధ్య ఒప్పందం కుదరింది. అయితే ఎస్ఐ, ఆ రైతు మాట్లాడుకున్న ఆ సంభాషణలకు సంబంధించిన వీడియో ప్రస్తుతం సోషల్ మీడియాలో వైరల్‌గా మారడంతో స్థానికంగా తీవ్ర విమర్శలు వెల్లువెత్తుతున్నాయి.

లంచంగా డబ్బుల కోసం ఎస్ఐ రామ్ కృపాల్ సింగ్ బంగాళాదుంపల్ని కోడ్ నేమ్‌గా వాడినట్లు ఉన్నతాధికారులు గుర్తించారు. ఈ క్రమంలోనే ఆ ఎస్ఐ‌ని సస్పెండ్ చేస్తూ కన్నౌజ్ జిల్లా ఎస్పీ అమిత్ కుమార్ ఆనంద్ ఆదేశాలు జారీ చేశారు. అనంతరం ఎస్ఐ రామ్ కృపాల్ సింగ్‌పై శాఖాపరమైన విచారణ కూడా చేపట్టారు. ఎస్ఐని దోషిగా తేల్చి, కన్నౌజ్ సీఐ కమలేష్ కుమార్‌కి కేసు దర్యాప్తు బాధ్యతలు అప్పగించారు.