స్వీట్లు.. తింటూ తింటూ ఆగిన కార్పొరేటర్లు.. చూస్తే!

ప్రజా సమస్యలపై చర్చించేందుకు గుంటూరు మున్సిపల్ కౌన్సిల్ సమావేశం నిర్వహించారు. ఈ సమావేశానికి కార్పొరేటర్లు కూడా అందరూ హాజరయ్యారు. అయితే సమావేశం మధ్యలో కార్పొరేటర్లకు అందించిన తినుబండారాల్లో పురుగులు కనిపించడంతో అందరూ షాక్ తిన్నారు. స్వీట్స్‌లో పురుగులు కనిపించడంతో కార్పొరేటర్లు మండిపడ్డారు. ఈ విషయాన్ని మేయర్ దృష్టికి కూడా తీసుకెళ్లారు. దీనిపై గుంటూరు మేయర్ సైతం ఆగ్రహం వ్యక్తం చేశారు. ఈ విషయాన్ని కమిషనర్‌కు ఫిర్యాదు చేసిన కార్పొరేటర్లు.. స్వీ్ట్స్ సరఫరా చేసిన వారిపై చర్యలు తీసుకోవాలని డిమాండ్ చేశారు. అయితే స్వీట్స్‌లో పురుగులు ఉన్న విషయమై కొంతమంది కార్పొరేటర్లు తమ సెల్‌ఫోన్‌లో వీడియోలు తీశారు. ప్రస్తుతం ఈ వీడియోలు వైరల్ అవుతున్నాయి.

మరోవైపు ఇటీవల జరిగిన గుంటూరు నగరపాలక సంస్థ పాలక మండలి సమావేశం కూడా వార్తల్లో నిలిచింది. టీడీపీ, వైసీపీ కార్పొరేటర్ల వాగ్వాదంతో హైలెట్ అయ్యింది. అధికారులు ప్రోటోకాల్ అనుసరించడం లేదంటూ.. వైసీపీ సభ్యులు సమావేశంలో నిలదీశారు. దీంతో సమావేశంలో టీడీపీ, వైసీపీ కార్పొరేటర్ల మధ్య వాగ్వాదం జరిగింది. మరోవైపు ఏపీలో టీడీపీ కూటమి ప్రభుత్వం అధికారంలోకి వచ్చిన తర్వాత నిర్వహించిన తొలి సమావేశం కావటంతో.. గుంటూరు మేయర్ కావటి మనోహర్ నాయుడు కొత్తగా గెలిచిన ఎమ్మెల్యేలను సన్మానించారు. అనంతరం గుంటూరు ఈస్ట్, వెస్ట్, ప్రత్తిపాడు అసెంబ్లీ నియోజకవర్గాల నుంచి గెలిచిన ఎమ్మెల్యేలను కోఆప్షన్ సభ్యులుగా ఎన్నుకున్నారు.

ఇక సమావేశంలో ప్రజాసమస్యలపై చర్చలు మొదలు పెట్టగా.. మరోసారి టీడీపీ, వైసీపీ కార్పొరేటర్ల మధ్య వాగ్వాదం జరిగింది. కొత్త పైపులెన్లు, తాగునీటి సమస్య గురించి మరోసారి రెండు పార్టీల కార్పొరేటర్లు వాగ్వాదానికి దిగారు. భూగర్భ డ్రైనేజీ పనులు ఆగిపోవటంపైనా సభ్యుల మధ్య మాటలయుద్ధం నడిచింది. మరోవైపు గుంటూరు మేయర్‌గా వైసీపీకి చెందిన కావటి మనోహర్ నాయుడు ఉండగా.. డిప్యూటీ మేయర్లుగా అదే పార్టీకి చెందిన మరో ఇద్దరు డిప్యూటీ మేయర్లుగా ఉన్నారు. 2021లో జరిగిన గుంటూరు నగరపాలక సంస్థ ఎన్నికల్లో వైసీపీకి 44 సీట్లు రాగా.. టీడీపీ 9, జనసేన 2 చోట్ల విజయం సాధించింది. మరో ఇద్దరు స్వంతంత్రులు కార్పొరేటర్లుగా గెలిచారు.