బోగస్ సర్టిఫికెట్లతో పింఛన్ తీసుకుంటే కట్,,,ఏపీ మంత్రి స్వామి

ఆంధ్రప్రదేశ్ మంత్రి డోలా శ్రీ బాలవీరాంజనేయ స్వామి పింఛన్లకు సంబందించి కీలక వ్యాఖ్యలు చేశారు. బోగస్ సర్టిఫికెట్లతో పింఛన్లు పొందేవారి ప్రయత్నాన్ని అడ్డుకోవాలని ఆదేశించారు. అలాగే అర్హత ఉన్న చివరి వ్యక్తి వరకు పింఛన్లు అందించాలని సూచించారు. బోగస్ సర్టిఫికెట్లతో పింఛన్ల పంపిణీకి అడ్డుకట్ట వేయాలి అన్నారు. బోగస్ సర్టిఫికేట్లతో పింఛన్ల తీసుకునేవారిని గుర్తించి చర్యలు తీసుకునేందుకు సిద్దమవుతున్నారు. విభిన్న ప్రతిభావంతులు, వయోవృద్దులు, ట్రాన్స్‌జెండర్స్‌ సంక్షేమంపై అమరావతి సచివాలయంలో అధికారులతో మంత్రి సమీక్షించారు. దివ్యాంగులకు బ్యాటరీ ట్రై సైకిళ్లు ఇచ్చేందుకు ప్రణాళిక రూపొందించాలని.. ట్రాన్స్‌జెండర్లకు ప్రత్యేకంగా రేషన్‌ కార్డులు ఇచ్చే అంశాన్ని పరిశీలిస్తామని తెలిపారు. అర్హులైన ప్రతి ఒక్కరికీ సంక్షేమ పథకాల అందించాలన్నారు. అర్హత ఉన్న చివరి వ్యక్తి వరకు సంక్షేమ పథకాలు, పింఛన్లు అందించాలన్నారు.

ఏపీ ప్రభుత్వం దివ్యాంగులు, వయోవృద్ధులు, ట్రాన్స్ జెండర్స్‌కు కల్పిస్తున్న సౌకర్యాలు, అందిస్తున్న సంక్షేమ పథకాలపై విస్తృత ప్రచారం నిర్వహించాలన్నారు మంత్రి స్వామి. దివ్యాంగులకు సేవ చేసే అదృష్టం రావడం గొప్ప భాగ్యమని.. అధికారులు అలసత్వం వీడి బాధ్యతతో పని చేయాలి అన్నారు. అధికారులు సంబంధిత శాఖలపై ఎప్పటికప్పుడు పర్యవేక్షణ చేస్తూ ఉండాలని సూచించారు.

ఇటీవల రాష్ట్రంలోని పలు జిల్లాల్లో బోగస్ సర్టిఫికెట్లతో పింఛన్లు తీసుకుంటున్నట్లు అధికారులు గుర్తించారు. గ్రామీణ ఉపాధి హామీ పథకంలో భాగంగా సామాజిక తనిఖీలు చేపట్టారు. బోగస్‌ సర్టిఫికెట్ల ద్వారా దివ్యాంగ పింఛన్‌ పొందుతున్నట్లు తేలింది. కొంతమంది చెవుడు ఉన్నట్లు దొంగ సర్టిఫికెట్లు పొంది పింఛన్లు తీసుకుంటున్నట్లు గుర్తించారు. సామాజిక తనిఖీలు చేస్తుండగా.. వీరంతా సాధారణ వ్యక్తుల మాదిరిగా మాట్లాడటం, పనులు చేసుకోవడం, సర్టిఫికెట్లు చూపించమనగా నిరాకరించారు. అప్పుడు అనుమానం రాగా.. బోగస్ పింఛన్ లబ్ధిదారులుగా తేల్చారు. ఈ క్రమంలో అధికారులు బోగస్ సర్టిఫికెట్ల విషయాన్ని సీరియస్‌గా తీసుకున్నారు. మరోవైపు రాష్ట్రంలో 8 లక్షలమంది దివ్యాంగ పింఛన్లు అందుకుంటున్నారు.. అందులో అనర్హులు ఉన్నట్లు అధికారులు గుర్తించారు. 60వేలమందికి తిరిగి వైక్యల నిర్ధారణ పరీక్షలు చేయాలని నిర్ణయించినట్లు తెలుస్తోంది. మొత్తం మీద బోగస్ సర్టిఫికెట్లతో పింఛన్లు కట్ చేసే పనిలో ఉంది ప్రభుత్వం.