వైసీపీకి బిగ్ షాక్, ఎంపీ రాజీనామా?.. టీడీపీలో చేరాలని నిర్ణయం

వైఎస్సార్‌సీపీకి మరో ఎదురు దెబ్బ తగిలేలా ఉంది. మరో ముఖ్యమైన నేత ఆ పార్టీని వీడబోతున్నట్లు సోషల్ మీడియాలో ప్రచారం జరుగుతోంది. వైఎస్సార్‌సీపీ సీనియర్ నేత, రాజ్యసభ సభ్యులు మోపిదేవి వెంకటరమణ గురువారం ఆ పార్టీని వీడబోతున్నట్లు కొందరు ట్వీట్‌లు చేశారు. మోపిదేవి చూపు తెలుగు దేశం పార్టీ వైపు ఉందని.. త్వరలోనే ఆయన ముఖ్యమంత్రి చంద్రబాబు సమక్షంలో పసుపు కండువా కప్పుకోబోతున్నట్లు సోషల్ మీడియాలో ఊహాగానాలు మోదలయ్యాయి. మోపిదేవి వెంకటరమణకు ఎంపీ పదవితో పాటుగా బాపట్ల జిల్లా వైఎస్సార్‌సీపీ అధ్యక్ష పదవి కూడా ఉంది. రాజ్యసభ సభ్యత్వంతో పాటుగా జిల్లా అధ్యక్ష పదవికి, పార్టీ సభ్యత్వానికి రాజీనామా చేస్తారని ప్రచారం నడుస్తోంది.

మోపిదేవి వెంకటరమణ ఉమ్మడి గుంటూరు జిల్లాలో సీనియర్ రాజకీయ నేతగా ఎదిగారు. ఆయన విద్యార్థి దశ నుంచే రాజకీయాల్లో ఉన్నారు.. కాంగ్రెస్ పార్టీలో చేరి.. 1989, 1994లో కూచినపూడి అసెంబ్లీ నియోజకవర్గం నుంచి పోటీ చేసి ఓటమి పాలయ్యారు. 1999, 2004లో కూచినపూడి నియోజకవర్గం నుంచి విజయం సాధించారు. 2009 ఎన్నికలకు ముందు నియోజకవర్గాల పునర్‌విభజనలో భాగంగా రేపల్లె నియోజకర్గం ఏర్పాటు కాగా.. 2009లో అక్కడ నుంచి కాంగ్రెస్ పార్టీ తరఫున పోటీచేసి విజయం సాధించారు. మోపిదేవి వెంకట రమణ వైఎస్ రాజశేఖర్ రెడ్డి కేబినెట్‌లో ఓడరేవులు, మౌలిక సదుపాయాలు, పెట్టుబడుల మంత్రిగా పనిచేశారు. ఆ తర్వాత కిరణ్ కుమార్ రెడ్డి కేబినెట్‌లో ఎక్సైజ్‌శాఖ మంత్రిగా బాధ్యతలు నిర్వహించారు.

 2014 ఎన్నికలకు ముందు కాంగ్రెస్ పార్టీకి రాజీనామా చేసి వైఎస్సార్‌సీపీలో చేరారు. 2014, 2019లో రేపల్లె అసెంబ్లీ నియోజకవర్గం నుంచి వైఎస్సార్‌సీపీ తరఫున పోటీచేసి ఓడిపోయారు. అయితే 2019 ఎన్నికల తర్వాత వైఎస్ జగన్.. మోపిదేవికి ఎమ్మెల్సీ పదవి ఇచ్చి కేబినెట్‌లోకి తీసుకున్నారు. అయితే అనూహ్య పరిణామాలతో ఆయన మంత్రి పదవి నుంచి తప్పుకుని.. ఎమ్మెల్సీ పదవికి రాజీనామా చేశారు. ఆ తర్వాత మోపిదేవి 2020లో వైఎస్సార్‌ కాంగ్రెస్‌ పార్టీ తరపున రాజ్యసభకు ఎన్నికయ్యారు. ఆయన 2024 ఎన్నికల్లో రేపల్లె నుంచి ఎమ్మెల్యేగా పోటీచేద్దామని భావించినా.. టికెట్ దక్కలేదు.

ఏపీలో జరిగిన సార్వత్రిక ఎన్నికల తర్వాత వైఎస్సార్‌సీపీకి వరుసగా ఎదురు దెబ్బలు తగులుతున్నాయి. ఇప్పటికే పలువురు మాజీ మంత్రులు, ఎమ్మెల్యేలు, ముఖ్య నేతలు ఆ పార్టీకి రాజీనామా చేశారు. అలాగే కొంతమంది మేయర్లు, కార్పొరేటర్లు కూడా పార్టీకి గుడ్ బై చెప్పారు. ఇలాంటి సమయంలో మోపిదేవి వెంకట రమణ వంటి సీనయర్లు వైఎస్సార్‌సీపీని వీడటం ఎదురుదెబ్బేనని చెప్పాలి. అయితే ఆయన ఇప్పటి వరకు వైఎస్సార్‌సీపీని వీడటంపై అధికారికంగా ఎలాంటి ప్రకనట చేయలేదు. కేవలం సోషల్ మీడియాలో మాత్రమే ప్రచారం జరుగుతోంది. అయితే మరో వాదన కూడా వినిపిస్తోంది.. మోపిదేవి గురువారం తన అనుచరులతో సమావేశం నిర్వహించి.. తన నిర్ణయాన్ని ప్రకటిస్తారని చెబుతున్నారు.