ఇసుక దోపిడీపై మంత్రి ఆగ్రహం
Andhra Pradesh Telugu | Suryaa Desk | Published : Wed, Aug 28, 2024, 10:14 PM
పేదల ఇళ్ల కోసం నిల్వ చేసిన ఇసుకను రాత్రికి రాత్రే దొంగలు మాయం చేసిన ఘటన ద్రాక్షారామంలో చోటు చేసుకుంది. ఇటీవల చంద్రబాబు సర్కార్ ఉచిత ఇసుక విధానం తీసుకువచ్చింది. దీంతో రవాణా ఖర్చులు మాత్రమే చెల్లించి వేల రూపాయలు ఖర్చు చేయకుండా ఇసుక తెచ్చుకునే అవకాశం ఏపీ ప్రభ్వుతం కల్పించింది. అయితే ద్రాక్షారామంలో పేదల ఇళ్లస్థలాల లేఅవుట్‌లో ఉంచిన ఇసుకను కేటుగాళ్లు మాయం చేశారు. లబ్ధిదారులకు పంపిణీ చేసేందుకు సిద్ధంగా ఉంచిన 70లారీల ఇసుకను రాత్రికి రాత్రే దోచేశారు. ఉదయాన్నే ఇసుక కనిపించకపోవడంతో స్థానికులు విషయాన్ని కార్మిక శాఖ మంత్రి వాసంశెట్టి సుభాశ్ దృష్టికి తీసుకెళ్లారు. ఘటనపై మంత్రి తీవ్ర ఆగ్రహం వ్యక్తం చేశారు. పోలీసులకు వెంటనే ఫిర్యాదు చేయాలని గృహనిర్మాణ శాఖ అధికారులను వాసంశెట్టి ఆదేశించారు. కేసు నమోదు చేసి నిందితులను పట్టుకోవాలంటూ మంత్రి సుభాశ్ పోలీసులను ఆదేశించారు.
|
|