ఏపీలోని ఈ జిల్లాల్లో ఇవాళ .. హెచ్చరించిన వాతావరణశాఖ

ఏపీలో వర్షాలు కాస్త తగ్గుముఖం పట్టాయి.. అయితే ఇవాళ రాష్ట్రంలోని పలు జిల్లాల్లో వర్షాలు పడతాయంటున్నారు. ఆంధ్రప్రదేశ్‌ దక్షిణ కోస్తాలోని పలు ప్రాంతాలలో, ఉత్తర కోస్తాలో కొన్ని ప్రాంతాలలో మోస్తరు వర్షాలు కురిసే అవకాశం అవకాశం ఉందని అంచనా వేస్తున్నారు. విదర్భ, తెలంగాణ ప్రాంతాలలో వాయుగుండం కొనసాగుతోందని వాతావరణశాఖ తెలిపింది.

 పార్వతీపురం మన్యం, అల్లూరి సీతారామరాజు, పశ్చిమగోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు జిల్లాల్లో కొన్నిచోట్ల తేలికపాటి నుంచి మోస్తరు వర్షాలు కురిసే అవకాశం ఉందని విపత్తుల సంస్థ తెలిపింది. శ్రీకాకుళం, విజయనగరం, విశాఖపట్నం, అనకాపల్లి, కాకినాడ, డాక్టర్ బీఆర్ అంబేద్కర్ కోనసీమ, తూర్పుగోదావరి, ప్రకాశం, తిరుపతి, చిత్తూరు, కర్నూలు, నంద్యాల, శ్రీ సత్యసాయి, కడప, అన్నమయ్య జిల్లాల్లోని కొన్ని ప్రాంతాల్లో తేలికపాటి వర్షాలు కురిసే అవకాశం ఉందని భావిస్తున్నారు.

గత 24 గంటల్లో అల్లూరి సీతారామరాజు జిల్లాలోని అరుకులో అత్యధికంగా 3 సెంటిమీటర్ల వర్షపాతం నమోదైంది. అంతేకాదు తీరం వెంబడి గంటకు 35 నుంచి 45 కిలోమీటర్లు వేగంతో ఈదురు గాలులు వీచే అవకాశం ఉందని.. గరిష్ఠంగా 55 కిలోమీటర్లు వేగంతో గాలులు వీస్తాయంటున్నారు. సముద్రం అల్లకల్లోలంగా ఉండడంతో మత్య్సకారులు జాగ్రత్తగా ఉండాలని సూచించారు.

మరోవైపు విజయవాడలోని వరద ముంపు ప్రంతాల్లో ప్రభుత్వం సహాయ,పునరావాస కార్యక్రమాలు ముమ్మరంగా చేపట్టింది. విజయవాడ ముంపు ప్రాంతాల్లో ముఖ్యమంత్రి సుడిగాలి పర్యటనలు చేపట్టారు.. సహాయక చర్యల్లో అధికార యంత్రాంగం నిమగ్నం అయ్యింది. 41927 మందికి 176 పునరావాస కేంద్రాల ద్వారా పునరావాసం కల్పించారు.. మొత్తం 171 వైద్యశిబిరాలు ఏర్పాటు చేశారు. సహాయక చర్యల్లో 36 NDRF,SDRF బృందాలు నిరంతర సేవలు అందిస్తున్నాయి. భాదితులకు ఈరోజు 3లక్షల ఆహార ప్యాకేట్లు, త్రాగునీరు ·ఎప్పటికప్పుడు అందించేందుకు 5 హెలికాఫ్టర్లను ఉపయోగిస్తున్నారు. 188 బోట్లు,283 మంది గజ ఈతగాళ్లను అందుబాటులో ఉంచారు. అజిత్ సింగ్ నగర్ లోని అపార్ట్మెంట్ మీద ఉన్న ప్రజలకు డ్రోన్ టెక్నాలజీ ద్వారా ఆహారాన్ని పంపిస్తున్నారు.. చంద్రబాబు దగ్గరుండి పరిస్థితిని పర్యవేక్షిస్తున్నారు.. మరోవైపు ప్రకాశం బ్యారేజీ దగ్గర వరద తగ్గుముఖం పడుతోంది.