కార్తి క్షమాపణలపై స్పందించిన పవన్ కళ్యాణ్.. ఎక్స్‌లో సుదీర్ఘ పోస్టు

తిరుపతి లడ్డూ వ్యవహారం నేపథ్యంలో సినీనటులు ప్రకాష్ రాజ్, హీరో కార్తిలపై ఏపీ డిప్యూటీ సీఎం పవన్ కళ్యాణ్ కీలక వ్యాఖ్యలు చేసిన సంగతి తెలిసిందే. దీంతో తమిళ హీరో కార్తి సైతం పవన్ కళ్యాణ్‌కు ఎక్స్ వేదికగా సారీ చెప్పారు. క్షమాపణలు చెప్తూ ట్వీట్ చేశారు. దీంతో హీరో కార్తి క్షమాపణలపై పవన్ కళ్యాణ్ స్పందించారు. సంప్రదాయాలను గౌరవిస్తూ కార్తి స్పందించిన తీరు మీద పవన్ కళ్యాణ్ సంతోషం వ్యక్తం చేశారు. తిరుమల లడ్డూపై కావాలని కార్తి అనలేదని తాను అర్థం చేసుకున్నట్లు పవన్ కళ్యాణ్ ట్వీట్ చేశారు.

"కార్తి గారు.. మా సంప్రదాయాల పట్ల మీరు చూపిన గౌరవాన్ని, అలాగే మీ స్పందనను నేను హృదయపూర్వకంగా అభినందిస్తున్నాను. తిరుమల ఆలయం, తిరుపతి లడ్డూ వంటి పవిత్రమైన విషయాలు లక్షలాది మంది భక్తుల భావోద్వేగంతో ముడిపడి ఉంటాయి. అలాంటి విషయాల్లో జాగ్రత్తగా వ్యవహరించడం మనందరికీ చాలా అవసరం. అయితే తిరుమల లడ్డూ విషయంలో మీరు కావాలని అనలేదని నాకు అర్థమైంది. దాని వెనుక ఎలాంటి దురుద్దేశాలు లేవని నాకు అర్థమైంది. అయితే సెలబ్రిటీలు మనం ఐక్యత, గౌరవాన్ని పెంపొందించాల్సి ఉంటుంది. మరీ ముఖ్యంగా మనం ఎక్కువగా ఆరాధించే వాటి గురించి, మన సంస్కృతి, ఆధ్యాత్మిక విలువల గురించి. మన సినిమాల ద్వారా ఈ విలువలను పెంపొందించడానికి ఎల్లప్పుడూ కృషి చేద్దాం. అంకితభావం, ప్రతిభ కలిగిన అద్భుతమైన నటుడిగా మీ పట్ల నా అభిమానాన్ని కూడా తెలియజేస్తున్నాను. అలాగే సత్యం సుందరం సినిమా విజయవంతం కావాలని కోరుకుంటున్నా" అంటూ పవన్ కళ్యాణ్ ట్వీట్ చేశారు.

మరోవైపు హీరో కార్తి.. సత్యం సుందరం ప్రీ రిలీజ్ ఈవెంట్‌లో చేసిన వ్యాఖ్యలు వివాదానికి కారణమైన సంగతి తెలిసిందే. ఈ కార్యక్రమంలో యాంకర్ లడ్డూ కావాలా నాయనా అని అడిగారు. అయితే ఇప్పుడు లడ్డూ గురించి మాట్లాడకూడదు.. సున్నితమైన అంశమని కార్తి జోవియల్‌గా అన్నారు. అయితే కార్తి చేసిన కామెంట్స్ సోషల్ మీడియాలో వైరల్ అయ్యాయి. దీంతో డిప్యూటీ సీఎం పవన్ కళ్యాణ్ స్పందించాల్సి వచ్చింది. సనాతన ధర్మం జోలికి రావొద్దంటూ పవన్ కళ్యాణ్ హెచ్చరించారు. తిరుమల వ్యవహారం, సనాతన ధర్మం విషయంలో ఫిల్మ్ ఇండస్ట్రీ వ్యక్తులు సరిగా మాట్లాడాలని సూచించారు. మద్దతుగా మాట్లాడితే మాట్లాడాలని.. లేకుంటే సైలెంట్‌గా ఉండండి అంటూ కాస్త సీరియస్‌గానే హెచ్చరించారు.

దీంతో పవన్ కళ్యాణ్‌కు కార్తి క్షమాపణలు చెప్పారు. తనకు పవన్‌కల్యాణ్‌ అంటే ఎంతో గౌరవం ఉందని.. తన వ్యాఖ్యలు తప్పుగా అనిపిస్తే క్షమించాలంటూ ట్వీట్ చేశారు. తానూ వేంకటేశ్వరస్వామి భక్తుడినేనని.. ఎప్పుడూ సంప్రదాయాలను గౌరవిస్తానని పోస్ట్ చేశారు. ఈ పోస్టుకు రిప్లై ఇచ్చిన పవన్ కళ్యాణ్.. సంప్రదాయాలను గౌరవిస్తూ వెంటనే స్పందించినట్లు సంతోషమని అన్నారు. కార్తి కావాలని అనలేదని అర్థమైందంటూ ట్వీట్ చేశారు.