తిరుమల లడ్డూ వివాదం.. ఏఆర్‌ డెయిరీ ఫుడ్స్‌కు కేంద్రం నోటీసు

తిరుమల శ్రీవారి లడ్డూ ప్రసాదంలో కల్తీ నెయ్యి వివాదం మరో మలుపు తిరిగింది. తిరుమల లడ్డూ ప్రసాదం తయారీకి నెయ్యి సరఫరా చేసిన ఏఆర్‌ ఫుడ్స్‌ కంపెనీకి నోటీసులు జారీ అయ్యాయి. ఈ మేరకు భారత ఆహార భద్రత ప్రమాణాల విభాగం నోటీసులు పంపించింది. నాలుగు కంపెనీల నుంచి నెయ్యి నమూనాలను కేంద్రం సేకరించింది.. అయితే నాణ్యత పరీక్షలో ఏఆర్‌ ఫుడ్స్‌ కంపెనీకి చెందిన నెయ్యి విఫలమైనట్లు తెలిపింది. గత శుక్రవారం నోటీసులు జారీ చేసినట్లు తెలిపారు.. ఏఆర్‌ ఫుడ్స్‌తో పాటు మరికొన్ని సంస్థలకు కేంద్రం షోకాజ్‌ నోటీసులు జారీ చేసింది. ఈ సంస్థల సమాధానం, రాష్ట్ర ప్రభుత్వ నివేదికలు వచ్చిన తర్వాత.. ఆ మేరకు చర్యలు తీసుకుంటామని ఆహార భద్రత ప్రమాణాల విభాగం తెలిపింది. అంతేకాదు ఏఆర్ ఫుడ్స్‌లో గతవారం తనిఖీలు జరిగాయి.

మరోవైపు తిరుమలలో రాష్ట్ర స్థాయి ఆరోగ్య ప్రయోగశాలను ఏర్పాటు చేసేందుకు ఎఫ్‌ఎస్‌ఎస్‌ఏఐ (ఫుడ్‌ సేఫ్టీ అండ్‌ స్టాండర్డ్స్‌ అథారిటీ ఆఫ్‌ ఇండియా) సిద్ధమైంది. 12,000 చదరపు అడుగుల విస్తీర్ణంలో రూ.22 కోట్లతో ఏర్పాటు ఏర్పాటు చేయనున్నారు.ఈ ల్యాబ్ ఏర్పాటుపై రాష్ట్ర వైద్య, ఆరోగ్య శాఖకు చెందిన ఇన్‌స్టిట్యూట్‌ ఆఫ్‌ ప్రివెంటివ్‌ మెడిసిన్‌ ద్వారా తిరుమల అధికారులతో ఒప్పందం చేసుకోబోతున్నారు. తిరుమలలో ప్రస్తుతం ఓ ల్యాబ్ ఉన్నా సరే పరీక్షలు అంతంతమాత్రమే అంటున్నారు. తిరుమలలో అన్నదానం, లడ్డూ, ఇతర అవసరాలుకు రూ.800 కోట్లతో నెయ్యిచ 30 నుంచి 40 రకాల వస్తువుల్ని టీటీడీ కొనుగోలు చేస్తోంది. అయితే వీటి నాణ్యత పరిశీలించేందుకు సరైన వ్యవస్థ లేదు.

అందుకే నెయ్యి సహా ఇతర వస్తువుల నాణ్యత పరిశీలించేందుకు ఆహార ప్రయోగశాల ఏర్పాటుకు ఎఫ్‌ఎస్‌ఎస్‌ఏఐ అధికారులు గ్రీన్ సిగ్నల్ ఇచ్చారు. ఈ ల్యాబ్‌కు సంబంధించి రూ.9 కోట్లతో అత్యాధునిక యంత్రాలు, రూ.6 కోట్లతో బేసిక్‌ పరికరాలు, రూ.5 కోట్లతో మైక్రోబయాలజీ వ్యవస్థను ఏర్పాటు చేస్తారు. ఈ ల్యాబ్ ఏర్పాటుకు 2023-24 ఆర్థిక సంవత్సరంలోనే ఎఫ్‌ఎస్‌ఎస్‌ఏఐ ఓకే చెప్పింది.. కానీ గత ప్రభుత్వం పట్టించుకోలేదనే విమర్శలు ఉన్నాయి. ఈ విషయం టీటీడీ ఈవో శ్యామలరావు దృష్టికి ఈ విషయం రాగానే గత నెల 6న వైద్య ఆరోగ్య శాఖకు రాసిన లేఖలో రెండు అంతస్తుల్లో ల్యాబ్‌ ఏర్పాటుకు ఆమోదం తెలిపింది కేంద్రం. ప్రస్తుతం ఉన్న ల్యాబ్‌కు ఎదురుగానే కొత్త కేంద్రం ఏర్పాటు చేయనున్నారు.

ఇదిలా ఉంటే. తిరుపతి లడ్డూ లో కల్తీ నెయ్యి వినియోగించారన్న ఆరోపణలపై కేంద్ర వినియోగదారుల శాఖ కూడా స్పందించింది. ఎఫ్‌ఎస్‌ఎస్‌ఏఐ నివేదిక వచ్చిన తర్వాత మార్కెట్‌లో ఉన్న నెయ్యి నాణ్యతను పరీక్షించే ప్రక్రియలో అవసరమైన చర్యలు తీసుకునే నిర్ణయాన్ని పరిశీలిస్తామని తెలిపింది. ఆహార నాణ్యత అనేది ఎఫ్‌ఎస్‌ఎస్‌ఏఐ పరిధిలోనిదని.. ఆ విభాగం నివేదిక కోసం తాము ఎదురుచూస్తున్నామంటున్నారు. నివేదికలో తేలే విషయాలకు అనుగుణంగా తమ తదుపరి చర్యలుంటాయని చెబుతున్నారు.