రూ.27 లక్షల ఖరీదైన బ్యాగ్‌తో సొరంగంలో యహ్వా సిన్వార్ భార్య.. వీడియో వైరల్

అక్టోబరు 7న గాజాలో ఇజ్రాయేల్ జరిపిన దాడిలో హమాస్ అధినేత యహ్వా సిన్వార్ మృతిచెందిన విషయం తెలిసిందే. ఓ భవనంపై ఇజ్రాయేల్ జరిపిన దాడుల్లో ముగ్గురు హమాస్ మిలిటెంట్టు హతమవ్వగా.. వారిలో ఒకర్ని సిన్వార్‌గా ధ్రువీకరించారు. అయితే, దాడికి కొద్ది గంటల ముందు సిన్వార్ గాజాలోని సొరంగంలో గడిపినట్టు వెలుగులోకి వచ్చింది. భార్య, పిల్లలతో అతడు సొరంగంలో ఉన్న వీడియోను ఇజ్రాయేల్ విడుదల చేసింది. సిన్వార్ మరణించడంతో ఖాన్ యూనిస్‌లోని ఆ కుటుంబం ఉన్న సొరంగం నుంచి సామగ్రిని బయటకు తీసుకెళ్తున్నట్టు అందులో సీసీటీవీ కెమెరాలో రికార్డయ్యింది.

ఇదే సమయంలో సిన్వార్ భార్య చేతిలో ఉన్న బ్యాగు గురించి ఇప్పుడు సోషల్ మీడియాలో చర్చ జరుగుతోంది. ఆమె వద్ద ఉన్న హ్యాండ్ బ్యాగు హెర్మేస్ కంపెనీదని, దీని విలువ 32 వేల డాలర్లు (అంటే భారత కరెన్సీలో అక్షరాలా రూ.26.88 లక్షలు) అని ఇజ్రాయేల్ అంటోంది. దీనిపై ఇజ్రాయేల్ వ్యాఖ్యానిస్తూ.. అక్టోబర్ 7 దాడికి ముందు రోజు రాత్రి యహ్యా సిన్వార్ భార్య సొరంగాల్లోకి వెళ్లింది.. ఆమె చేతిలో 32,000 డాలర్లు విలువైన హెర్మేస్ బిర్కిన్ బ్యాగ్‌ ఉందని పేర్కొంది. హమాస్ కారణంగా గాజా పౌరులు జీవనం దుర్బరమైతే.. ఇతరుల ప్రాణాలను ఫణంగా పెట్టి సిన్వార్, అతడి కుటుంబసభ్యులు విలాసవంతమైన జీవితాలను గడుపుతున్నారని తెలిపింది.

సిన్వార్ భార్య బ్యాగ్ పట్టుకుని ఉన్న వీడియోను ఇజ్రాయేల్ షేర్ చేసింది. అంత స్పష్టంగా లేని వీడియోలో బ్యాగ్‌పై డిజైన్ హెర్మేస్ బిర్కిన్ 40 బ్లాక్ టోగో గోల్డ్ హార్డ్‌వేర్ ఎడిషన్‌ను పోలి ఉంటుంది. ఇజ్రాయేల్ వాదనను హమాస్ ఇంకా ఖండించలేదు. హమాస్ దాచిపెట్టిన ఆయుధాలు.. సిన్వార్ మృతదేహాన్ని గుర్తించిన ప్రదేశంలో ఇజ్రాయేల్ 828 బ్రిగేడ్ ఇంటెలిజెన్స్ ఆధారిత టార్గెటెడ్ దాడులు నిర్వహించింది. దీనికి సంబంధించిన వివరాలను ఇజ్రాయేల్ సైనిక అధికార ప్రతినిధి రేర్ అడ్మిరల్ డానియల్ హగేరీ వెల్లడించారు. సొరంగం లోపల టాయ్‌లెట్లు, షవర్లు, కిచెన్, ఆహారం, నగదుతో పాటు కీలక డాక్యుమెంట్లను అక్కడ గుర్తించినట్టు ఫోటోలను బయటపెట్టారు.

మరోవైపు, తమ అధినేత మరణాన్ని హమాస్ కూడా ధ్రువీకరించిన విషయం తెలిసిందే. యుద్ధంలో సిన్వార్ వీరోచిత పోరాటం చేసి అమరుడయ్యాడని తెలిపింది. ఇజ్రాయెల్‌తో పోరులో ప్రాణాలు కోల్పోయిన హమాస్ చీఫ్ యాహ్యా సిన్వార్‌.. హమాస్‌ మిలిటరీ విభాగంలో కీలక వ్యక్తి. శత్రువును అంచనా వేయడంలో దిట్ట. అతడి ఆధ్వర్యంలోనే ఇజ్రాయేల్‌పై అక్టోబరు 7 హమాస్ బలగాలు దాడి చేశాయి. తాజాగా ఇజ్రాయెల్ డిఫెన్స్ ఫోర్సెస్.. సిన్వర్‌ను మట్టుపెట్టడంతో ఆ సంస్థకు భారీ నష్టమే.