ఏపీలో మద్యం ప్రియులకు శుభవార్త.. త్వరలోనే కమిటీ, మంత్రి కీలక ప్రకటన

ఆంధ్రప్రదేశ్‌లో మద్యం ధరల స్థిరీకరణకు త్వరలోనే టెండర్‌ కమిటీ వేస్తామని ఏపీ గనులు, ఎక్సైజ్ శాఖ మంత్రి కొల్లు రవీంద్ర వెల్లడించారు. డిస్టిలరీస్‌తో టెండర్ కమిటీ చర్చలు జరిపి మద్యం ధరల ఎంఆర్‌పీ రేట్లు నిర్ణయిస్తుందని పేర్కొన్నారు. నూతన ఎక్సైజ్ పాలసీలో భాగంగా ఇప్పటికే నాణ్యమైన మద్యాన్ని ఆంధ్రప్రదేశ్ ప్రజలకు అందుబాటులోకి తీసుకువచ్చామని స్పష్టం చేశారు. మద్యం దుకాణాల కేటాయింపులో అత్యంత పారదర్శకతను పాటించినట్లు తెలిపారు. మద్యం విక్రయాలు కూడా పారదర్శకంగా జరుపుతున్నట్లు వివరించారు. మరోవైపు.. మొత్తం మద్యం షాపుల్లో 10 శాతం.. ఏపీ సర్కార్ గీత కార్మికులకు కేటాయించిన విషయం తెలిసిందే. ఈ నేపథ్యంలో గతంలో ఇచ్చిన హామీ ప్రకారం వారం రోజుల్లోనే 340 మద్యం దుకాణాలు కేటాయించేందుకు గెజిట్ నోటిఫికేషన్ ఇస్తామని వెల్లడించారు. నవంబర్ 15వ తేదీ లోపు దుకాణాల కేటాయింపు ప్రక్రియను పూర్తి చేయాలని ప్రభుత్వం ఆలోచిస్తోందని కొల్లు రవీంద్ర తెలిపారు.

మరోవైపు.. ఏపీ ప్రభుత్వం క్వాలిటీ మద్యంతోపాటు తక్కువ ధరకే లిక్కర్‌ను అందుబాటులోకి తీసుకువచ్చింది. అంతేకాకుండా ఇప్పుడు ఉన్నవి మాత్రమే కాకుండా త్వరలోనే మరిన్ని కొత్త మద్యం బ్రాండ్లను అందుబాటులోకి తీసుకురానున్నట్లు మంత్రి కొల్లు రవీంద్ర స్పష్టం చేశారు. అంతేకాకుండా మద్యం ధరలను కూడా తగ్గించే ఆలోచన చేస్తున్నట్లు వివరించారు. ఇందుకోసం ఒక కమిటీని ఏర్పాటు చేశామని తెలిపారు. ఆ కమిటీ త్వరలోనే రిపోర్టు ఇస్తుందని.. ఆ నివేదిక ఆధారంగా లిక్కర్ ధరలు తగ్గిస్తామని మంత్రి వెల్లడించారు. ఇక ఆంధ్రప్రదేశ్‌లోని లిక్కర్ షాపుల్లో డిజిటల్ పేమెంట్లు చేసేందుకు ఇప్పటికే ఆమోదం తెలిపినట్లు మంత్రి కొల్లు రవీంద్ర స్పష్టం చేశారు. మద్యం సరఫరా చేసే ట్రక్కులకు జీపీఎస్ పెట్టి పంపిస్తున్నట్లు వివరించారు. ఇక అనుమతులు లేకుండా పబ్‌లలో లిక్కర్ విక్రయాలు జరిపితే కఠిన చర్యలు తీసుకుంటామని హెచ్చరికలు చేశారు.

గతంలో వైసీపీ ప్రభుత్వ హయాంలో మద్యం విక్రయాల్లో జరిగిన గోల్‌మాల్‌పై విచారణ చేస్తున్నామని తెలిపారు. తెలుగుదేశం జనసేన బీజేపీ కూటమి ప్రభుత్వం మద్యాన్ని ఆదాయ వనరుగా చూడలేదని స్పష్టం చేశారు. ఏపీలో ఇటీవల కొత్త మద్యం పాలసీ అమల్లోకి వచ్చింది. వైసీపీ సర్కార్ హయాంలో ప్రభుత్వమే మద్యం విక్రయాలు జరిపింది. ఆ తర్వాత అధికారంలోకి వచ్చిన కూటమి సర్కార్ మద్యాన్ని గతంలో ఉన్న విధంగా ప్రైవేట్ వ్యక్తులకు అప్పగించింది. దీంతో 2019కి ముందు వైసీపీ అధికారంలోకి రాకముందు మద్యం బ్రాండ్లు తిరిగి అందుబాటులోకి వచ్చాయి. ఈ నిర్ణయంతో మద్యం ప్రియులు ఫుల్ ఖుషీలో ఉన్నారు. కింగ్ ఫిషర్, రాయల్ స్టాగ్, మాన్షన్ హౌస్, ఇంపీరియల్ బ్లూ వంటి బ్రాండ్లు మళ్లీ అందుబాటులోకి రావడంతో మందుబాబులు సంతోషంతో మునిగిపోతున్నారు. ఇక రూ.99 క్వార్టర్ త్వరలోనే అందుబాటులోకి వస్తుందని అధికార వర్గాలు పేర్కొంటున్నాయి.