ఏపీ రైలు ప్రయాణికులకు అలర్ట్.. మూడు ప్రత్యేక రైళ్లు, ఈ రూట్‌లోనే

ఏపీలో రైలు ప్రయాణికులకు ముఖ్యమైన గమనిక.. ప్రయాణికుల రద్దీతో ప్రత్యేక రైళ్లను నడుపుతున్నారు. అనంతపురం మీదుగా రెండు ప్రత్యేక రైళ్లను నడుపుతున్నట్లు రైల్వే డివిజన్‌ అధికారులు తెలిపారు. ఈనెల 12, 19వ తేదీల్లో బెంగళూరు నుంచి బరౌనికి ప్రత్యేక రైలు (06563) రాత్రి 9.15 నిమిషాలకు బయలుదేరి మరుసటి రోజు రాత్రి 8 గంటలకు బరౌనీ చేరుకుంటుంది. ఈ రైలు ధర్మవరం, అనంతపురం, డోన్‌ మీదుగా వెళ్తుందని చెప్పారు. ఈ ప్రత్యేక రైలు (06564) తిరుగు ప్రయాణంలో బరౌనీలో ఈనెల 15, 22వ తేదీల్లో సాయంత్రం 5.30కు బయలుదేరి మరుసటి రోజు సాయంత్రం 6 గంటలకు ఇదే రూట్‌లో బెంగళూరుకు చేరుకుంటుంది.

యశ్వంతపూర్‌- ముజఫర్‌పూర్‌ మధ్య మరో రెండు ప్రత్యేక రైళ్లు కూడా అనంతపురం మీదుగా నడుస్తాయన్నారు అధికారులు. ఈనెల 13న ఉదయం 7.30కు యశ్వంతపూర్‌లో రైలు (06229) బయలుదేరి ధర్మవరం, అనంతపురం, డోన్‌ మీదుగా ప్రయాణించి రెండో రోజు ఉదయం 9.45కు ముజఫర్‌పూర్‌ చేరుకుంటుంది. ఈ రైలు (06230) తిరుగు ప్రయాణంలో ముజఫర్‌పూర్‌లో 16న ఉదయం 10.45కు బయలుదేరి.. ఇదే మార్గంలో రెండో రోజు ఉదయం 10.30కు యశ్వంతపూర్‌ చేరుకుంటుంది.

యశ్వంతపూర్‌ నుంచి దానాపూర్‌కు మరో ప్రత్యేక రైలును నడుపుతున్నట్లు అధికారులు తెలిపారు. ఈనెల 14, 21వ తేదీల్లో ఈరైలు (06271) యశ్వంతపూర్‌లో ఉదయం 7.30కు బయలుదేరి ధర్మవరం, డోన్‌ మీదుగా ప్రయాణించి దానాపూర్‌కు రెండో రోజు ఉదయం 6 గంటలకు చేరుకుంటుంది. 17, 24వ తేదీల్లో ఉదయం 8 గంటలకు దానాపూర్‌లో రైలు (06272) బయలుదేరి రెండో రోజు ఉదయం 10.30కు యశ్వంతపూర్‌ చేరుకుంటుంది. ఈరైలు అనంతపురంలో ఆగదని తెలిపారు.

కదిరికి కొత్తగా కేటాయించిన ఐదు బస్సులు ప్రారంభమయ్యాయి. కదిరి డిపో ప్రాంగణంలో ఎమ్మెల్యే కందికుంట వెంకటప్రసాద్‌ ప్రారంభించారు.. పాత బస్సుల స్థానంలో కొత్తవి ఏర్పాటు చేశారు. గత ప్రభుత్వ హయాంలో ఆర్టీసీకి కొత్త బస్సులు ఇవ్వకపోవడంతో ప్రజలు డొక్కు వాటిల్లో ప్రయాణించాల్సిన దుస్థితి ఏర్పడిందన్నారు ఎమ్మెల్యే. ప్రజలకు సౌకర్యార్థం కూటమి ప్రభుత్వం కొత్త బస్సులను ఏర్పాటు చేసిందన్నారు.