ఆర్టీసీ బస్సుల్లో 25 శాతం రాయితీ.. ఈ ఆరింటిలో ఏది ఉన్నా చాలు.. ఒరిజినల్ లేకున్నా నో ప్రాబ్లమ్

వృద్ధులకు ఏపీఎస్ఆర్టీసీ బంపరాఫర్ ఇచ్చింది. ఆర్టీసీ బస్సుల్లో టికెట్లపై 25 శాతం రాయితీ ఇస్తున్నట్లు ప్రకటించింది. ఏపీఎస్ఆర్టీసీకి చెందిన అన్ని రకాల బస్సు సర్వీసుల్లోనూ ఈ సౌకర్యం కల్పిస్తోంది. అయితే వృద్ధుల ప్రయాణానికి రాయితీ టికెట్ల జారీపై బస్సు కండక్టర్లలో అక్కడడక్కడా సందేహాలు ఉన్నాయి. ఈ నేపథ్యంలో వృద్ధులకు టికెట్లలో 25 శాతం రాయితీపై పాటించాల్సిన నిబంధనలపై ఏపీఎస్ఆర్టీసీ మరోసారి మార్గదర్శకాలు జారీ చేసింది. ఆర్టీసీ ఆపరేషన్స్ ఈడీ అప్పలరాజు ఈ మేరకు అన్ని జిల్లాల డీపీటీవో, ఈడీలకు ఆదేశాలు జారీ చేశారు.

బస్సుల్లో 60 ఏళ్లు దాటిన వారికి టికెట్ ధరలో 25 శాతం రాయితీని ఆర్టీసీని ఎప్పటి నుంచో అమలుచేస్తోంది. అయితే కరోనా కారణంగా ఈ విధానానికి బ్రేక్ పడింది. తాజాగా ఈ విధానాన్ని మళ్లీ అమల్లోకి తెస్తూ.. ఏపీఎస్ఆర్టీసీ ఉత్తర్వులు జారీ చేసింది. అయితే టికెట్లు జారీ చేసే సమయంలో ప్రయాణికులకు, ఆర్టీసీ సిబ్బందికి ఓ విషయంలో.. వాగ్వాదాలు జరుగుతున్నాయి. వయస్సు నిర్ధరణ కోసం ప్రయాణికులు ప్రభుత్వం చెప్పిన ఆరు కార్డుల్లో కండక్టరుకు ఏ కార్డు చూపించినా సరిపోతుంది. వయస్సు నిర్ధారణ కోసం 60 ఏళ్లు దాటిన వృద్ధులు ఆధార్‌ కార్డు, సీనియర్‌ సిటిజన్‌ ఐడీ కార్డు, ఓటర్‌ ఐడీ, పాన్‌ కార్డు, పాస్‌పోర్టు, రేషన్‌ కార్డుల్లో ఏ ఒక్కటి చూపించినా సరిపోతుందని ఏపీఎస్ఆర్టీసీ ఉత్తర్వుల్లో స్పష్టం చేసింది.

అయితే కొన్నిచోట్ల టికెట్లు జారీ చేసే సమయంలో కండక్టర్లు.. ప్రయాణికులను ఒరిజినల్ కార్డులను అడుగుతున్నట్లు తెలిసింది. ఈ విషయమై కొన్నిచోట్ల వాగ్వాదం కూడా జరిగినట్లు సమాచారం. ఈ విషయం కాస్తా ఆర్టీసీ యాజమాన్యం దృష్టికి చేరటంతో.. వృద్ధులకు టికెట్ల రాయితీపై నిబంధనలను వివరిస్తూ ఏపీఎస్ఆర్టీసీ మరోసారి మార్గదర్శకాలు జారీచేసింది. ఆరు గుర్తింపు కార్డులలో ఏది ఉన్నా సరిపోతుందని చెప్పిన ఆర్టీసీ.. ఒరిజినల్ పత్రాలు లేదా కార్డులు లేకుంటే సెల్‌ఫోన్‌లో చూపించే డిజిటల్ కార్డులైనా సరిపోతుందని స్పష్టం చేసింది. ఒరిజినల్ గుర్తింపు కార్డు అందుబాటులో లేకపోతే.. సెల్ ఫోన్‌లో డిజిటల్ గుర్తింపు కార్డులు చూపించినా రాయితీ టికెట్ ఇవ్వాలని ఏపీఎస్ఆర్టీసీ సిబ్బందికి స్పష్టం చేసింది.

మరోవైపు ప్రాంతం, రాష్ట్రంతో సంబంధం లేకుండా దేశంలో 60 ఏళ్లకు పైబడిన వారందరికీ ఏపీఎస్ఆర్టీసీ ఈ సౌకర్యం కల్పిస్తోంది. అలాగే బస్సు సర్వీసులతో సంబంధం లేకుండా పల్లె వెలుగు సర్వీసుల నుంచి ఎక్స్‌ప్రెస్, సూపర్ డీలక్స్, ఇంధ్ర, ఏసీ బస్సులు ఇలా అన్ని సర్వీసులలోనూ వృద్ధులకు ఏపీఎస్ఆర్టీసీ ఈ వెసలుబాటు కల్పిస్తోంది.